លោក ត្រាំ កាត់បន្ថយពន្ធលើផលិតផលអាហារជាង២០០មុខ ចំពេលតម្លៃកើនឡើងខ្លាំងនៅអាមេរិក
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី១៤ ខែវិច្ឆិកា…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) កាលពីថ្ងៃទី១៤ ខែវិច្ឆិកា ឆ្នាំ២០២៥ បានកាត់បន្ថយពន្ធលើផលិតផលអាហារជាង ២០០ មុខ ដែលសុទ្ធតែជាមុខទំនិញ ឬអាហារអាមេរិកមិនអាចផលិតបាន ឬផលិតបានតែមិនគ្រប់គ្រាន់សម្រាប់ការផ្គត់ផ្គង់ រួមទាំងផលិតផលអាហារសំខាន់ ៗ ដូចជា កាហ្វេ សាច់គោ ចេក ប៉េងប៉ោះ និងទឹកក្រូច ជាដើម ចំពេលមានប្រតិកម្មខ្លាំងៗពីបណ្តាអ្នកប្រើប្រាស់អាមេរិក ចំពោះការកើនឡើងថ្លៃតម្លៃគ្រឿងទេសខ្ពស់។
តាមប្រភពពីទីភ្នាក់ងារសារព័ត៌មាន Reuters បានឱ្យដឹងថា ការលើកលែងថ្មី ដែលចូលជាធរមាននៅពាក់កណ្តាលអធ្រាត្រថ្ងៃទី១៣ វិច្ឆិកា បានបង្ហាញពីការដើរបញ្ច្រាស់ទិសយ៉ាងខ្លាំងសម្រាប់លោក ត្រាំ ដែលធ្លាប់បានលើកឡើងជាយូរមកហើយថា ពន្ធនាំចូលដែលលោកបានដាក់កាលពីដើមឆ្នាំនេះ មិនបានជំរុញឱ្យមានអតិផរណានោះទេ។
បទបញ្ជាកាលពីថ្ងៃទី១៤ ខែវិច្ឆិកា បានកើតឡើង បន្ទាប់ពីការប្រកាសអំពីកិច្ចព្រមព្រៀងមួយ ដើម្បីកាត់បន្ថយពន្ធរបស់អាមេរិកលើប្រទេសស្វីសពី ៣៩% មកត្រឹម ១៥% ដែលជាផ្នែកមួយនៃកតិកាសញ្ញាពាណិជ្ជកម្មថ្មី និងកិច្ចព្រមព្រៀងពាណិជ្ជកម្មក្របខ័ណ្ឌ ដែលបានប្រកាសនៅថ្ងៃទី១៣ វិច្ឆិកា នឹងលុបបំបាត់ពន្ធលើអាហារមួយចំនួន ព្រមទាំងទំនិញផ្សេងទៀត ដែលនាំចូលពីអាហ្សង់ទីន អេក្វាឌ័រ ហ្គាតេម៉ាឡា និងអែលសាល់វ៉ាឌ័រ។ នៅពេលកិច្ចព្រមព្រៀងទាំងនោះត្រូវបានបញ្ចប់ មន្ត្រីអាមេរិកក៏កំពុងសម្លឹងមើលកិច្ចព្រមព្រៀងបន្ថែមទៀតឱ្យបានមុនចុងឆ្នាំនេះ។
អ្នកប្រើប្រាស់អាមេរិកនៅតែមានការខកចិត្តយ៉ាងខ្លាំង ចំពោះតម្លៃគ្រឿងទេសកើនឡើងខ្ពស់ ភាគច្រើនបានឃើញការកើនឡើងថ្លៃទ្វេដង បើធៀបនឹងឆ្នាំមុន ដែលបណ្តាអ្នកសេដ្ឋកិច្ចអះអាងថា ត្រូវបានជំរុញដោយផ្នែកនៃពន្ធនាំចូល ហើយអាចកើនឡើងបន្ថែមទៀតនៅឆ្នាំក្រោយ នៅពេលដែលបណ្តាក្រុមហ៊ុនលើពិភពលោក ចាប់ផ្តើមឆ្លងកាត់បន្ទុកពន្ធនាំចូលទាំងស្រុង។
ការលើកលែងពន្ធទទួលបានការសរសើរពីក្រុមឧស្សាហកម្មជាច្រើន ប៉ុន្តែអ្នកខ្លះក៏បានសម្តែងការខកចិត្ត ដែលផលិតផលរបស់ពួកគេត្រូវបានដកចេញពីការលើកលែង៕
ចែករំលែកព័តមាននេះ