រាជធានីភ្នំពេញ ៖ លោកកឹម សុខា អតីតប្រធានគណបក្សសង្គ្រោះជាតិ ហើយសំណុំរឿងកំពុងស្ថិតក្នុងដៃតុលាការ ហាមឃាត់មិនអនុញ្ញាតឱ្យចេញពីផ្ទះ ពេលនេះលោកត្រូវបានតុលាការអនុញ្ញាតឱ្យទៅជួបម្តាយចាស់ជរាជាលើកទី២ ។ នេះបើតាមមេធាវីរបស់លោក…
រាជធានីភ្នំពេញ ៖ លោកកឹម សុខា អតីតប្រធានគណបក្សសង្គ្រោះជាតិ ហើយសំណុំរឿងកំពុងស្ថិតក្នុងដៃតុលាការ ហាមឃាត់មិនអនុញ្ញាតឱ្យចេញពីផ្ទះ ពេលនេះលោកត្រូវបានតុលាការអនុញ្ញាតឱ្យទៅជួបម្តាយចាស់ជរាជាលើកទី២ ។ នេះបើតាមមេធាវីរបស់លោក កឹម សុខា ។
លោក ផែង ហេង មេធាវីការពារក្តីឱ្យកឹម សុខា បានឱ្យដឹងនៅថ្ងៃទី២៥ ខែឧសភា ឆ្នាំ២០២៦ថា ៖«ព្រឹកនេះ (25/05/2026) ឯឧ កឹម សុខា និងលោកជំទាវ តែ ច័ន្ទមនោ បានមកជួបម្តាយជាទីគោរព ស្រឡាញ់ ។ នេះជាលើកទី២ ដែលឯឧ កឹម សុខា បានមកជួបលោកយាយ សៅ ង៉ែត ព្រះជន្ម១០១ឆ្នាំ។
បើតាមលោកមេធាវីបានលើកឡើងថា ពិតជាឆុតជាងឱសថ ក្រោយមានការលើកទឹកចិត្តពីកូនសំណព្វចិត្ត ដែលគាត់ទន្ទឹងរង់ចាំ ឥឡូវសភាពសុខភាព លោកយាយដូចជា មានការវិវឌ្ឍធូរស្រាល អាចបើកភ្នែកមើលកូនៗ និងមានទឹកមុខស្រស់ស្រាយខុសពីថ្ងៃមុនឆ្ងាយ នឹងស្មានមិនដល់ ពិតជាអច្ឆរិយៈមែនកម្លាំងចិត្តចង់ជួបកូន ។
គួររម្លឹកថា នៅថ្ងៃទី២០ ខែឧសភា កន្លងទៅលោក កឹម សុខា ត្រូវព្រះរាជអាជ្ញាសាលាដំបូងរាជធានីភ្នំពេញអនុញ្ញាតឲ្យលោកបានទៅជួបម្តាយលោក ត្រឹមរយៈពេលជាង១ម៉ោង ។ ការអនុញ្ញាតនេះកើតឡើងបន្ទាប់ពីលោក កឹម សុខា បានសរសេរលិខិតស្នើទៅតុលាការ សុំជួបសួរសុខទុក្ខម្តាយលោក ដែលកំពុងមានវ័យកាន់តែជរា ។
លោក កឹម សុខា លែងប្រាថ្នាចង់បានមុខតំណែងអ្វីឡើយ តែផ្ទុយទៅវិញ គឺលោកចង់បួស និងនៅកំដរម្តាយរបស់លោក នាគ្រាចុងក្រោយនេះ ។ នេះបើតាមលោកមេធាវី ផែង ហេង ។ ទាក់ទងទៅនឹងការប្តឹងសារទុក្ខ ទៅតុលាការជាន់ខ្ពស់សហមេធាវីលោក កឹម សុខា រូបនេះបានបញ្ជាក់ថា បច្ចុប្បន្ន លោក កឹម សុខា មិនទាន់បានពិភាក្សាជាមួយក្រុមមេធាវីអំពីការប្តឹងសារទុក្ខជំទាស់នឹងការសម្រេចរបស់សាលាឧទ្ធរណ៍ ដែលតម្កល់ការកាត់ទោសលោក កឹម សុខា តាមសាលក្រមសាលាដំបូងឲ្យជាប់ឃុំ ក្នុងផ្ទះចំនួន២៧ឆ្នាំ និងបន្ថែមទោសហាមប្រាមមិនឲ្យលោក កឹម សុខា ចេញក្រៅប្រទេសរយៈពេល៥ឆ្នាំ ។
មកដល់ពេលនេះ គេនៅមិនទាន់ដឹងថា តើលោក កឹម សុខា នឹងប្តឹងជំទាស់ទៅនឹងការសម្រេចរបស់សាលាឧទ្ធរណ៍ភ្នំពេញ ឬយ៉ាងណាទេ ខណៈដែលថេរវេលានៃការប្តឹងសារទុក្ខមានរយៈពេល៣០ថ្ងៃ ក្រោយការប្រកាសសាលដីកាសាលាឧទ្ធរណ៍ ។
យ៉ាងណាមិញ លោកមេធាវី ផែង ហេង នៅតែអះអាងថា សំណុំរឿងលោក កឹម សុខា គឺជាសំណុំរឿងនយោបាយ ដែលទាមទារឲ្យមានការចរចាតាមផ្លូវនយោបាយ ទើបអាចដោះស្រាយបាន ៕
ចែករំលែកព័តមាននេះ