ទីក្រុងប៉េកាំង៖ ថ្មីៗនេះ ក្រសួងការបរទេសចិនបានកោះហៅឯកអគ្គរាជទូតជប៉ុនប្រចាំទីក្រុងប៉េកាំងទៅឆ្លើយបំភ្លឺ និងបង្ហាញការកើតទុក្ខមិនសុខចិត្តជុំវិញការថ្លែងសុន្ទរកថារបស់នាយករដ្ឋមន្ត្រីជប៉ុន លោកស្រីតាកាអ៊ីឈិ ពាក់ព័ន្ធនឹងបញ្ហាតៃវ៉ាន់។ ចិនស្នើសុំឱ្យជប៉ុនដកពាក្យនោះមកវិញបើមិនចង់ឱ្យមានបញ្ហាជាមួយគ្នា។ នៅក្នុងបទអត្ថាធិប្បាយនោះ លោកស្រីតាកាអ៊ីឈិប្រមើលមើលអំពីលទ្ធភាពនៃការផ្ទុះសង្គ្រាមនៅតៃវ៉ាន់។
ទីស្ដីការក្រសួងការបរទេសចិនលោកស្រីថ្លែងកាលពីសប្ដាហ៍មុនថាការប្រើប្រាស់កម្លាំងយោធាដើម្បីវាយប្រហារតៃវ៉ាន់អាចនឹងចាត់ចូលទៅក្នុងករណីតស៊ូដើម្បីការរស់រានមានជីវិតរបស់ជាតិ ឬសុខចិត្តរស់នៅក្រោមការគំរាមកំហែង។ ក្រោយមក លោកស្រីនិយាយបញ្ជាក់ឡើងវិញត្រង់ចំណុចនេះ។ លោកស្រីថានោះជាការប្រមើលមើលអំពីសេណារីយោដ៏អាក្រក់បំផុតដែលអាចនឹងកើតមានឡើង ហើយជំហរនយោបាយរបស់រាជរដ្ឋាភិបាលជប៉ុននឹងរក្សាទុកដដែល ឥតផ្លាស់ប្ដូរទេ។
ក្រសួងការបរទេសចិនថ្លែងថាអនុរដ្ឋមន្ត្រីចិន លោកស៊ុនវៃតុង (Sun Weidong) បានកោះហៅឯកអគ្គរាជទូតជប៉ុន លោកកាណាស៊ូគិ កេនជិ (Kanasugi Kenji) ដើម្បីជំទាស់នឹងពាក្យសម្ដីរបស់លោកស្រីតាកាអ៊ីឈិ។ លោកស៊ុនចាត់ទុកពាក្យសម្ដីរបស់លោកស្រីតាកាអ៊ីឈិមានចរិតបង្កអរិភាពយ៉ាងខ្លាំង។ លោកថាពាក្យសម្ដីនោះធ្វើឱ្យប៉ះពាល់មូលដ្ឋានគ្រឹះនៃទំនាក់ទំនងនយោបាយរវាងចិន និងជប៉ុន ហើយក៏ប៉ះពាល់អារម្មណ៍របស់មតិសាធារណៈផងដែរ។ ប្រជាជនចិនជាង១៤០០លាននាក់នឹងមិនអត់ឱនចំពោះពាក្យសម្ដីនេះទេ។
លោកស៊ុនថ្លែងបន្តទៀតថាតៃវ៉ាន់ជាបញ្ហារបស់ប្រទេសចិនសុទ្ធសាធ។ ដូច្នេះ គេមិនត្រូវដើរឆ្លងបន្ទាត់ក្រហមជាដាច់ខាត។ ពុំនោះទេ ប្រទេសជប៉ុនត្រូវរ៉ាប់រងទទួលខុសត្រូវចំពោះផលវិបាកគ្រប់យ៉ាង។ ស្ថានទូតជប៉ុនប្រចាំទីក្រុងប៉េកាំងថ្លែងថាលោកកាណាស៊ូគិបដិសេធមិនទទួលយកបទអន្តរាគមន៍របស់អនុរដ្ឋមន្ត្រីចិនទេ ហើយលោកបានបកស្រាយឱ្យលោកស៊ុនវៃតុងស្ដាប់វិញអំពីជំហររបស់រដ្ឋាភិបាលជប៉ុន។
អនុរដ្ឋមន្ត្រីការបរទេសចិន លោកស៊ុនវៃតុង (Sun Weidong) (រូបឆ្វេង) និងឯកអគ្គរាជទូតជប៉ុនប្រចាំទីក្រុងប៉េកាំង លោកកាណាស៊ូគិ កេនជិ (Kanasugi Kenji) (រូបខាងស្ដាំ)ចំណុចមួយទៀត ឆ្លៀតពេលដែលក្រសួងការបរទេសចិនហៅទៅជួបហើយ លោកកាណាស៊ូគិក៏បង្ហាញការជំទាស់នឹងបទអត្ថាធិប្បាយនៅលើបណ្ដាញសង្គមរបស់អគ្គកុងស៊ុលចិនប្រចាំទីក្រុងអូសាកា (Osaka) កាលពីសប្ដាហ៍មុន។ ពោលគឺបន្ទាប់ពីលោកស្រីតាកាអ៊ីឈិឡើងថ្លែងនៅក្នុងរដ្ឋសភាបានបន្តិច។ លោកកាណាស៊ូគិចាត់ទុកថាការបង្ហោះសារនោះហាក់ដូចជាមិនសមរម្យបន្តិចណាសោះ។ លោកអំពាវនាវឱ្យប្រទេសចិនផ្ដល់ការឆ្លើយតបដោយសមស្របចំពោះបញ្ហានេះ។ នៅក្នុងសាររបស់អគ្គកុងស៊ុលចិននោះ មានពាក្យមួយឃ្លាសរសេរថា «បើហ៊ានលូកកគឺត្រូវដាច់កដោយឥតបង្អង់»។ នេះបើតាមការផ្សាយរបស់ទូរទស្សន៍អឹនអេចខេ (NHK) និងប្រភពដទៃទៀត៕
នាយករដ្ឋមន្ត្រីជប៉ុន លោកស្រីតាកាអ៊ីឈិ ត្រូវគេចាត់ទុកថាជានារីបេះដូងដែករបស់ជប៉ុនដោយសារលោកស្រីប្រើសម្ដីមុត និងជំហរម៉ឺងម៉ាត់ដូចអតីតនាយករដ្ឋមន្ត្រីអង់គ្លេស លោកស្រីម៉ាហ្ការ៉េត ថេតឆឺ (Margaret Thatcher)។
ចែករំលែកព័តមាននេះ