ខេត្តរតនគិរី ៖ ស្ត្រីម្នាក់ក្រោយពីឈ្លោះប្រកែកជាមួយប្ដីបន្តិចបន្តួច ក៏ទៅដុតខ្លួនឯង បណ្តាលឲ្យស្លាប់យ៉ាងអាណោចអាធ័ម កាលពីវេលាម៉ោង៦និង៣០នាទីព្រឹកថ្ងៃទី១ ខែមីនា នៅភូមិភ្នំស្វាយ សង្កាត់បឹងកន្សែង ក្រុងបានលុង ។
មន្ត្រីនគរបាលប៉ុស្តិ៍បឹងកន្សែង បានឲ្យដឹងថា ស្ត្រីដែលដុតខ្លួនឯងនេះឈ្មោះ ឆាយ សុខ អាយុ៤០ឆ្នាំ ជនជាតិខ្មែរ ប្ដីឈ្មោះ ខុម នី អាយុ៣៦ឆ្នាំ មុខរបររត់ឡំប្រឺតាបាចា(ឥណ្ឌា) មានកូនចំនួន៣នាក់ ។
មន្ត្រីដដែលបន្តថា មុនកើតហេតុស្ត្រីរូបនេះ បានកោសខ្យល់ឲ្យប្ដី និងកោរពុកមាត់បណ្ដើរប្រកែកគ្នាបណ្ដើរ រួចប្ដីក៏ដើរឡើងទៅដេកនៅលើផ្ទះ ចំណែកប្រពន្ធនៅផឹកសុីខាងក្រោមផ្ទះ ។ បន្ទាប់មក ស្រាប់ប្រពន្ធតែដើរចូលទៅយកប្រេងសាំងប្រហែល៣លីត្រ មកចាក់ពីលើខ្លួនរួចគូសដែកកេះដុតខ្លួនឯងតែម្ដង ។
ភ្លាមៗនោះ អ្នកជិតខាងបានមកជួយពន្លត់ភ្លើងរហូតរលត់ ហើយសាច់ញាតិក៏បានដឹកបញ្ជូនយកទៅមន្ទីរពេទ្យបង្អែកខេត្តដើម្បីសង្គ្រោះ តែអកុសលស្ត្រីរងគ្រោះបានស្លាប់ទៅហើយ ៕
ចែករំលែកព័តមាននេះ