រាជធានីភ្នំពេញ ៖ លោក វ៉ាត់ ចំរើនអគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា អាជ្ញាកណ្ដាល ចៅក្រម ជាមន្ត្រីវិនិច្ឆ័យយុត្តិធម៌ឱ្យបច្ចេកទេសកីឡាការ៉ាតេ ដូច្នេះជាដំបូងយើងត្រូវមានបេះដូងយុត្តិធម៌ និងស្គាល់ខ្លួនឯងឱ្យច្បាស់ថាជាអ្នកណាសិន ។ លោកមានប្រសាសន៍បែបនេះនៅក្នុងសិក្ខាសាលាស្ដីពីច្បាប់ប្រកួតការ៉ាតេរបស់សហព័ន្ធពិភពលោក២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី២៣ កុម្ភៈ ដែលសិក្ខាសាលានេះត្រូវបានរៀបចំឡើងរយៈពេល៣ថ្ងៃចាប់ពីថ្ងៃទី២៣ដល់២៥កុម្ភៈ ដោយមានសិក្ខាកាមចូលរួមសរុប៧៣នាក់ក្នុងនោះស្ត្រី១៨នាក់ ។ វាគ្មិនសំខាន់ដែលបានឡើងធ្វើបទបង្ហាញនៅក្នុងឱកាសនោះគឺលោក Shihan Lim ជាមន្ត្រីជំនាញបច្ចេកទេសអាជ្ញាកណ្ដាលរបស់សហព័ន្ធការ៉ាតេពិភពលោក(WKF)។
លោក វ៉ាត់ ចំរើន មានប្រសាសន៍បន្តថា យើងត្រូវដឹងខ្លួនឯងជាគ្រូឱ្យប្រាកដជាគ្រូ ត្រូវប្រើជំនាញឥរិយាបទជាគ្រូ ប៉ុន្តែបើសិនជាមកធ្វើជាអាជ្ញាកណ្ដាល ត្រូវផ្លាស់ប្ដូរមុខមាត់ឥរិយាបទរបស់យើងទាញទៅរកជំនាញក្នុងការទទួលខុសត្រូវជាអាជ្ញាកណ្ដាលវិញ ដោយត្រូវបែងចែកឱ្យដាច់កុំឱ្យមានការជំពាក់ជំពិន ។ បើកាលណាធ្វើជាអាជ្ញាកណ្ដាលបែរជាមានអារម្មណ៍នៅតែជាគ្រូ ការកាត់ក្ដីគ្មានភាពយុត្តិធម៌នោះទេ ហើយវានាំឱ្យមានទំនាស់ផ្នែកអត្ថប្រយោជន៍មិនខានឡើយ ដោយសារតែយើងនៅមានភាពច្របូកច្របល់គ្នារវាងអាជ្ញាកណ្ដាល ចៅក្រម និងគ្រូ។
លោកបានសង្កត់ធ្ងន់ថា យើងត្រូវតែស្គាល់ឱ្យបានច្បាស់ថាអ្វីទៅជាគ្រូ បានន័យថា គ្រូគឺជាអ្នកការពារ និងស្វែងរកភាពយុត្តិធម៌ ការវិនិច្ឆ័យឱ្យមានភាពត្រឹមត្រូវនិងស្របច្បាប់ ។ គ្រូបង្វឹកនិងកីឡាករគឺជាអ្នកអនុវត្តបទបញ្ជាការប្រកួតហើយគ្រូមានតួនាទី២គឺអនុវត្តផង និងការពារផង បើសិនជាអាជ្ញាកណ្ដាលធ្វើខុសមានតែគ្រូប៉ុណ្ណោះជាអ្នកចេញមុខការពារ។
លោកក៏បានលើកឡើងអំពីតួនាទីអាជ្ញាកណ្ដាលវិញម្ដងថា អាជ្ញាកណ្ដាលមានតួនាទីបង្កើតបទបញ្ជាការប្រកួត គឺអាជ្ញាកណ្ដាលដែលមានកម្រិតខ្ពស់ អាជ្ញាកណ្ដាលពិភពលោក ប៉ុន្តែបើទោះជាយើងមិនមានលទ្ធភាពបង្កើតបទបញ្ជាបានមែន តែយើងក៏មានតួនាទីបង្កើតបទបញ្ជាប្រកួតបានដែរ ។ ឧទាហរណ៍នៅប្រទេសយើងគឺតែងមានភាពខុសប្លែកតិចតួច ដូចជាអ្នកដែលមកប្រកួតយឺត១៥នាទីដែលច្បាប់បានកំណត់ឱ្យចាញ់ដោយស្វ័យប្រវត្តិ ប៉ុន្តែយោងទៅតាមស្ថានភាពជាក់ស្ដែងដូចជាការស្ទះចរាចរណ៍ ត្រូវមានច្បាប់អនុគ្រោះឬពន្យារពេលបាន តែមិនអាចធ្វើឱ្យខុសពីបទបញ្ជាអន្តរជាតិទាំងស្រុងបានឡើយ ។ ដូច្នេះអាជ្ញាកណ្ដាល ចៅក្រម មិនត្រឹមតែជាអ្នកបង្កើតច្បាប់ប្រកួតនោះទេ គឺមានតួនាទីការពារនិងអនុវត្តឱ្យមានប្រសិទ្ធភាពខ្ពស់ ។ អ្វីដែលសំខាន់ជាងនេះទៅទៀត ក្រៅពីការពារបានហើយត្រូវតែចេះធ្វើការវាយតម្លៃថាតើការអនុវត្តរបស់ខ្លួនឯងត្រឹមត្រូវឬអត់ មានភាពយុត្តិធម៌ឬអត់ ។ លោកថា តួនាទីអាជ្ញាកណ្ដាល
មាន៤គឺ ៖
ទី១-បង្កើតបទបញ្ញត្តិផ្សេងៗបន្ថែមពីលើបទបញ្ជាប្រកួតអន្តរជាតិ
ទី២-អនុវត្តបទបញ្ជាឱ្យបានត្រឹមត្រូវ ឱ្យមានតម្លាភាព សុចរិតភាព មិនលំអៀងទៅលើបក្សពួក សាច់ញាតិ
ទី៣-គឺការពារច្បាប់ពីឥទ្ធិពលណាមករារាំងឱ្យបាននូវអ្វីដែលយើងបង្កើតឡើងឱ្យមានគុណតម្លៃ និង
ទី៤-ត្រូវចេះវាយតម្លៃឱ្យបានត្រឹមត្រូវនូវការអនុវត្តច្បាប់របស់យើង។
លោកបញ្ជាក់ថា ការសិក្សាថ្ងៃនេះខុសពីការសិក្សារបស់គ្រូបង្វឹក និងអាជ្ញាកណ្ដាល ។
លោកបានក្រើនរំលឹកដល់សិក្ខាកាមទាំងអស់ត្រូវតែខិតខំយកចិត្តទុកដាក់ និងមានវិន័យ ។ សព្វថ្ងៃនេះ អាជ្ញាកណ្ដាលអន្តរជាតិរបស់យើងនៅមិនទាន់មានកម្រិតខ្ពស់នោះទេ ដូច្នេះត្រូវតែប្រឹងប្រែងសិក្សាជាបន្តទៀត ដើម្បីឱ្យយើងមានចៅក្រម អាជ្ញាកណ្ដាលកម្រិតខ្ពស់ដែលជាថ្នាក់មួយអាចចាត់ចែងការប្រកួត និងរកឱ្យបានមុនការប្រកួតកីឡាស៊ីហ្គេមឆ្នាំ២០២៣ ព្រោះការប្រកួតកីឡាស៊ីហ្គេមឆ្នាំ២០២៣យើងត្រូវការចៅក្រមអាជ្ញាកណ្ដាលដែលមានកម្រិតខ្ពស់៕
ចែករំលែកព័តមាននេះ