សង្គ្រាមអ៉ីរ៉ង់ ៖ ប្រធានាធិបតីអាមេរិកលោកដូណាល់ត្រាំ អះអាងកាលពីថ្ងៃទី២៣ ឧសភា ថា កិច្ចព្រមព្រៀងមួយរវាងអាមេរិក និងអ៉ីរ៉ង់ដើម្បីបញ្ចប់សង្គ្រាម កំពុងត្រូវបានចរចាដោយទូលំទូលាយនិងកំពុងឈានទៅបង្ហើយរវាងប្រទេសទាំង២និងប្រទេសដទៃៗទៀតក្នុងតំបន់។ មុននេះលោកត្រាំបានគំរាមជាថ្មីវាយប្រហារអ៉ីរ៉ង់…
សង្គ្រាមអ៉ីរ៉ង់ ៖ ប្រធានាធិបតីអាមេរិកលោកដូណាល់ត្រាំ អះអាងកាលពីថ្ងៃទី២៣ ឧសភា ថា កិច្ចព្រមព្រៀងមួយរវាងអាមេរិក និងអ៉ីរ៉ង់ដើម្បីបញ្ចប់សង្គ្រាម កំពុងត្រូវបានចរចាដោយទូលំទូលាយនិងកំពុងឈានទៅបង្ហើយរវាងប្រទេសទាំង២និងប្រទេសដទៃៗទៀតក្នុងតំបន់។ មុននេះលោកត្រាំបានគំរាមជាថ្មីវាយប្រហារអ៉ីរ៉ង់ ប្រសិនបើកិច្ចព្រមព្រៀងមួយមិនអាចសម្រេចបានជាមួយប្រទេសនេះទេនោះ។
តាមបណ្ដាញសង្គមTRUTH SOCIAL លោកត្រាំថ្លែងថា គម្រោងនៃកិច្ចព្រមព្រៀងនោះក៏រួមបញ្ចូលការបើកច្រកសមុទ្រហ័រមូសឡើងវិញដែរផងដែរ។ លោកបញ្ជាក់ថា លោកបានទាក់ទងគ្នាតាមទូរស័ព្ទជាមួយមេដឹកនាំនៃប្រទេសជាច្រើននៅតំបន់ឈូងសមុទ្រពែរ្ស៍ ព្រមទាំងជាមួយតួកគី អេហ្ស៊ីបហ្ស៊កដានី និងប៉ាគីស្ថាន។ លោកត្រាំក៏អះអាងដែរថា លោកក៏បានពិភាក្សាជាមួយនាយករដ្ឋមន្ត្រីអ៉ីស្រាអែលលោកបេនចាមីននេតាន់យ៉ាហ៊ូ ក្នុងការទាក់ទងគ្នាតាមទូរស័ព្ទដាច់ដោយឡែកមួយដែរ។ ការពិភាក្សាគ្នានោះប្រព្រឹត្តទៅដ៏ល្អប្រសើរ ។
បណ្ដាសារព័ត៌មានអាមេរិក រយៈពេលប៉ុន្មានថ្ងៃចុងក្រោយនេះ លើកឡើងពីយុទ្ធសាស្ត្រដែលមិនស្របគ្នា រវាងលោកត្រាំនិងសម្ព័ន្ធមិត្តអ៉ីស្រាអែល ដោយអាមេរិកជម្រុញឲ្យមានដំណោះស្រាយការទូតមួយ ចំណែកអ៉ីស្រាអែលវិញចង់បន្តការប្រយុទ្ធគ្នាឡើងវិញ។
មុននេះ នាថ្ងៃទី២៣ ឧសភា លោកត្រាំវាយតមៃ្លថា ភ័ព្វវាសនានៃការសម្រេចបានកិច្ចព្រៀងមួយ ឬបន្តការប្រយុទ្ធគ្នាមាន៥០-៥០ដូចគ្នា ។ អ្នកនាំពាក្យក្រសួងការបរទេសអ៉ីរ៉ង់ ក៏អះអាងដែរថា មាននិន្នាការទៅរកការខិតចូលជិតគ្នាជាមួយបណ្ដាជំហរអាមេរិក ។ ប៉ុន្តែមិនមានន័យថាចាំបាច់ឲ្យយើង និងអាមេរិកឈានដល់កិច្ចព្រមព្រៀងលើបញ្ហាសំខាន់ៗឡើយ ។ អ្នកនាំពាក្យរូបនោះលោកអេស្មាអ៉ីលបាក់ហៃអ៉ីបញ្ជាក់ថា សណុំរឿងនុយក្លេអ៊ែរក្នុងដំណាក់កាលនេះ មិនស្ថិតក្នុងកិច្ចព្រមព្រៀងដែលកំពុងពិភាក្សាគ្នាឡើយ ផ្ទុយពីបញ្ហាលុបបំបាត់ការបិទខ្ទប់ច្រកសមុទ្រហ័រមូស ។
នាថ្ងៃទី២៣ឧសភានោះអ្នកចរចាសំខាន់របស់អ៉ីរ៉ង់ លោកម៉ូហាម៉ាដបាក់ហ័រហ្គាលីបាហ្វបានសន្យាពីការតបតវិញខ្លាំងក្លា ប្រសិនបើអាមេរិកបន្តសង្គ្រាមឡើងវិញប្រឆាំងអ៉ីរ៉ង់ ។ លោកថាប្រសិនបើសត្រូវប្រព្រឹត្តអំពើឆ្កួតៗហើយធ្លាក់ជាថ្មីក្នុងអន្ទាក់របស់អ៉ីស្រាអែល រួចធ្វើការឈ្លានពានជាថ្មីប្រឆាំងអ៉ីរ៉ង់ នោះយើងនឹងបើករណសិរ្សថ្មីៗប្រឆាំងតបវិញ។
នាព្រឹកថ្ងៃទី១៨ ឧសភា ក្រសួងការបរទេសអ៉ីរ៉ង់ថ្លែងថា បានឆ្លើយតបសំណើថ្មីរបស់អាមេរិកដើម្បីចាកចេញពីភាពទ័លច្រក ។ អ៉ីរ៉ង់បានលើកជាថ្មីពីការទាមទាររបស់ខ្លួន ពិសេសបំផុតប្រគល់ឲ្យវិញបណ្ដាទ្រព្យសម្បត្តិអ៉ីរ៉ង់ដែលបង្កកទុកនៅបរទេស និងលុបចោលទណ្ឌកម្មអន្តរជាតិ ដែលធ្វើឲ្យសេដ្ឋកិច្ចខ្លួនត្រូវស្ទះ ។
នាថ្ងៃទី១៩ឧសភាលោកត្រាំអះអាងនៅមុខសារព័ត៌មានថា មានវាសនាល្អបំផុតក្នុងការព្រមព្រៀងគ្នាជាមួយអ៉ីរ៉ង់ ដោយលោកថា ពិនិត្យឃើញការវិវឌ្ឍដែលវិជ្ជមានបំផុត តែលោកមិនផ្ដល់ភាពលម្អិតឡើយ។ អាមេរិកទាមទារឲ្យអ៉ីរ៉ង់រក្សាទុកតែទីតាំងនុយក្លេអ៊ែរមួយដែលកំពុងមានសកម្មភាព ហើយផ្ទេរអ៊ុយរ៉ានីញ៉ូមចម្រាញ់ខ្ពស់ដែលស្តុកទុកទាំងអស់ទៅកាន់អាមេរិក ៕
ចែករំលែកព័តមាននេះ