ខេត្តកំពង់ចាម ៖ មានករណីអគ្គីភ័យឆាបឆេះបានកើតឡើងនៅវេលាម៉ោង៨និង៥០នាទីព្រឹកថ្ងៃទី ២៥ឧសភាឆ្នាំ២០២៦ នៅភូមិអណ្ដូងច្រុះ ឃុំអំពិល ស្រុកកំពង់សៀម។ នៅក្នុងប្រតិបត្តិការបាញ់ទឹកពន្លត់ភ្លើងគឺមានរថយន្តពន្លត់អគ្គីភ័យចំនួន៦គ្រឿងបានព្យាយាមបាញ់ពន្លត់ភ្លើង ដើម្បីកុំឲ្យឆាបឆេះបន្តទៅដល់លំនៅឋានផ្សេងទៀត។ ហើយនៅក្នុងហេតុការណ៍នោះក៏មានវត្តមានឯកឧត្តមអ៊ុន…
ខេត្តកំពង់ចាម ៖ មានករណីអគ្គីភ័យឆាបឆេះបានកើតឡើងនៅវេលាម៉ោង៨និង៥០នាទីព្រឹកថ្ងៃទី ២៥ឧសភាឆ្នាំ២០២៦ នៅភូមិអណ្ដូងច្រុះ ឃុំអំពិល ស្រុកកំពង់សៀម។ នៅក្នុងប្រតិបត្តិការបាញ់ទឹកពន្លត់ភ្លើងគឺមានរថយន្តពន្លត់អគ្គីភ័យចំនួន៦គ្រឿងបានព្យាយាមបាញ់ពន្លត់ភ្លើង ដើម្បីកុំឲ្យឆាបឆេះបន្តទៅដល់លំនៅឋានផ្សេងទៀត។
ហើយនៅក្នុងហេតុការណ៍នោះក៏មានវត្តមានឯកឧត្តមអ៊ុន ចាន់ដាអភិបាលខេត្តបានអញ្ជើញចុះពិនិត្យឱ្យសមត្ថកិច្ចយកចិត្តទុកដាក់ប្រឹងប្រែងខិតខំពន្លត់ភ្លើងរហូតដល់រលត់ជាស្ថាពរ។
អ្នកស្រីគីម រ៉ាវុធ អាយុ៥៦ឆ្នាំ បម្រើការងារនៅសាលាស្រុកកំពង់សៀម បានរៀបរាប់ប្រាប់ឲ្យដឹងថា: គ្រាដែលភ្លើងឆេះចេញពីផ្ទះឈើមួយកន្លែងរបស់ឈ្មោះស្រៀង ដោយបានឆេះទៅខ្លាំងឡើងៗ រាលដាលមកដល់ផ្ទះចំនួន២នៅសង្ខាងក្នុងនោះមានផ្ទះម្ដាយគាត់ឈ្មោះសារូអាយុ៧២ឆ្នាំ ដោយត្រូវបានភ្លើងឆេះឡើងខ្លោចជញ្ជាំងក្តារ តែសំណាងណាស់បានរថយន្តពន្លត់អគ្គីភ័យទី២ បានចេញមកអន្តរាគមន៍បាញ់ទឹកលើផ្ទះម្ដាយរបស់គាត់ ដោយមិនឲ្យភ្លើងឆេះនោះទេ។
អ្នកស្រីគីម រ៉ាវុធ បានប្រាប់បន្តឲ្យដឹងទៀតថា គ្រាន់តែប្អូនបានទូរសព្ទប្រាប់ចប់ក៏ប្រញាប់ជិះម៉ូតូមកកាន់ផ្ទះឈើរបស់គាត់ដែលនៅជាប់និងផ្ទះម្ដាយឈ្មោះសារូ ចំណែកនៅលើផ្លូវជាតិលេខ ៧ឃើញមានរថយន្តពន្លត់អគ្គីភ័យជាច្រើនគ្រឿងបានចេញមកប្រតិបត្តិការបាញ់ទឹកពន្លត់ភ្លើងជាបន្តបន្ទាប់។ផ្ទះរបស់គាត់ពិតជាសំណាងណាស់ដោយសារតែមានកិច្ចសហការយ៉ាងសស្រាក់ស្រាំរវាងប្រជាពលរដ្ឋនិងកម្លាំងសមត្ថកិច្ចបានសាមគ្គីគ្នាជួយអន្តរាគមន៍បាញ់ទឹករហូតដល់ភ្លើងបានរលត់ ។ជាមួយនោះស្ត្រីម្ចាស់ផ្ទះឈ្មោះស្រៀង ដែលនៅជាប់នឹងផ្ទះម្ដាយរបស់គាត់ដោយសារតែភ្លើងឆេះផ្ទះអស់សង្វេគក្នុងចិត្តពេករហូតដល់សន្លប់។
ក្នុងនាមពលរដ្ឋម្នាក់ជាម្ចាស់ផ្ទះសូមថ្លែងអំណរគុណដល់បងប្អូននិងសមត្ថកិច្ចដែលបានជួយសង្គ្រោះបាញ់ទឹកមិនបានធ្វើឲ្យផ្ទះរបស់គាត់ក្លាយជាចំណីភ្លើង។
សមត្ថកិច្ចវិញបានប្រាប់ឲ្យដឹងដែរថាអគ្គីភ័យត្រូវបានរលត់១០០% នៅវេលាម៉ោង ៩និង៤០នាទីព្រឹកថ្ងៃដដែល(២៥ឧសភា) ដោយកម្លាំងដោយមានកម្លាំងអន្តរាគមន៍ស្រុកកំពង់សៀម កម្លាំងប៉ុស្តិ៍នគរបាលរដ្ឋបាល និងប្រជាការពារជាជំនួយធ្វើការពន្លត់អោយរលត់ជាស្ថាពរ ។
ប្រើប្រាស់ឡានពន្លត់អគ្គីភ័យ ចំនួន ០៦គ្រឿង -ឡានពន្លត់អគ្គីភ័យរបស់ស្នងការដ្ឋាននគរបាលខេត្តកំពង់ចាម ៣គ្រឿង ឡានពន្លត់អគ្គីភ័យរបស់អធិការដ្ឋាននគរបាលស្រុកកំពង់សៀម ២គ្រឿង ឡានពន្លត់អគ្គីភ័យរបស់អធិការដ្ឋាននគរបាលស្រុកព្រៃឈរ ១គ្រឿង ប្រើប្រាស់ទឹកអស់ ១២ស៊ីទែន ។ចំពោះផ្ទះដែលត្រូវខូចខាតក្នុងនោះមាន: ម្ចាស់ផ្ទះទី១ឈ្មោះ សុំ ពេជ្រ ភេទប្រុស អាយុ ៦៣ ឆ្នាំ ។
ករណីនេះបណ្ដាលឱ្យខូចខាតផ្ទះមានទំហំទទឹង ៦x១២ម៉ែត្រ មូលហេតុ :ឆ្លងចរន្តអគ្គិសនី។
ករណីនេះបានរៀលដាលដល់ផ្ទះអ្នកជិតខាងចំនួន ២ផ្ទះម្ចាស់ផ្ទះទី២ឈ្មោះ ស៊ឹង ស្រី ភេទស្រី អាយុ ៥៣ ឆ្នាំ បណ្ដាលឱ្យខូចខាតផ្ទះមានទំហំទទឹង៧ម៉ែត្រ x ១២ម៉ែត្រនិងម្ចាស់ផ្ទះឈ្មោះ អោក សារ៉ូ ភេទស្រី អាយុ ៧២ ឆ្នាំ បណ្ដាលឱ្យខូចខាតផ្ទះមានទំហំទទឹង ៤ម៉ែត្រ x៥ ម៉ែត្រ (ឆេះឡាបជញ្ជាំង១ម៉ែត្រ)។ក្នុងប្រតិបត្តិការបាញ់ទឹកពន្លត់ភ្លើងឆេះលំនៅថានេះដឹកនាំដោយលោកឧត្តមសេនីយ៍ត្រីមិនសុគន្ធវិបុលស្នងការរងនគរបាលខេត្តទទួលផែនអគ្គីភ័យ ៕
ចែករំលែកព័តមាននេះ