ទីក្រុងកៀវ៖ កាលពីយប់មិញ អ៊ុយក្រែនវាយប្រហាររុស្ស៊ីដោយគ្រាប់មីស៊ីលដែលផលិតដោយស្នាដៃអ៊ុយក្រែនផ្ទាល់តែម្ដងម៉ាកឡងណឹបទូន (Long Neptune) ជាប្រភេទមីស៊ីលរយៈចម្ងាយឆ្ងាយ ហើយបានវាយប្រហារចំគោលដៅយ៉ាងល្អ។ នេះបើយោងតាមការអះអាងរបស់លោកហ្សេឡិនស្គី។ លោកថ្លែងបន្ថែមថាការវាយប្រហារស្រដៀងគ្នានេះកាន់តែទទួលបានជោគជ័យជាលំដាប់។
លោកហ្សេឡិនស្គីបានបង្ហោះវីឌីអូដែលបង្ហាញគ្រាប់មីស៊ីលហោះទៅវាយប្រហារគោលដៅនៅប្រទេសរុស្ស៊ី។ មីស៊ីលនេះត្រូវបានធ្វើតេស្តដោយជោគជ័យកាលពីខែមីនា។ វាមានវង់ប្រតិបត្តិការមួយពាន់គីឡូម៉ែត្រ។ កាលពីដើមសប្ដាហ៍នេះ អគ្គសេនាធិការដ្ឋានកងទ័ពអ៊ុយក្រែនអះអាងថាខ្លួនខិតខំប្រើប្រាស់មីស៊ីលរយៈចម្ងាយឆ្ងាយដែលផលិតក្នុងស្រុកប្រកបដោយប្រសិទ្ធភាពកាន់តែខ្ពស់។ ក្នុងនោះក៏មានមីស៊ីលម៉ាកណឹបទូនផងដែរ។
ចំពោះករណីវាយប្រហារទៅលើប្រទេសរុស្ស៊ីនោះ លោកហ្សេឡិនស្គីមិនបានបញ្ជាក់ថាវាយប្រហារទៅលើទីតាំងណាទេ។ ប្រភព២នាក់ដែលធ្វើការខាងផ្នែកឧស្សាហកម្មបានបង្ហើបឱ្យដឹងថាទីក្រុងកំពង់ផែនៅសមុទ្រខ្មៅឈ្មោះណូវ៉ូរ៉ូស៊ី (Novorossiysk) បានផ្អាកនាំប្រេងឆៅចេញទៅលក់នៅក្រៅប្រទេសបន្ទាប់ពីទទួលរងការវាយប្រហារពីសំណាក់ដ្រូនរបស់អ៊ុយក្រែន។ ប៉ុន្តែរហូតមកដល់ពេលនេះ អ៊ុយក្រែនមិនបានប្រកាសថានេះជាស្នាដៃរបស់ខ្លួនទេ។
ក្រឡេកទៅមើលស្ថានការណ៍សឹកនៅប្រទេសអ៊ុយក្រែនវិញម្ដង កាលពីយប់មិញ និងព្រឹកមិញ រុស្ស៊ីបន្តវាយប្រហារទៅលើទីក្រុងតូច-ធំដោយប្រើប្រាស់មីស៊ីល ដ្រូន និងគ្រាប់បែកបញ្ជាពីចម្ងាយ។ ជាពិសេស រដ្ឋធានីកៀវរងការវាយប្រហារខ្លាំងជាងគេបណ្ដាលឱ្យឆេះអគារស្នាក់នៅរបស់ប្រជាជនជាច្រើនកន្លែង។ អាជ្ញាធរអះអាងថាមនុស្ស៦នាក់ស្លាប់នៅទីក្រុងកៀវ ខណៈដែលមនុស្ស២នាក់ទៀតស្លាប់នៅតំបន់ខាងត្បូងនៅពេលរុស្ស៊ីវាយប្រហារទីតាំងផលិតថាមពល, អគារ និងហេដ្ឋារចនាសម្ព័ន្ធ។
លោកហ្សេឡិនស្គីថ្លែងថារុស្ស៊ីបញ្ជូនដ្រូន៤៣០គ្រឿង និងមីស៊ីល១៨គ្រាប់ដើម្បីវាយប្រហារ។ អ៊ុយក្រែនបាញ់មីស៊ីលរយៈចម្ងាយឆ្ងាយចូលទឹកដីរុស្ស៊ីដើម្បីជាការឆ្លើយតប។ អ៊ុយក្រែនអះអាងថាខ្លួនអាចបាញ់ទម្លាក់ដ្រូន និងមីស៊ីលរបស់រុស្ស៊ីភាគច្រើន។ ប៉ុន្តែសម្បកគ្រាប់មីស៊ីល និងដ្រូនដែលបាញ់ឆេះនោះធ្លាក់ទៅលើអគារខ្ពស់ៗ សាលារៀន មណ្ឌលសុខភាព និងអគាររដ្ឋបាលបណ្ដាលឱ្យឆេះយ៉ាងសន្ធោសន្ធៅនៅក្នុងខណ្ឌចំនួន៩នៃរដ្ឋធានីកៀវដែលមានប្រជាជនរស់នៅបីលាននាក់។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ