រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌដង្កោ បានចុះត្រួតពិនិត្យរដ្ឋបាលទីតាំងជនបរទេសស្នាក់នៅ ចំនួន០៣ទីតាំង រកឃើញជនបរទេសចំនួន៣០នាក់ ប៉ុន្តែក្នុងនោះ៦នាក់ មិនមានជាប់ពាក់ព័ន្ធនិងបទល្មើស ONLINE SCAMS ទេ។ ដោយឡែកចំនួន២៤នាក់ សង្ស័យប្រព្រឹត្តបទល្មើស ONLINE SCAMS ហើយកម្លាំងសមត្ថកិច្ចខាងលើ ក៏បានធ្វើការឃាត់ខ្លួននាំយកទៅសាកសួរ និងចាត់ការតាមច្បាប់ ព្រមទាំងដកហូតបានវត្ថុតាងជាច្រើនផងដែរ ។
ប្រតិបត្តិការនោះ បានធ្វើឡើងកាលពីថ្ងៃទី២៤ ខែមិថុនា ឆ្នាំ២០២៦ ស្ថិតនៅក្នុងភូមិគ្រឹះលេខ១១ ផ្លូវP05 ក្នុងបុរីមួយកន្លែងនៅតាម៥០ម៉ែត្រ ភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ចំណែក២ទីតាំងទៀតរកមិនឃើញមានបទល្មើស ONLINE SCAMS នោះទេ ។
សមត្ថកិច្ច បានប្រាប់ថា ទាំង៣ទីតាំងនោះ បានរកឃើញមានជនបរទេសសរុប ចំនួន៣០នាក់ មាន០២សញ្ជាតិ គឺចិន ចំនួន២៩នាក់ និងម៉ាឡេស៊ី ០១នាក់ជាស្ត្រី ក្នុងនោះទីតាំងទី១ និងទី២ មានជនជាតិចិន ស្នាក់តែ៦នាក់ប៉ុណ្ណោះ។ ពួកគេទាំងអស់នោះ មានលិខិតឆ្លងដែន និងទិដ្ឋាការត្រឹមត្រូវ ហើយមិនមានជាប់សង្ស័យ និងការប្រព្រឹត្តបទល្មើស ONLINE SCAMS នោះឡើយ ។ ដោយឡែកទីតាំងទី៣ ស្ថិតនៅក្នុងភូមិគ្រឹះលេខ១១ខាងលើនោះ មានជនជាតិចិនចំនួន២៣នាក់ និងជនជាតិម៉ាឡេស៊ី១នាក់ ជាស្ត្រី ដែលសង្ស័យប្រព្រឹត្តបទល្មើស ONLINE SCAMS ។
សមត្ថកិច្ចបានប្រាប់បន្តថា ខណៈនោះគណៈបញ្ជាការឯកភាពខណ្ឌដង្កោ បានដកហូតវត្ថុតាងមួយចំនួនរួមមាន ៖ ម៉ូនីទ័រ ចំនួន២គ្រឿង, CPU ចំនួន១គ្រឿង, Laptop ចំនួន២២គ្រឿង, ទូរស័ព្ទដៃ ចំនួន៦៩១គ្រឿង, ROUTER WIFI ចំនួន១គ្រឿង, ដុំបំបែកអ៊ីនធឺណែត (Wireless Access Point) ចំនួន១០គ្រឿង, ដុំសាកទូរសព្ទ (Charger USB) ចំនួន១០គ្រឿង, ម៉ាស៊ីន DVR ចំនួន១គ្រឿង។ យោងតាមការធ្វើកោសល្យវិច្ឆ័យ លើសម្ភារៈ វត្ថុតាងខាងលើពីមន្ត្រីជំនាញ នៃការិយាល័យប្រឆាំងបទល្មើសបច្ចេកវិទ្យា រកឃើញថាជាប់ពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា (ONLINE SCAMS) ។ បន្ទាប់មកសមត្ថកិច្ចបានបញ្ជូនជនសង្ស័យទាំង២៤នាក់ និងវត្ថុតាងខាងលើ ទៅកាន់ស្នងការដ្ឋានរាជធានីភ្នំពេញ ដើម្បីសាកសួរនិងកសាងសំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញចាត់ការទៅតាមផ្លូវច្បាប់ ៕
ចែករំលែកព័តមាននេះ