ខេត្តតាកែវ ៖ ស្របពេលដែលរាជរដ្ឋាភិបាល កំពុងរឹតបន្តឹងលើការនាំចូលសាច់បង្កកគ្មានគុណភាពបានជាបន្តបន្ទាប់ រួចយកទៅដុតកំម្ទេចចោល ជាក់ស្តែងកម្លាំងចម្រុះនៃរដ្ឋបាលស្រុកអង្គរបូរី បានបើកប្រតិបត្តិការបង្ក្រាប និងឃាត់ចាប់បានរថយន្តចំនួន០២គ្រឿង ដែលលួចដឹកជញ្ជូនសាច់បង្កកខុសច្បាប់សរុបជាង ៣តោន…
ខេត្តតាកែវ ៖ ស្របពេលដែលរាជរដ្ឋាភិបាល កំពុងរឹតបន្តឹងលើការនាំចូលសាច់បង្កកគ្មានគុណភាពបានជាបន្តបន្ទាប់ រួចយកទៅដុតកំម្ទេចចោល ជាក់ស្តែងកម្លាំងចម្រុះនៃរដ្ឋបាលស្រុកអង្គរបូរី បានបើកប្រតិបត្តិការបង្ក្រាប និងឃាត់ចាប់បានរថយន្តចំនួន០២គ្រឿង ដែលលួចដឹកជញ្ជូនសាច់បង្កកខុសច្បាប់សរុបជាង ៣តោន យកទៅដុតកម្ទេចចោលភ្លាមៗ ។
ក្នុងប្រតិបត្តិការចុះបង្ក្រាបនេះដែរ បានធ្វើឡើងនៅថ្ងៃទី២៤ ខែឧសភា ឆ្នាំ២០២៦ នេះនៅចំណុចស្ពានអង្គរបូរីវេលាម៉ោង៨ព្រឹក ។
លោក កង អាណាន់ អភិបាលស្រុកអង្គរបូរី និងជាប្រធានគណៈបញ្ជាការឯកភាពរដ្ឋបាលស្រុក បានអោយដឹងថា លោកបានមានវិធានការយ៉ាងតឹងរឹងបំផុត ចំពោះឈ្មួញដែលលួចនាំចូលសាច់បង្កកពីស្រុកយួនដល់សមត្ថកិច្ចគ្រប់ថ្នាក់ គឺមិនត្រូវជាប់ពាក់ព័ន្ធជាដាច់ខាត ។
លោកអភិបាលស្រុកបានបន្តទៀតថា បន្ទាប់ពីទទួលព័ត៌មានថា ឈ្មួញបាននាំចូលសាច់បង្កកដឹកតាមទូកពីក្រុងសំពៅពូនជ្រែធំមក លោកបានបញ្ជាកម្លាំងនគរបាលស្រុកដោយមានកិច្ចសហការជាមួយស្នងការដ្ឋាននគរបាលខេត្តតាកែវ និងការិយាល័យគយ និងរដ្ឋាករស្រាក់ដៃ បានដេញស្ទាក់ និងឃាត់រថយន្តសង្ស័យចំនួន០២គ្រឿងខាងលើ ។
លោកកង អាណាន់ អភិបាលស្រុកអង្គរបូរីបានបញ្ជាក់ថា ជាលទ្ធផល បន្ទាប់ពីការត្រួតពិនិត្យជាក់ស្តែង ក្រុមការងារចម្រុះបានរកឃើញសាច់បង្កកនាំចូលដោយខុសច្បាប់ គ្មានលិខិតអនុញ្ញាត និងគ្មានវិញ្ញាបនបត្របញ្ជាក់ស្តង់ដារអនាម័យត្រឹមត្រូវ សរុបចំនួន ៣៨៨កេស ដែលមានទម្ងន់ស្មើនឹង ៣.០៤២ គីឡូក្រាម ។
ក្រោយពីបានរកឃើញបទល្មើសជាក់ស្តែង និងដោយអនុវត្តតាមបទបញ្ជា និងគោលការណ៍ណែនាំពី លោកព្រះរាជអាជ្ញា នៃអយ្យការអមសាលាដំបូងខេត្តតាកែវ ក្រុមការងារចម្រុះបាន សម្រេចដឹកជញ្ជូនវត្ថុតាងសាច់បង្កកអត់ច្បាប់ទាំងនោះយកទៅដុតកម្ទេចចោលភ្លាមៗ នៅទីតាំងរណ្តៅសម្រាមទួលស្លែង ស្ថិតក្នុងឃុំបាស្រែ ស្រុកអង្គរបូរី ខេត្តតាកែវ ដើម្បីជៀសវាងការហូរចូលទៅក្នុងទីផ្សារ ដែលអាចបង្កផលប៉ះពាល់យ៉ាងធ្ងន់ធ្ងរដល់សុខភាពរបស់ប្រជាពលរដ្ឋ។
លោកកង អាណាន់ ប្រធានគណៈបញ្ជាការឯកភាពស្រុក បានបញ្ជាក់ទៀតថា នឹងបន្តរឹតបន្តឹងយន្តការត្រួតពិនិត្យ និងបង្ក្រាបរាល់ការនាំចូលទំនិញខុសច្បាប់ ជាពិសេសគ្រឿងឧបភោគបរិភោគខូចគុណភាព ឬគ្មានប្រភពច្បាស់លាស់ ដើម្បីការពារផលប្រយោជន៍ និងសុវត្ថិភាពចំណីអាហារជូនប្រជាពលរដ្ឋនៅក្នុងមូលដ្ឋានឱ្យបានជាដាច់ខាត ៕
ចែករំលែកព័តមាននេះ