រថយន្តប្រៀបដូចជាមិត្តម្នាក់ដែលតែងនាំលោកអ្នកទៅដល់គោលដៅគ្រប់ទីកន្លែង ដូច្នេះ អ្នកគួរតែថែទាំ និងយកចិត្តទុកដាក់ជាប្រចាំ ដើម្បីឲ្យវាបាននៅជាមួយអ្នករយៈពេលយូរ ។ បន្ទាប់ពីការថែទាំល្អហើយ ឥរិយាបថខ្លះដែលអ្នកធ្វេសប្រហែស ក៏អាចជាមូលហេតុធ្វើឲ្យរថយន្តខូច ឬអន់ថយសភាពយ៉ាងឆាប់រហ័សផងដែរ ព្រោះពេលខ្លះ ការបើកបររបស់អ្នកហាក់ដូចជាចិត្តក្តៅ និងធ្វើដោយមិនដឹងខ្លួន ។ វាអាចប៉ះពាល់ដល់រថយន្តដែលកំពុងប្រើប្រាស់ ហើយទោះបីជាមិនឃើញលទ្ធផលភ្លាមៗ ប៉ុន្តែវាអាចបង្កឲ្យកើតបញ្ហាធំនៅពេលក្រោយបាន ។
១-មិនបង្អង់ល្បឿន ខណៈបើកលើទួលឬគ្រលុក ៖
បើបើកបរជួបចំណុចខាងលើនេះ ហើយអ្នកមិនគិតជាន់ហ្វ្រាំង ឬបង្អង់ល្បឿនទេនោះ គឺផ្នែកខាងក្រោមនៃរថយន្តពិតជាខូចខាត ។ បើជារថយន្តមានបាតក្រោមកាន់តែទាប គឺកាន់តែខូចខ្លាំងឡើង ព្រោះវាអាចរបូតធ្លាក់ផ្នែកខ្លះ បន្ទាប់ពីត្រូវនឹងកម្លាំងខ្លាំង ។
២-បើកបរហួសកម្លាំងពេលគ្រឿងម៉ាស៊ីននៅត្រជាក់ ៖
ការបញ្ឆេះរថយន្ត មិនថាពេលណាក៏ដោយ ក្នុងខណៈគ្រឿងម៉ាស៊ីននៅត្រជាក់ (ជាពិសេស ពេលព្រឹក) ហើយអ្នកបានបង្ខំល្បឿនបើករថយន្តចេញទៅយ៉ាងរហ័ស វានឹងធ្វើឲ្យខូចខាតដល់គ្រឿងម៉ាស៊ីន ព្រោះប្រព័ន្ធប្រេងរំអិលផ្សេងៗ (ប្រេងម៉ាស៊ីន, ប្រេងប្រអប់លេខ) មិនអាចរត់ទៅផ្នែកខាងក្នុងនៃគ្រឿងម៉ាស៊ីនទាន់ទេ ។ ដូច្នេះ អ្នកគួរតែពិនិត្យកំដៅម៉ាស៊ីនរថយន្តបន្តិចសិន រហូតដល់ប្រព័ន្ធប្រេងផ្សេងៗដំណើរការល្អ ចាំបើករថយន្តចេញ ។
៣-ទឹកលិចខ្លាំងប៉ុនណា ក៏នៅតែបន្តបើក ៖
នៅក្នុងរដូវភ្លៀង តំបន់ជាច្រើនតែងមានទឹកលិច ដែលអ្នកខ្លះអាចជៀសវាងមិនបាន ហើយចាំបាច់ត្រូវបើកឆ្លងកាត់ ប៉ុន្តែអ្នកខ្លះទៀតបែរជាគិតថារឿងសប្បាយរីករាយ ហើយបើកបរដោយមិនចាប់អារម្មណ៍សោះ ប៉ុន្តែការពិត អ្នកគួរជ្រើសរើសចំណុចដែលមានទឹកលិចតិចឬរាក់បំផុត ព្រោះបើសិនជាទឹកលិចខ្លាំង វាអាចត្រូវបានស្រូបចូលទៅគ្រឿងម៉ាស៊ីន ហើយអាចរាលដាលទៅដល់ប្រអប់លេខ ឬផ្នែកផ្សេងៗផងដែរ (បើកបរឆ្លងកាត់ទឹកលិចខ្លាំង គួរតែបិទម៉ាស៊ីនត្រជាក់ ព្រោះទឹកអាចធ្វើឲ្យខូចកង្ហារម៉ាស៊ីនត្រជាក់) ។
៤-ភ្លើងសញព្រមានបង្ហាញមក ក៏មិនចាប់អារម្មណ៍ ៖
បើភ្លើងសញ្ញាព្រមានបង្ហាញឡើងមកនៅលើតាប្លូហើយអ្នកមិនចាប់អារម្មណ៍ អ្នកត្រូវត្រៀមខ្លួនយកវាទៅជួសជុលឲ្យហើយទៅ ព្រោះការដែលភ្លើងសញ្ញាបង្ហាញនេះ មានន័យថា ប្រព័ន្ធគ្រឿងម៉ាស៊ីន និងប្រព័ន្ធសុវត្ថិភាពផ្សេងៗមានបញ្ហា ។ បញ្ហាខ្លះ បើអ្នកមានចំណេះដឹង គឺអាចដោះស្រាយដោយមិនលំបាក ប៉ុន្តែបើភ្លើងសញ្ញានេះបង្ហាញរូបគ្រឿងម៉ាស៊ីន អ្នកគួរតែប្រញាប់យករថយន្តទៅយានដ្ឋានជួសជុលភ្លាមៗ កុំទុកយូរពេក ព្រោះវាមានឱកាសខូចកាន់តែខ្លាំង ។
៥-ជាន់ហ្គែររហូតដល់កប់ៗជាញឹកញាប់ ៖
ពេលខ្លះ ការជាន់បង្កើនល្បឿនបែបធម្មតា ជារឿយៗអាចមិនទាន់ចិត្ត អីចឹង ធ្វើឲ្យមនុស្សជាច្រើនតែងបង្ខំល្បឿនខ្លាំងឡើង ឬជាន់កប់ៗដើម្បីឲ្យប្រអប់លេខផ្លាស់ប្តូរទៅលេខក្រោម ដូចជា ពីលេខ៣ ទៅលេខ២ ។ ការធ្វើបែបនេះអាចធ្វើឲ្យរថយន្តរបស់អ្នកស្ទុះទៅមុខយ៉ាងខ្លាំង ប៉ុន្តែវាក៏មានផលប៉ះពាល់មិនតិចដែរ ព្រោះស្ពឺចក្រក្នុងប្រអប់លេខត្រូវទទួលកម្លាំងកាន់តែខ្លាំងឡើង ដែលធ្វើឲ្យអាយុកាលប្រើប្រាស់របស់វាកាន់តែខ្លី និងឆាប់ខូចលើសដើម ។
ជាការពិត នៅមានឥរិយាបថជាច្រើនទៀតដែលមិនសមនឹងធ្វើជាមួយរថយន្ត បើសិនមិនចង់ឲ្យវាឆាប់ខូច ។ ហេតុនេះ អ្នកគួរបើកបររថយន្តដោយឈ្លៀសវៃ កុំគិតតែពីបើកទៅមុខបាន ។ ក្រៅពីនេះ កុំភ្លេចថែទាំ នៅពេលដល់ពេលពិនិត្យ ឬផ្លាស់ប្តូរផ្នែកផ្សេងៗ គួរធ្វើតាមការណែនាំយ៉ាងតឹងរ៉ឹងបំផុត ៕
ចែករំលែកព័តមាននេះ