រាជធានីភ្នំពេញ ៖ រដ្ឋមន្ត្រីសុខាភិបាល បានគូសបញ្ជាក់ថា គ្រូពេទ្យវះកាត់ ជាស្នូលមួយ នៃការព្យាបាលបានជាដាច់ស្រឡះពីជំងឺមហារីក ដែលជាដំណើរសង្គ្រោះជីវិតមនុស្សមានប្រសិទ្ធិភាព ។ ការលើកឡើងរបស់ឯកឧត្តមសាស្ត្រាចារ្យ…
រាជធានីភ្នំពេញ ៖ រដ្ឋមន្ត្រីសុខាភិបាល បានគូសបញ្ជាក់ថា គ្រូពេទ្យវះកាត់ ជាស្នូលមួយ នៃការព្យាបាលបានជាដាច់ស្រឡះពីជំងឺមហារីក ដែលជាដំណើរសង្គ្រោះជីវិតមនុស្សមានប្រសិទ្ធិភាព ។
ការលើកឡើងរបស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញជាអធិបតី ក្នុងពិធីបើកសន្និសីទសល្យសាស្ត្រកម្ពុជាប្រចាំឆ្នាំ លើកទី៣០ ក្រោមប្រធានបទ «ភាពប្រឈម នៃការវះកាត់ជំងឺមហារីក» ថ្ងៃថ្ងៃទី១៥ ខែវិច្ឆិកា ឆ្នាំ២០២៥ ។
សន្និសីទនាថ្ងៃនេះ ក្រោមប្រធានបទ «ភាពប្រឈម នៃការវះកាត់ជំងឺមហារីក» ឆ្លើយតបទៅនឹងផែនការជាតិប្រយុទ្ធនឹងជំងឺមហារីក ឆ្នាំ២០២៥-២០៣០ និងការប្រយុទ្ធនឹងជំងឺមិនឆ្លង ដែលជាការឆ្លើយតបដ៏សំខាន ចំពោះការកើនឡើងនៃបន្ទុកជំងឺមហារីក ដែលជាមូលហេតុចម្បងមួយ នៃមរណភាពមុនអាយុ រំពឹងរស់របស់ប្រជាជនកម្ពុជា ។
រាជរដ្ឋាភិបាលកម្ពុជា បេ្តជ្ញាចិត្តយ៉ាងមុតមាំ ក្នុងការប្រយុទ្ធនឹងជំងឺមហារីក តាមរយៈការលើកកម្ពស់ការយល់ដឹងពីជំងឺនេះ និងពង្រីកសេវាបង្ការ ព្យាបាល ថែទាំ ប្រកបដោយគុណភាព ដើម្បីការពារប្រជាជនពីជំងឺមហារីក ដែលអាចបង្ការបាន និងកាត់បន្ថយទុក្ខលំបាក ព្រមទាំងបង្កើនគុណភាពជីវិតរបស់អ្នកជំងឺ និងក្រុមគ្រួសារ ។
ថ្លែងក្នុងឱកាសនោះ ឯកឧត្តមសាស្ត្រាចារ្យរដ្ឋមន្ត្រី បានគូសរំលេច និងផ្តោតសំខាន់ ដែលត្រូវយកចិត្តទុកដាក់ខ្ពស់ ៖ ១. ការប្រើប្រាស់សេវាផ្នែកមហារីកនេះ ប្រកបដោយឧត្តមគតិ សមធម៌ និងក្រមសីលធម៌វិជ្ជាជីវៈ ។
២. ពង្រឹងឱ្យកាន់តែប្រសើរឡើង នូវហេដ្ឋារចនាសម្ព័ន្ធ បច្ចេកវិទ្យា ឧបករណ៍សម្ភារៈទំនើប ការបញ្ជូនចំគោលដៅនិងទាន់ពេលវេលា ការធ្វើរោគវិនិច្ឆ័យនិងព្យាបាលបានត្រឹមត្រូវ ។
៣. គុណភាព និងសុវត្ថិភាព នៃការព្យាបាល ត្រូវមានស្តង់ដាត្រឹមត្រូវ
៤. ពង្រីកការព្យាបាលតាមមន្ទីរពេទ្យគ្រប់កម្រិត និងពង្រឹងការបណ្តុះបណ្តាល ប្រព័ន្ធការកត់ត្រាព័ត៌មាន។
ទន្ទឹមនឹងនេះដែរ ឯកឧត្តមសាស្ត្រាចារ្យរដ្ឋមន្ត្រី បានផ្តល់អនុសាសន៍សំខាន់ៗ មួយចំនួន ដល់អង្គពិធី ដូចខាងក្រោម៖
-គ្រូពេទ្យវះកាត់ទាំងអស់ ត្រូវខិតខំរៀនសូត្រ ហ្វឹកហាត់ការងារជាប់ជាប្រចាំ និងមានសាមគ្គីភាព និងសហការគ្នា។
-ជោគជ័យនៃការវះកាត់ គឺលទ្ធផលចុងក្រោយ ដែលអ្នកជំងឺជាសះស្បើយ តាមពេលវេលាសមស្របជាមួយសុវត្ថិភាព គុណភាព នៃជីវិតល្អប្រសើរ។ ដូច្នេះ ត្រូវគិតគូឱ្យបានសព្វគ្រប់ទាំង មុនពេលវះកាត់ ពេលកំពុងវះកាត់ និងក្រោយពេលវះកាត់ ។
-ការវះកាត់ ដែលមានសុវត្ថិភាពខ្ពស់ និងតម្លៃសមស្រប គឺជាគោលនយោបាយមួយសំខាន់របស់ WHO និងក្រសួងសុខាភិបាល និងរាជរដ្ឋាភិបាល។ សុវត្ថិភាព និងតម្លៃសមស្រប ដោយមិនមានការលំបាកផ្នែកហិរញ្ញវត្ថុ គឺជាការចូលរួមសម្រេចបាននូវផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកល។
-ត្រូវអនុវត្តឱ្យបានច្បាស់លាស់ពេញលេញ បញ្ជីផ្ទៀងផ្ទាត់សុវត្ថិភាពវះកាត់ ដែលជាការរួមចំណែកកាត់បន្ថយកំហុស និងគ្រោះថ្នាក់បានខ្ពស់បំផុត ។
ជាទីបញ្ចប់ ឯកឧត្តមសាស្ត្រាចារ្យរដ្ឋមន្ត្រី បានណែនាំដល់សិក្ខាសាលានាពេលនេះ ត្រូវខឹតខំពិភាក្សា បញ្ចេញមតិ ឆ្លុះបញ្ចាំង និងផ្លាស់ប្តូរយោបល់គ្នា ដើម្បីបង្កើននូវចំណេះដឹង និងបទពិសោធន៍ថ្មីៗ ជាច្រើនបន្ថែមទៀត ដែលជាគុណប្រយោជន៍ សម្រាប់បង្កើនគុណភាពសេវាព្យាបាលជូនប្រជាពលរដ្ឋ។
ក្នុងពិធីនេះដែរ ក៏មានការចូលរួមពី លោកសាស្ត្រាចារ្យ តំណាងបណ្ឌិតសភា វះកាត់នៃប្រទេសបារាំង និងឯកឧត្តម លោកជំទាវ ថ្នាក់ដឹកនាំក្រសួង លោក លោកស្រី នាងកញ្ញា សាស្ត្រាចារ្យ ប្រធានសមាគមសល្យសាស្ត្រកម្ពុជា ប្រធានសន្និសីទសល្យសាស្ត្រប្រចាំឆ្នាំលើកទី៣០ ភ្ញៀវកិត្តិយសជាតិ និងអន្តរជាតិ សមាជិក សមាជិកា សរុបចំនួន ២៤០នាក់៕
ចែករំលែកព័តមាននេះ