ADផ្ទាំងផ្សព្វផ្សាយពាណិជ្ជកម្ម

Picture

ដកហូតបាន​​ឧបករណ៍​នេសាទ​ល្មើសច្បាប់​​ ខណៈ​​ជនសង្ស័យគេចខ្លួនរួច​

2 ខែ មុន
  • ស្ទឹងត្រែង

ខេត្តស្ទឹងត្រែង ៖ ក្នុង​រដូវ​បិទ​នេសាទ​ដែល​ត្រូវ​បាន​ប្រកាស ចាប់ពី​ថ្ងៃ​ទី​១ ខែឧសភា ២០២៤ ក្រុម​អភិរក្ស​ព្រៃ​មេ​ពូជ ​បាន​បង្កើន​ការ​ចុះ​ល្បាត​តាម​តំបន់​សំខាន់​ៗ​មួយ​ចំនួន ​និង​បាន​ប្រទះ​ឃើញ​ក្រុម​ជនល្មើស​ប្រព្រឹត្ត​សកម្មភាព​ដោយ​ប្រើប្រាស់​ឧបករណ៍​ឆក់​ត្រី​ទាំង​ពេល​ថ្ងៃ និង​ពេល​យប់…

ខេត្តស្ទឹងត្រែង ៖ ក្នុង​រដូវ​បិទ​នេសាទ​ដែល​ត្រូវ​បាន​ប្រកាស ចាប់ពី​ថ្ងៃ​ទី​១ ខែឧសភា ២០២៤ ក្រុម​អភិរក្ស​ព្រៃ​មេ​ពូជ ​បាន​បង្កើន​ការ​ចុះ​ល្បាត​តាម​តំបន់​សំខាន់​ៗ​មួយ​ចំនួន ​និង​បាន​ប្រទះ​ឃើញ​ក្រុម​ជនល្មើស​ប្រព្រឹត្ត​សកម្មភាព​ដោយ​ប្រើប្រាស់​ឧបករណ៍​ឆក់​ត្រី​ទាំង​ពេល​ថ្ងៃ និង​ពេល​យប់ ។

លោក​នី​វី មន្ត្រី​ឧ​ទ្យា​នុ​រក្ស​ប្រចាំ​តំបន់​រាម​សារបាន​បញ្ជាក់​ថា ចាប់ពី​ថ្ងៃ​ទី​០៥ ឧសភា ឧសភា ២០២៤ ក្រុមការងារ​រួម​សហការ​ជាមួយ​ប្រជា​សហគមន៍​នេសាទ នៅ​សង្កាត់​សាមគ្គី​ក្រុង​ស្ទឹង​ត្រែង និង​ឃុំ​អូរ​ស្វាយ​-​ឃុំ​កោះ​ស្នែង ​ក្នុងស្រុក​បូ​រី​អូរ​ស្វាយ​សែន​ជ័យ​បាន​បង្ក្រាប​៣​ករណី​នៅ​ថ្ងៃ​ទី​៥​មាន​២​ករណី និង​ថ្ងៃ​ទី​៦​មួយ​ករណី​ដោយ​ដកហូត​សម្ភារ និង​ឧបករណ៍​ល្មើសច្បាប់​មួយ​ចំនួន​ទៀត ។
ក្នុង​ចំណោម​៣​ករណី​នោះ ជនសង្ស័យ​មួយ​ក្រុម​មាន​គ្នា​២​នាក់​បាន​ទម្លាក់​ឧបករណ៍​ចោល​ទៅ​ក្នុង​ទឹក​និង​បើកទូក​រត់គេច​ខ្លួន​ខណៈ​ក្រុមការងារ​ប្រដេញ​ទូក​តាម​ចាប់ ។

ដោយឡែក នៅ​វេលា​ម៉ោង​៣ និង​៣​នាទី​ទៀប​ភ្លឺ​ឈាន​ចូល​ថ្ងៃ​ទី​៧​ក្រុមការងារ​ល្បាត​ក៏​បាន​ជួប​ក្រុម​ជនល្មើស​កំពុង​ធ្វើ​សកម្មភាព​ឆក់​ត្រី​ពេល​នោះ​ក្រុម​ល្បាត​បាន​ដេញចាប់​តែ​ក្រុម​ជនល្មើស​រត់​ចោល​ទូក​ម៉ាស៊ីន​ក្រុម​ល្បាត​ក៏​បាន​ដកហូត​វត្ថុ​តាង​ទាំងនោះ​រួម​មាន​ទូក​ឈើ​ក្បាល​ស្រួច​១​គ្រឿង​ម៉ាស៊ីន​កម្លាំង​២០​សេស​ធី​បី​សី​១​គ្រឿង​អា​គុយ​៥០Ah១​គ្រឿង​ដុំ​ឆក់​សេរី​ថ្មី ១​គ្រឿង​ច្រ​វ៉ា​ក់​ជាប់ កន្ត្រង​ដងត្រី​១​ខ្សែភ្លើង​៥​ម៉ែត្រ ។ វត្ថុ​តាង​ទាំងនេះ​បាន​រក្សា​ទុក្ខ​នៅ​ស្នាក់​ការ​រង​កំបោរ ។

លោក​ថង កង ប្រជា​សហគមន៍​នេសាទ​បញ្ជាក់​ថា ជនសង្ស័យ​ទាំងនេះ​មាន​ច​រិ​ក​ព្រហើនកោងកាច​មិន​ចូលរួម​គោរព​ច្បាប់​ជលផល​នោះ​ទេ ព្រោះ​នៅ​ក្នុង​រដូវ​បិទ​នេសាទ ជន​ទាំងនេះ​បាន​ប្រើប្រាស់​ឧបករណ៍​ឆក់​ធ្វើ​សកម្មភាព​ឆក់​ត្រី​ទាំង​ថ្ងៃ ដោយ​មិន​កោតខ្លាច​កម្លាំង​សមត្ថកិច្ច​ណាមួយ​ឡើយ ។

លោក​បន្ត​ថា តំណាង​ឱ្យ​ប្រជា​សហគមន៍​នេសាទ សូម​អំពាវនាវ​ដល់​ប្រជា​អ្នកនេសាទ​ទាំងអស់ កុំ​ព្យាយាម​ប្រើ​ឧបករណ៍​នេសាទ​ខុសច្បាប់​បែប​នេះ ព្រោះ​វា​ជា​ទ​ង្វើ​បំផ្លាញ​ធនធាន​មច្ឆជាតិ​របស់​ខ្លួនឯង​តែ​ប៉ុណ្ណោះ ។

លោក​សាយ កុសល អភិបាលក្រុង​ស្ទឹង​ត្រែង សូម​លើកទឹកចិត្ត​ទៅ​ក្រុម​អភិរក្ស​ត្រី​មេ​ពូជ ហើយ​សូម​ឱ្យ​រួម​គ្នា​បង្កើន​សកម្មភាព​ចុះ​ល្បាត​ឱ្យ​បាន​ញឹកញាប់ ចំណែក​អាជ្ញាធរ​និង​ជួយ​ឧបត្ថម្ភ​គាំទ្រ​សម្ភារ​គ្រឿ​បរិភោគ ផ្សេង​ៗ​បន្ថែម​ទៀត ដើម្បី​បង្កើន​ប្រសិទ្ធភាព​ការពារ​ផលប្រយោជន៍​រួម​របស់​យើង​ទាំងអស់​គ្នា​ក្នុង​រដូវ​បិទ​នេសាទ ។

ចំពោះ​ករណី​នេះ​ប្រជា​សហគមន៍​នេសាទ និង​កម្លាំង​ល្បាត​ស្នើ​សុំ​ទៅ​មន្ត្រី​ជំនាញ​ជលផល​និង​ប៉ុស្តិ៍​រដ្ឋបាល​ឃុំ​ឱ្យ​ជួយ​អន្តរាគមន៍​និង​បន្ថែម​កម្លាំង​ផង ព្រោះ​សហគមន៍​មាន​គ្នា​តិច​ដែន​អភិរក្ស​មាន​ទំហំ​ធំ​និង​មាន​ប្រវែង​ជាង​៤០​គីឡូម៉ែត្រ ឯណោះ​មិន​អាច​គ្រប់គ្រង​បាន​ទាំងស្រុង​នោះ​ទេ ៕

អត្ថបទសរសេរ ដោយ

កែសម្រួលដោយ