ខេត្តប៉ៃលិន ៖ បើតាមប្រសាសន៍របស់នាយឧត្តមសេនីយ៍ អ៊ី ឈាន ទេសរដ្ឋមន្ត្រីទទួលបន្ទុកបេសកកម្មពិសេសបានថ្លែងបញ្ជាក់ថា នៅតាមបន្ទាត់ព្រំដែនកម្ពុជា-ថៃ ក្នុងខេត្តប៉ៃលិនមិនទាន់មានឡើងកម្ដៅខ្លាំងគួរឱ្យកត់សម្គាល់នៅឡើយទេ។ ដូច្នេះ កងកម្លាំងនៅតែរក្សាភាពស្ងប់ស្ងាត់ដដែល…
ខេត្តប៉ៃលិន ៖ បើតាមប្រសាសន៍របស់នាយឧត្តមសេនីយ៍ អ៊ី ឈាន ទេសរដ្ឋមន្ត្រីទទួលបន្ទុកបេសកកម្មពិសេសបានថ្លែងបញ្ជាក់ថា នៅតាមបន្ទាត់ព្រំដែនកម្ពុជា-ថៃ ក្នុងខេត្តប៉ៃលិនមិនទាន់មានឡើងកម្ដៅខ្លាំងគួរឱ្យកត់សម្គាល់នៅឡើយទេ។ ដូច្នេះ កងកម្លាំងនៅតែរក្សាភាពស្ងប់ស្ងាត់ដដែល ប៉ុន្តែរង់ចាំស្ដាប់ទទួលបទបញ្ជាពីរដ្ឋាភិបាល និងអគ្គមេបញ្ជាការ ជាមួយនឹងការតាំងចិត្តខ្ពស់ក្នុងការការពារប្រទេសជាតិ និងប្រពលរដ្ឋកម្ពុជា។
ឯកឧត្តម អ៊ី ឈាន ដែលជាប្រធានក្រុមការងាររាជរដ្ឋាភិបាលចុះមូលដ្ឋានខេត្តប៉ៃលិន បានលើកឡើងដូច្នេះ នៅក្នុងពេលដែលឯកឧត្តម និងលោកជំទាវ បាន ស្រីមុំ អភិបាលខេត្តប៉ៃលិន បានចុះសួរសុខទុក្ខ និងលើកទឹកចិត្តដល់កងកម្លាំងឈរជើងនៅព្រំដែនខេត្តប៉ៃលិន កាលថ្ងៃទី១៤ ខែវិច្ឆិកា ឆ្នាំ២០២៥។
ប្រភពព័ត៌មានបានឱ្យដឹងថា នាយឧត្ដមសេនីយ៍ អ៊ី ឈាន ដែលធ្លាប់មានបទពិសោធន៍ដ៏ស្ទាត់ជំនាញទៅលើការបញ្ជាកងទ័ពនៅខេត្តប៉ៃលិន ក៏បានថ្លែងលើកដូច្នេះថា ៖ «បច្ចុប្បន្ននេះ សភាពការណ៍នៅតាមបន្ទាត់ព្រំដែនកម្ពុជា-ថៃ ក្នុងភូមិសាស្ត្រខេត្តប៉ៃលិន មានស្ថានភាពធម្មតា និងល្អប្រសើរ ដោយមិនមានឡើងកម្តៅខ្លាំង ដូចនៅតាមបន្ទាត់ព្រំដែនកម្ពុជា-ថៃ ក្នុងខេត្តនានាមួយចំនួន ដូចជាខេត្តព្រះវិហារ, ខេត្តឧត្តរមានជ័យ និងខេត្តបន្ទាយមានជ័យនោះទេ។
ប៉ុន្តែកងកម្លាំងប្រដាប់អាវុធទាំងអស់បានរក្សានូវភាពស្ងៀមស្ងាត់ គឺរង់ចាំស្តាប់នូវបទបញ្ជា និងគោលការណ៍ពីថ្នាក់លើ គឺមេបញ្ជាការ និងប្រមុខរាជរដ្ឋាភិបាល ហើយបានតាំងចិត្តយ៉ាងមុតមាំ និងត្រៀមលក្ខណៈសម្បត្តិរួចជាស្រេច សម្រាប់បេសកកម្មបម្រើជាតិមាតុភូមិ និងប្រជាជនខ្មែរ»។
ប្រភពដដែលបានបន្ថែមថា នាយឧត្តមសេនីយ៍ អ៊ី ឈាន បានបណ្ដុះទឹកចិត្តស្នេហាជាតិ និងត្រូវហ៊ានពលីបូជាជីវិត ដើម្បីការពារជាតិ និងទឹកដីរបស់ខ្លួនឱ្យបានគង់វង់ ខណៈដែលខ្មាំងសត្រូវកំពុងតែធ្វើការឈ្លានពានឥតឈប់ឈរ ។
នាយឧត្ដមសេនីយ៍ អ៊ី ឈាន បានសង្កត់ធ្ងន់ដែរថា ៖ « បើជាតិមានឧបសគ្គ យើងជាមេទ័ព ត្រូវតែហ៊ានលះបង់បូជាជីវិតមុនយុវជនរបស់យើង ដើម្បីបង្ហាញពីភាពរឹងមាំ ការស្នេហាជាតិ ស្នេហាមាតុភូមិ ទឹកដីរបស់យើងឱ្យបានគង់វង់ដរាបតទៅ។ ខ្ញុំសុខចិត្តស្លាប់មុនជាតិ ដើម្បីជាតិមានសេចក្ដីសុខ ព្រោះបើជាតិស្លាប់មុនយើង តើយើងរស់នៅមានតម្លៃអ្វីទៀត?»។
ប្រភពបញ្ជាក់ទៀតថា នៅក្នុងឱកាសនោះ នាយឧត្តមសេនីយ៍ អ៊ី ឈាន ក៏បានកោតសរសើរ និងវាយតម្លៃខ្ពស់ ចំពោះសមិទ្ធផលទាំងឡាយ ដែលនាយទាហាន និងពលទាហាន គ្រប់បណ្ដាអង្គភាពទាំងអស់សម្រេចបាន ក្នុងបុព្វហេតុការពារជាតិ មាតុភូមិ និងប្រជាជន ជាពិសេសចំពោះវីរភាពយ៉ាងអង់អាចក្លាហាន ស្មោះត្រង់ លះបង់សាច់ស្រស់ ឈាមស្រស់ និងការខិតខំប្រឹងប្រែងកសាង និងអភិវឌ្ឍគ្រប់ហេដ្ឋារចនាសម្ព័ន្ធ ធនធានសេដ្ឋកិច្ច ជូនកងទ័ព និងគ្រួសារកងទ័ពឱ្យរស់រានមានជីវិតល្អប្រសើរ ស្របតាមគោលនយោបាយរបស់រាជរដ្ឋាភិបាល និងការកសាងនូវប្រព័ន្ធយុទ្ធសាស្ត្រការពារជាតិរឹងមាំនានាជាច្រើនទៀត ដើម្បីបុព្វហេតុបម្រើ និងការពារអធិបតេយ្យ បូរណភាពទឹកដី ទុកជាកេរ្ត៍ប្រវត្តិសាស្ត្រ ជូនកូនចៅជំនាន់ក្រោយ។
ហើយក្នុងឱកាសនោះ នាយឧត្ដមសេនីយ៍ អ៊ី ឈាន និងលោកជំទាវ បាន ស្រីមុំ ក៏បានផ្តល់អំណោយរថយន្តចំនួន០៣គ្រឿង ទោចក្រយានយន្ត ចំនួន២១គ្រឿង រួមទាំងសម្ភារៈបរិក្ខា ស្បៀងអាហារ និងថរិកា ជូនដល់បណ្តាអង្គភាពកងកំលាំងជួរមុខ ដែលកំពុងតែឈរជើងការពារបូរណភាពទឹកដី នៅតាមបន្ទាត់ព្រំដែន និងកម្លាំងចល័ត អន្តរាគមន៍ការពារសន្តិសុខសណ្តាប់ធ្នាប់តាមមូលដ្ឋាន គ្រប់អង្គភាព នៃកងកម្លាំងចម្រុះគណៈបញ្ជាការខេត្តប៉ៃលិនផងដែរ៕
ចែករំលែកព័តមាននេះ