ទីក្រុងវ៉ាស៊ីនតោន៖ បញ្ហាទំនាស់រវាងអាមេរិក និងវេណេហ្ស៊ូអេឡាហាក់ដូចជាបង្ហាញសញ្ញាកាន់តែមិនស្រួលមែនទែនហើយ ហើយអាចនឹងឈានដល់ការផ្ទុះសង្គ្រាមបង្ហូរឈាមគ្នា។ ខណៈនេះ អាមេរិកបង្កើនវត្តមានយោធារបស់ខ្លួនយ៉ាងសម្បើមនៅសមុទ្រការីប៊ីន (មិនឆ្ងាយប៉ុន្មានពីព្រំដែនវេណេហ្ស៊ូអេឡា)។ ជាពិសេសអាមេរិកដាក់ពង្រាយសុទ្ធតែយន្តហោះចម្បាំង និងនាវាដឹកយន្តហោះខ្នាតធំថែមទៀតផង។ ប្រភពខ្លះបង្ហើបឱ្យដឹងថានៅសប្ដាហ៍នេះ អាមេរិកកោះប្រជុំមន្ត្រីកំពូលៗចំនួនបីលើកនៅសេតវិមានដើម្បីពិគ្រោះគ្នាអំពីការត្រៀមប្រតិបត្តិការសឹកនៅវេណេហ្ស៊ូអេឡា។
លោកដូណាល់ត្រាំបានបញ្ជូនយន្តហោះចម្បាំងម៉ាកអែហ្វ៣៥ (F-35), នាវាចម្បាំងខ្នាតធំ និងនាវាមុជទឹកនុយក្លេអ៊ែរទៅតំបន់នោះរួចជាស្រេច។ នេះជាការរៀបចំកម្លាំងយោធាក្រោយការបើកយុទ្ធនាការបាញ់ប្រហារទូកសង្ស័យដឹកគ្រឿងញៀនចេញពីវេណេហ្ស៊ូអេឡាយ៉ាងតិចម្ភៃករណី។ កាលពីដើមសប្ដាហ៍នេះ នាវាដឹកយន្តហោះរបស់អាមេរិកម៉ាកយូអែសអែស ជើរ៉លហ្វត (USS Gerald Ford) បានបើកចូលតំបន់អាមេរិកឡាទីន ដោយពាំនាំទៅជាមួយនូវយន្តហោះ៧៥គ្រឿង និងទាហានជាង៥ពាន់នាក់។
កាលពីយប់មិញ លោកត្រាំថ្លែងប្រាប់អ្នកសារព័ត៌មានថានៅក្នុងពេលឆាប់ៗនេះ លោកនឹងសម្រេចចិត្តថាតើត្រូវបើកប្រតិបត្តិការវាយប្រហារទៅលើប្រទេសវេណេហ្ស៊ូអេឡា ឬយ៉ាងណាព្រោះរដ្ឋាភិបាលប្រទេសនេះត្រូវលោកចោទប្រកាន់ថារកស៊ីជាមួយក្រុមជួញដូរគ្រឿងញៀនដែលលោកចាត់ទុកជាក្រុមភេរវកម្មគ្រឿងញៀន។ មន្ត្រីរដ្ឋាភិបាលអាមេរិកបួននាក់ និងប្រភពមួយទៀតដែលដឹងរឿងនេះច្បាស់បានបង្ហើបឱ្យដឹងថាកិច្ចប្រជុំក្រុមប្រឹក្សាសន្តិសុខមាតុភូមិបានរៀបចំឡើងនៅសប្ដាហ៍នេះ។ ក្នុងនោះ កិច្ចប្រជុំថ្មីបំផុតធ្វើឡើងកាលពីថ្ងៃសុក្រ។
ជានិច្ចកាល ក្រុមប្រឹក្សានេះជាអ្នកផ្ដល់យោបល់ជូនប្រធានាធិបតីអាមេរិកអំពីបញ្ហានានាពាក់ព័ន្ធនឹងសន្តិសុខផ្ទៃក្នុងជាតិ។ បច្ចុប្បន្ន ប្រធានក្រុមប្រឹក្សានេះគឺលោកស្ទីហ្វឹន មីឡឺ (Stephen Miller) ក្នុងនាមជាទីប្រឹក្សាសន្តិសុខមាតុភូមិរបស់លោកត្រាំ។ កាលពីថ្ងៃពុធ គេបានរៀបចំកិច្ចប្រជុំខ្នាតតូចបន្ទាប់ពីមានកិច្ចប្រជុំធំដែលចូលរួមសុទ្ធតែមន្ត្រីកំពូលៗដូចជាអនុប្រធានាធិបតី, ទីប្រឹក្សាសន្តិសុខមាតុភូមិ, រដ្ឋមន្ត្រីការពារជាតិ និងនាយអគ្គសេនាធិការកងទ័ពជាដើម។
លោកត្រាំឱ្យតម្រុយថាអាចនឹងមានការវាយប្រហារទ័ពជើងគោកចូលវេណេហ្ស៊ូអេឡា។ លោកបញ្ជាក់ថាលោកគ្មានបំណងផ្លាស់ប្ដូររបបដឹកនាំនៅប្រទេសនេះទេ។ ប៉ុន្តែប្រធានាធិបតីវេណេហ្ស៊ូអេឡា លោកម៉ាឌូរ៉ូ នៅតែសង្ស័យថាលោកត្រាំចង់ផ្ដួលរំលំគាត់ពីអំណាច។ កាលពីខែសីហា អាមេរិកប្រកាសផ្ដល់ប្រាក់រង្វាន់ច្រើនលើសមុនទ្វេដងសម្រាប់អ្នកដែលផ្ដល់ព័ត៌មាននាំទៅដល់ការចាប់ខ្លួនលោកម៉ាឌូរ៉ូ។ ពោលគឺប្រាក់រង្វាន់ត្រូវបានដំឡើងដល់៥០លានដុល្លារអាមេរិក។ នេះបើយោងតាមប្រភពពីឆេនណល ញូស៍ អេស៊ា (Channel News Asia)៕
ចែករំលែកព័តមាននេះ