ខេត្តកណ្ដាល៖ បុរសម្នាក់បានរងរបួសរលាករលួយខ្លួនប្រាណដៃជើងធ្ងន់ធ្ងរនិងមនុស្សប្រុសស្រីចំនួន៥នាក់ទៀតដែលរួមមានប្រពន្ធ ក្មួយ និងចៅរបស់គាត់ ព្រមទាំងសន្តិសុខយាមបុរីពិភពថ្មីម្នាក់ផង បានរងរបួសមធ្យមនិងស្រាល ដោយការរលាកផ្ទៃមុខនិងដៃជើង នៅក្នុងឧបទ្ទវហេតុផ្ទុះធុងហ្គាសធំមួយ នៅក្នុងផ្ទះបាយរបស់គាត់ ។…
ខេត្តកណ្ដាល៖ បុរសម្នាក់បានរងរបួសរលាករលួយខ្លួនប្រាណដៃជើងធ្ងន់ធ្ងរនិងមនុស្សប្រុសស្រីចំនួន៥នាក់ទៀតដែលរួមមានប្រពន្ធ ក្មួយ និងចៅរបស់គាត់ ព្រមទាំងសន្តិសុខយាមបុរីពិភពថ្មីម្នាក់ផង បានរងរបួសមធ្យមនិងស្រាល ដោយការរលាកផ្ទៃមុខនិងដៃជើង នៅក្នុងឧបទ្ទវហេតុផ្ទុះធុងហ្គាសធំមួយ នៅក្នុងផ្ទះបាយរបស់គាត់ ។
ហេតុការណ៍ខាងលើនោះបានកើតឡើងកាលពីវេលាម៉ោង០៨និង៣០នាទីព្រឹកថ្ងៃទី២៥ ខែឧសភា ឆ្នាំ២០២៦ នៅចំណុចផ្ទះលេខ១០៤ ផ្លូវលេខ០៩A ស្ថិតនៅក្នុងបូរីពិភពថ្មីកំបូល៣ ភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល ។
ជនរងគ្រោះទាំង៦នាក់មានប្រុសចំនួន៤នាក់និងស្រីចំនួន២នាក់ក្នុងនោះរួមមាន៖១-ឈ្មោះចន្ធី ភេទប្រុស អាយុប្រហែល៥៥ឆ្នាំ មុខរបររត់ម៉ូតូកង់បីរងរបួសធ្ងន់ ហើយគាត់គឺជា ម្ចាស់ផ្ទះកើតហេតុខាលើនោះ ។ ២-ឈ្មោះសុខា ភេទស្រី អាយុប្រហែល៥៣ឆ្នាំ ត្រូវជាប្រពន្ធរបស់គាត់ មុខរបរមេផ្ទះ ៣-ឈ្មោះព្រលិត ភេទប្រុស អាយុ៣០ឆ្នាំ មុខរបរកម្មកររោងចក្រ ត្រូវជាក្មួយ ៤-ឈ្មោះនីសា ភេទស្រី អាយុ៨ឆ្នាំ ត្រូវជាចៅ។ ៥-ឈ្មោះជីង ចាំង ភេទប្រុស អាយុ៤ឆ្នាំ ត្រូវជាចៅនិង៦-ឈ្មោះសិទ្ធ លាង ភេទប្រុស អាយុ៤៣ឆ្នាំ មុខរបរជាសន្តិសុខបុរី ពិភពថ្មីកំបូល២ ស្នាក់នៅក្នុងបុរីនោះ ជនរងគ្រោះទាំង៥នាក់ខាងក្រោមនេះ បានរងរបួសមធ្យមនិងស្រាល ។
ការផ្ទុះធុងហ្គាស់នោះក៏បណ្ដាលឲ្យមានការឆាបឆេះ១វឹបផងដែរដែលបានធ្វើឲ្យផ្ទះខាងលើទំហំ4m x 12m សង់ពីថ្ម ប្លង់សេ១សន្លឹកឆេះខូចខាតខ្លះៗ ចំណែកសម្ភារៈប្រើប្រាស់ និងខោអាវមួយចំនួន ព្រមទាំងកញ្ចក់ទ្វារ ក៏បានរងការខូចខាតផងដែរ ។
បុរសជាសន្តិសុខបុរីពិភពថ្មីម្នាក់ ឈ្មោះកឹម ប៉ង់ អាយុ២៨ឆ្នាំ ស្នាក់នៅក្នុងផ្សារបូរីពិភពថ្មីកំបូល២ បានបំភ្លឺជូននគរបាលដូច្នេះថា នៅមុនពេលកើតហេតុ ស្ត្រីឈ្មោះសុខា ដែលជាប្រពន្ធម្ចាស់ផ្ទះបានទៅហៅសន្តិសុខ ម្នាក់ឈ្មោះសិទ្ធ លាង ឲ្យទៅជួយជួសជុលចង្ក្រានហ្គាស ដែលលេចធ្លាយហ្គាស់ ។ ខណៈនោះសន្តិសុខឈ្មោះសិទ្ធ លាង ក៏បានទៅជួសជុលឲ្យ លុះក្រោយពេលជួសជុលរួចរាល់ហេីយនោះ បុរសឈ្មោះចន្ធី ដែលជាម្ចាស់ផ្ទះក៏បានមួលបេីកហ្គាស និងកាច់កុងតាក់ចង្ក្រានបញ្ឆេះសាកមើល ស្រាប់តែផ្ទុះបង្កការឆាបឆេះតែម្ដង ។
នគរបាលបានប្រាប់ថា ខណៈនោះភ្លើងឆាបឆេះ១វឹបសន្ធោសន្ធៅ បង្កឲ្យមានការភ្ញាក់ផ្អើលដល់អ្នកជិតខាងជួយពន្លត់រលត់ទៅវិញ បណ្ដាលឲ្យបុរសជាម្ចាស់ផ្ទះខាងលើត្រូវភ្លើងឆាបឆេះរលាករលួយខ្លួនប្រាណ ដៃ ជើងធ្ងន់ធ្ងរជាងគេ ។ ដោយឡែកស្ត្រីជាប្រពន្ធរបស់គាត់ និងសន្តិសុខឈ្មោះសិទ្ធ លាង ដែលបានទៅជួយជួសជុលចង្ក្រានឲ្យ ព្រមទាំងក្មួយ និងចៅៗរបស់គាត់សរុបទាំងអស់៥នាក់ទៀតរងរបួសមធ្យមនិងស្រាល ។
បើតាមប្រភពមួយផ្សេងទៀតបានឲ្យដឹងថា នៅក្នុងពេលជួសជុលចង្ក្រានហ្គាសរួច នៅទីនោះបានធំក្លិនហ្គាស់យ៉ាងខ្លាំងណាស់ ដោយសារតែហ្គាស់ដែលធ្លាយកំពុងហោះហើរវិលវល់ពេញក្នុងផ្ទះបាយនោះមិនទាន់ចេញក្រៅអស់នៅឡើយ ។ ប៉ុន្តែខណៈនោះទំនងជាជនរងគ្រោះ និងអ្នកនៅទីនោះទាំងអស់ មិនបានគិតដល់ក៏បានកាច់កុងតាក់ចង្ក្រានបញ្ឆេះ ទើបបណ្ដាលឲ្យឆាបឆេះផ្ទុះបង្កឲ្យមានគ្រោះថ្នាក់បែបនេះតែម្ដង ទៅ ។
ក្រោយពេលកើតហេតុ ជនរងគ្រោះទាំងអស់នោះត្រូវបានក្រុមគ្រួសារនិងអ្នកជិតខាង ដឹកតាមរថយន្តយកទៅសង្គ្រោះបន្ទាន់នៅមន្ទីរពហុព្យាបាលនិងសម្ភពមួយកន្លែង ស្ថិតនៅក្នុងសង្កាត់កំបូល ខណ្ឌកំបូល រាជធានីភ្នំពេញ ។
តាមព័ត៌មានចុងក្រោយ សន្តិសុខកំពុងសម្រាកព្យាលនៅមន្ទីរពហុព្យាលនិងសម្ភពសុខា សង្កាត់កំបូល ខណ្ឌកំបូល ចំណែកបុរសជាម្ចាស់ផ្ទះ និងប្រពន្ធព្រមទាំងចៅៗ និងក្មួយប្រុស ត្រូវបានបញ្ជូនបន្តទៅកាន់មន្ទីរពេទ្យព្រះកុសុមៈ ៕
ចែករំលែកព័តមាននេះ