ខេត្តក្រចេះ ៖ ប្រជាពលរដ្ឋក្នុងមូលដ្ឋាននិងមកពីបណ្តាខេត្តផ្សេងៗបានចូលទៅកាប់ទន្ទ្រានដីព្រៃដោយខុសច្បាប់ក្នុងតំបន់ការពារធម្មជាតិ ស្ថិតក្នុងភូមិសាស្ត្រខេត្តក្រចេះ ចាប់តាំងពីឆ្នាំ២០១៩មក ដែលសកម្មភាពនេះ ជាការបំផ្លិចបំផ្លាញធនធានធម្មជាតិយ៉ាងធ្ងន់ធ្ងរ ។
ពេលនេះរដ្ឋបាលខេត្តក្រចេះក៏បានជម្រាបជូនសាធារណជន និងបងប្អូនប្រជាពលរដ្ឋឲ្យបានជ្រាបថា ដោយសារសង្កេតឃើញមានបងប្អូនមួយចំនួន ទោះបីជារដ្ឋបាលខេត្តផ្នែកជំនាញ និងអាជ្ញាធរមានសមត្ថកិច្ចចាត់វិធានការបង្ការទប់ស្កាត់ និងបង្ក្រាបជាបន្តបន្ទាប់យ៉ាងណាក្តី ក៏នៅមានប្រជាពលរដ្ឋបន្តការចូលកាប់គាស់ រុករានទន្ទ្រាន ដាំដំណាំ សង់លំនៅឋានធ្វើរបងហ៊ុមព័ទ្ធដដែល ។ មិនតែប៉ុណ្ណោះ ទាមទារស្នើសុំឱ្យអាជ្ញាធរវាស់វែង ដើម្បីបានប្រើប្រាស់អាស្រ័យផលស្របច្បាប់ថែមទៀត ។
ក្នុងន័យនេះ ដើម្បីបន្តពង្រឹងប្រសិទ្ធភាពលើការគ្រប់ដីរដ្ឋ និងធនធានព្រៃឈើនៅតាមតំបន់ការពារ ធនធានធម្មជាតិក្នុងភូមិសាស្ត្រខេត្តក្រចេះនេះ រដ្ឋបាលខេត្តក្រចេះក៏បានដាក់ចេញនូវវិធានការដូចខាងក្រោម៖
ទី១-មោឃភាពចោលនូវរាល់លិខិតលក់-ទិញ ឬលិខិតបញ្ជាក់កាន់កាប់ដីព្រៃខុសច្បាប់ នៅក្នុងតំបន់ការពារធម្មជាតិ ។
ទី២-ដកហូតយកមកជាសម្បត្តិរដ្ឋវិញនូវរាល់ដីព្រៃ ដែលបានកាប់គាស់រុករានទន្ទ្រាន ដាំដំណាំ សង់លំនៅឋានធ្វើរបងហ៊ុមព័ទ្ធក្នុងតំបន់ការពារធម្មជាតិ ។
ទី៣-ការកាប់កាស់រុករានដីព្រៃដុតព្រៃសង់ផ្ទះ សង់តូប រោងធ្វើរបងហ៊ុមព័ទ្ធ និងដាំដំណាំដើម្បីយកដីធ្វើជាកម្មសិទ្ធិក្នុងតំបន់ការពារធម្មជាតិ គឺជាបទល្មើសធនធានធម្មជាតិ ដែលមានចែងក្នុងមាត្រា៦១ និងមាត្រា៦២នៃច្បាប់ស្តីពីតំបន់ការពារធម្មជាតិ។
ទី៤-អាជ្ញាធរមូលដ្ឋានភូមិ-ឃុំ-ស្រុកត្រូវជួយផ្សព្វផ្សាយនិងចូលរួមបញ្ឈប់ជាបន្ទាន់នូវការចូលកាប់ ទន្ទ្រានឈូសឆាយដីព្រៃដាំដំណាំ សាងសង់ផ្ទះ ខ្ទម រោង ធ្វើរបងហ៊ុមព័ទ្ធ ក្នុងភូមិសាស្ត្រខេត្ត ក្រចេះ និងត្រូវបញ្ឈប់ជាបន្ទាន់នូវការចូលរស់នៅកាន់កាប់ដោយត្រូវរុះរើដោយវិធានការរដ្ឋបាល ឬដោយការស្ម័គ្រចិត្ត ។
ទី៥-ក្នុងករណីមិនអនុវត្តតាមខ្លឹមសារសេចក្តីជូនដំណឹងខាងលើនេះ គណៈបញ្ជាការឯកភាពរដ្ឋបាលខេត្ត និងស្រុកពាក់ព័ន្ធនឹងចាត់វិធានការអនុវត្តតាមនីតិវិធីច្បាប់ជាធរមាន។
ពេលទទួលបានសេចក្តីជូនដំណឹងនេះហើយ រដ្ឋបាលខេត្តក្រចេះ សង្ឃឹមយ៉ាងមុតមាំថា អាជ្ញាធរមូលដ្ឋានភូមិ-ឃុំ-ស្រុក ពាក់ព័ន្ធផ្នែកជំនាញសាធារណជន និងប្រជាពលរដ្ឋ ព្រមទាំងអ្នកពាក់ព័ន្ធដែលកំពុងរស់នៅ និងកាន់កាប់ដីព្រៃខុសច្បាប់នៅក្នុងតំបន់ការពារធម្មជាតិ នឹងចូលរួមអនុវត្តតាមសេចក្តីជូនដំណឹងនេះ និងចូលរួមអនុវត្តច្បាប់ លិខិតបទដ្ឋានគតិយុត្តពាក់ព័ន្ធឱ្យមានប្រសិទ្ធិភាពខ្ពស់ចាប់ពីថ្ងៃជូនដំណឹងនេះតទៅ ៕
ចែករំលែកព័តមាននេះ