រាជធានីភ្នំពេញ ៖ លោក វ៉ាត់ ចំរើន អនុរដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា(NOCC)បានមានប្រសាសន៍នៅក្នុងអង្គប្រជុំនៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីព្រឹកថ្ងៃទី១៩ កុម្ភៈ ឆ្នាំ២០១៨ ថា បុណ្យទន្លេលើកទី៤ នៅទន្លេបាសាក់ ក្រុងតាខ្មៅ ខេត្តកណ្តាល ឆ្នាំនេះ NOCC បានជ្រើសរើសប្រភេទកីឡាសំខាន់ៗចំនួន៩ប៉ុណ្ណោះចូលរួមដើម្បីបង្កើនបរិយាកាសទាក់ទាញមហាជនដែលមកលំហែក្នុងពិធីបុណ្យនេះបើតាមការប៉ាន់ស្មានមានប្រមាណជាង១លាននាក់។
ក្នុងនោះក៏មានការអញ្ជើញចូលរួមជាគណៈអធិបតីដ៏ខ្ពង់ខ្ពស់ពីសំណាក់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ដែលញ៉ាំងឱ្យកម្មវិធីនេះកាន់តែអធិកអធមថែមទៀត។
លោក វ៉ាត់ ចំរើន មានប្រសាសន៍បន្តថា បុណ្យទន្លឆ្នាំនេះមានរយៈពេល៣ថ្ងៃគឺចាប់ពីថ្ងៃទី៩ដល់១១ មីនា ។ ចំណែកកីឡាទាំង៩ប្រភេទដែលដាក់ឱ្យចូលរួមប្រកួតមាន ចំបាប់បុរាណ, រត់ប្រណាំង, ប្រណាំងកង់, ហែលទឹកឆ្លងទន្លេ, ប្រណាំងទូកង, ប្រដាល់, បាល់ទះ, ប៉េតង់ និងអុកចត្រង្គ ។ លោកបន្តថា ការដែលប្រមុខ NOCC ដាក់កីឡាចូលរួមប្រកួតនៅក្នុងព្រឹត្តិការណ៍បុណ្យទន្លេនេះ មានគោលដៅបង្កើនបរិយាសកាសឲ្យមហាជនបានចូលរួមប្រកួតសប្បាយរីករាយ ។ ពិសេសជាងនេះទៀតនោះ គឺបំផុសឲ្យយុវជននិងមហាជនបានយល់និងចូលរួមនៅក្នុងសកម្មភាពកីឡាក្នុងដំណើរឆ្ពោះទៅស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ ឲ្យស្របទៅតាមទិសដៅយុទ្ធសាស្ត្ររបស់កម្ពុជាប្រជាជនម្នាក់ចូលរួមស៊ីហ្គេម២០២៣ និងយុវជនម្នាក់ប្រកួតប្រជែងសមត្ថភាពត្រៀមឆ្ពោះស៊ីហ្គេម២០២៣។
លោកអះអាងទៀតថា បុណ្យទន្លេលើកទី៤ ឆ្នាំ២០១៨ការរៀបចំមានសភាពខុសប្លែកច្រើនពីបណ្តាឆ្នាំមុនៗដោយមានការដង្ហែព្យុហយាត្រាលើទឹកអមដោយការបាញ់កាំជ្រួចផងដែរ ។ លោកបន្ថែមថា បុណ្យទន្លេនៅក្រុងតាខ្មៅឆ្នាំនេះត្រូវបានគេប៉ាន់ប្រមាណថា យ៉ាងហោចមានប្រជាពលរដ្ឋចូលរួមពី១លានទៅ១លានកន្លះនាក់។
ជាមួយគ្នានេះលោកបានផ្ដាំផ្ញើដល់តំណាងប្រភេទកីឡានីមួយៗ ត្រូវត្រៀមខ្លួនឱ្យបានល្អ ព្រោះកម្មវិធីបុណ្យទន្លេឆ្នាំនេះមានលក្ខណៈពិសេសជាងឆ្នាំមុនៗ៕
ចែករំលែកព័តមាននេះ