ខេត្តសៀមរាប ៖ នៅវេលាម៉ោង០៧និង៤០នាទីយប់ថ្ងៃសុក្រ ទី៩ ខែមករា ឆ្នាំ២០២៦ ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់នាយឧត្ដមសេនីយ៍ ស ថេត អគ្គស្នងការនគរបាលជាតិ…
ខេត្តសៀមរាប ៖ នៅវេលាម៉ោង០៧និង៤០នាទីយប់ថ្ងៃសុក្រ ទី៩ ខែមករា ឆ្នាំ២០២៦ ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់នាយឧត្ដមសេនីយ៍ ស ថេត អគ្គស្នងការនគរបាលជាតិ ដឹកនាំបញ្ជាផ្ទាល់ដោយលោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប និងមានការសម្របសម្រួលនីតិវិធីដោយលោក សៀង សុខ ព្រះរាជអាជ្ញា នៃអយ្យការអមសាលាដំបូងខេត្ត លោកឧត្តមសេនីយ៍ត្រី សឿន សេន ស្នងការរង ទទួលផែននគរបាលប្រឆាំងបទល្មើសសេដ្ឋកិច្ច ដឹកនាំកម្លាំងជំនាញ សហការជាមួយ កម្លាំងមូលដ្ឋានស្រុក ចុះបង្ក្រាបរថយន្ត២គ្រឿង ដឹកលៀសខុសច្បាប់ ប្រមាណជា២៨ តោន ស្ថិតក្នុងស្រុកជីក្រែង និងស្រុកសូទ្រនិគម ចំនួន០២ករណី មានដូចខាងក្រោម ៖
ករណី១ ៖ ជនសង្ស័យឈ្មោះ ភី សុភក្រ័ ភេទប្រុស អាយុ ៣៦ឆ្នាំ សញ្ជាតិខ្មែរ ដឹកជញ្ជូន លៀសគ្មានលិខិតអនុញ្ញាត ដោយរថយន្តម៉ាក សាំយ៉ុង ពណ៌បៃតង ពាក់ស្លាកលេខ ភ្នំពេញ 2H.3460 រស់នៅភូមិក្រចាប សង្កាត់ព្រៃខ្លា ស្រុកស្វាយអន្ទរ ខេត្តព្រៃវែង ក្នុងនោះសមត្ថកិច្ចយើងបានរកឃើញលៀសចំនួន ១៥០ប៉េ ស្មើនឹង ៧,៥០០ គីឡូក្រាម ។
ករណី២ ៖ រថយន្តម៉ាក អ៊ីស៊ុយស៊ុយ (ISUZU) ពណ៌ផ្ទៃមេឃ ពាក់ស្លាក់លេខ ចង្កូតស្តាំ KCHH.0056 និងមានស្លាកលេខភ្នំពេញ 3B.0930 (មិនប្រក្រតី) នៅលើរថយន្តថែមទៀត ដឹកលៀសគ្មានលិខិតអនុញ្ញាតចំនួន ២១,២៥០ គីឡូក្រាម (ម្ចាស់រថយន្តរត់គេចខ្លួនបាត់) ។
វត្ថុតាងដកហូតរួមមាន៖
-លៀស ចំនួន ២៨៧៥០ គីឡូក្រាម
-មធ្យោបាយដឹកជញ្ជូនចំនួន ០២គ្រឿងខាងលើ ។
បច្ចុប្បន្ន ជនសង្ស័យ និងវត្ថុតាងដកហូតខាងលើ ត្រូវបានសមត្ថកិច្ចជំនាញបានកសាងសំណុំរឿងបញ្ជូនទៅកាន់មន្ត្រីជំនាញខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ដើម្បីអនុវត្តទៅតាមនីតិវិធីបន្ត ។ លៀសប្រមាណជិត២៩តោន ត្រូវបានក្រុមមន្ត្រី ប្រលែងចូលបឹងទន្លេសាបវិញ ក្រោយពីបានរឹបអូសក្នុងប្រតិបត្តិការបង្ក្រាបកាលពីយប់មិញ ៕
ចែករំលែកព័តមាននេះ