អន្តរជាតិ ៖ តម្លៃប្រេងឆៅអន្តរជាតិនៅថ្ងៃទី២៥ ខែឧសភា ឆ្នាំ២០២៦ បានធ្លាក់ចុះរហូតដល់ ៦% ដែលជាកម្រិតទាបបំផុតនៅក្នុងរយៈពេល២សប្តាហ៍ មកជាមួយសុទិដ្ឋិនិយមកាន់តែខ្ពស់ថា សហរដ្ឋអាមេរិក…
អន្តរជាតិ ៖ តម្លៃប្រេងឆៅអន្តរជាតិនៅថ្ងៃទី២៥ ខែឧសភា ឆ្នាំ២០២៦ បានធ្លាក់ចុះរហូតដល់ ៦% ដែលជាកម្រិតទាបបំផុតនៅក្នុងរយៈពេល២សប្តាហ៍ មកជាមួយសុទិដ្ឋិនិយមកាន់តែខ្ពស់ថា សហរដ្ឋអាមេរិក និងអ៊ីរ៉ង់ កំពុងតែខិតជិតទៅដល់សម្រេចកិច្ចព្រមព្រៀងសន្តិភាព ទោះបីជាភាគីទាំងពីរនៅតែមិនទាន់ត្រូវរ៉ូវគ្នាលើបញ្ហាសំខាន់ៗមួយចំនួនយ៉ាងណាក៏ដោយ។ នេះបើយោងតាមប្រភពពី Reuters បានចេញផ្សាយ។
តម្លៃប្រេងឆៅ Brent ស្តង់ដាពិភពលោកបានធ្លាក់ចុះរហូតដល់ ៥,៨៥ ដុល្លារអាមេរិក ឬ ៥,៧% មកនៅត្រឹម ៩៧,៦៩ ដុល្លារក្នុង១បារ៉ែល គិតត្រឹមម៉ោង ១ រសៀល (ម៉ោងនៅកម្ពុជា) ខណៈដែលប្រេងឆៅ West Texas Intermediate របស់សហរដ្ឋអាមេរិកមានតម្លៃ ៩០,៨៥ ដុល្លារក្នុង១បារ៉ែល ធ្លាក់ចុះ ៥,៧៥ ដុល្លារ ឬ ៦%។ កិច្ចសន្យាជួញដូរទាំងពីរបានឈានដល់កម្រិតទាបបំផុត ចាប់តាំងពីថ្ងៃទី៧ ខែឧសភា ឆ្នាំ២០២៦។
កាលពីថ្ងៃទី២៣ ខែឧសភា ឆ្នាំ២០២៦ (ម៉ោងនៅសហរដ្ឋអាមេរិក) លោកប្រធានាធិបតី ដូណាល់ ត្រាំ (Donald Trump) បានប្រកាសថា សហរដ្ឋអាមេរិក និងអ៊ីរ៉ង់បានចរចាជាចម្បងពីការយោគយល់គ្នាលើកិច្ចព្រមព្រៀងសន្តិភាព ដែលនឹងបើកច្រកសមុទ្រហ័រមូសឡើងវិញ។ ប៉ុន្តែទោះយ៉ាងណាក៏ដោយ ភាគីទាំងពីរនៅតែមានភាពមិនចុះសម្រុងគ្នាលើបញ្ហាលំបាកជាច្រើន ដោយលោក ត្រាំ កាលពីថ្ងៃទី២៤ ខែឧសភា បានបញ្ជាក់ថា លោកបានប្រាប់តំណាងរបស់លោក កុំឱ្យប្រញាប់ប្រញាល់ក្នុងការចុះកិច្ចព្រមព្រៀងណាមួយជាមួយអ៊ីរ៉ង់។
ពាក់ព័ន្ធនឹងបញ្ហានេះ លោក Warren Patterson ប្រធានយុទ្ធសាស្ត្រផ្នែកទំនិញនៅក្រុមហ៊ុន ING Group បានលើកឡើងដូច្នេះថា «យើងធ្លាប់ស្ថិតនៅដំណាក់កាលនេះពីមុនមកហើយ ដោយសារតែការចរចាជាប់គាំង។ ដូច្នេះ ទីផ្សារទំនងនឹងប្រុងប្រយ័ត្នជាងមុនអំពីប្រតិកម្មហួសហេតុណាមួយ»។ ជាមួយគ្នានោះ បណ្តាអ្នកវិភាគបានរំពឹងថា ការវិលត្រឡប់ទៅរកការដឹកជញ្ជូនប្រេងជាធម្មតាវិញតាមច្រកសមុទ្រហ័រមូស នឹងចំណាយពេលច្រើនខែ ដោយសារតែបណ្តារោងចក្រប្រេង និងឧស្ម័នដែលរងការខូចខាត ត្រូវការពេលសម្រាប់ការជួសជុលស្តារសមត្ថភាពឡើងវិញ៕
ចែករំលែកព័តមាននេះ