រាជធានីភ្នំពេញ ៖ កម្លាំងនគរបាលបានធ្វើការប្រដេញតាមចាប់រថយន្តតាក់ស៊ីម៉ែត្រក្រហមរហូតមានការផ្ទុះអាវុធចំនួន២គ្រាប់ ឃាត់បានអ្នកជិះក្នុងរថយន្ត២នាក់ បង្កការភ្ញាក់ផ្អើលកាលពីវេលាម៉ោង១២និង២០នាទីរំលងអធ្រាត្រ ឈានចូល ថ្ងៃទី១៤ ខែកុម្ភៈ ឆ្នាំ២០១៨ នៅចំណុចផ្លូវលេខ៣៦០ កែងនិងផ្លូវព្រះមុន្នីវង្ស ស្ថិតក្នុងសង្កាត់បឹកកេងកងទី៣ ខណ្ឌចំកាមន ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេបានឃើញរថយន្តម៉ាកហាយឡែនឌ័រ បើកបរដោយនគរបាល បានធ្វើការប្រដេញតាមរថយន្តម៉ាកព្រូស ពណ៌ក្រហម ពាក់ស្លាកលេខ ភ្នំពេញ ២AB-៣៥៩៦ ជារថយន្តតាក់ស៊ីម៉ែត្រក្រហម តាំងពីម្តុំផ្សារដេប៉ូមកម្ល៉េះ តែរថយន្តតាក់ស៊ីម៉ែត្រព្យាយាមបើកគេចខ្លួនជាច្រើនផ្លូវ រហូតមកដល់ចំណុចផ្លូវលេខ៣៦០ កែងនិងផ្លូវព្រះមុន្នីវង្ស ទើបខាងរថយន្តហាយឡែនឌ័រដកកាំភ្លើងម៉ាក AK បាញ់ចំនួន២គ្រាប់ ធ្វើឲ្យរថយន្តតាក់ស៊ីម៉ែត្រភ័យ ត្រូវរថយន្តហាយឡែនឌ័របើកកៀរឲ្យឈប់ ហើយចាប់បានមនុស្ស២នាក់ ជិះក្នុងរថយន្តវាយខ្នោះ ដាក់ចូលរថយន្តហាយឡែនឌ័រទៅបាត់ បន្សល់ទុករថយន្តតាក់ស៊ីម៉ែត្រនៅកន្លែងកើតហេតុ ។
បើតាមការបញ្ជាក់ពីសមត្ថកិច្ចមូលដ្ឋានបានឲ្យដឹងថា រថយន្តហាយឡែនឌ័រ គឺជាក្រុមកម្លាំងនគរបាលក្រសួងមហាផ្ទៃ ដែលធ្វើការតាមដានកំណត់មុខសញ្ញាជាយូរមកហើយ ពាក់ព័ន្ធនិងការជួញដូរគ្រឿងញៀន ។ ទោះជាយ៉ាងណា យើងមិនអាចបញ្ជាក់ពីសមត្ថកិច្ចឲ្យច្បាស់ពីមូលហេតុការចុះបង្ក្រាប និងឃាត់ខ្លួនជនសង្ស័យខាងលើឲ្យច្បាស់នៅឡើយទេ ។
បើតាមសម្តីសមត្ថកិច្ចខណ្ឌចំការមនវិញ បានឲ្យដឹងថា ករណីនេះ គឺពួកគាត់មិនបានដឹកថា ជាករណីអ្វីឲ្យបានច្បាស់លាស់ដែរ ។ ក្រោយកើតហេតុ រថយន្តតាក់ស៊ីម៉ែត្រត្រូវបានសត្ថកិច្ចបញ្ជូនទៅការិយាល័យក្រសួងមហាផ្ទៃ ដើម្បីធ្វើការស្រាវជ្រាវបន្ត ៕
ចែករំលែកព័តមាននេះ