រាជធានីភ្នំពេញ ៖ រ៉ឺម៉ូតូកង់បីមួយគ្រឿង បានធ្លាយទុយោប្រេង ឆាបឆេះយ៉ាងសន្ធោសន្ធៅ បណ្តាលអោយរងការខូចខាតស្ទើរទាំងស្រុង បន្ទាប់ពីម្ចាស់បើកចេញពីចាក់សាំងនៅស្ថានីយ៍ប្រេង ។
ហេតុការណ៍នេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ០៣រសៀល ថ្ងៃទី៣០ ខែមេសា ឆ្នាំ២០២៤ នៅតាមបណ្តោយផ្លូវ៥៩៨ ក្នុងសង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ ។
តាមសាក្សីបានអោយដឹងថា នៅមុនពេលកើតហេតុ គេឃើញ រ៉ឺម៉កម៉ូតូកង់៣បានបើកសុកៗ ស្រាប់តែភ្លើងបានឆាបឆេះយ៉ាងសន្ធោសន្ធៅ ភ្លាមៗ ប្រជាពលរដ្ឋនាំគ្នាជួយបាញ់ពន្លត់ និងបានហៅរថយន្តពន្លត់អគ្គិភ័យមួយគ្រឿងបានទៅអន្តរាគមន៍បាញ់ពន្លត់ទើបរលត់ ។
តាមម្ចាស់រ៉ឺម៉កម៉ូតូ បានអោយដឹងថា មុនពេលកើតហេតុគាត់បានជិះម៉ូតូរ៉ឺម៉ក ចូលទៅចាក់ប្រេងសាំង នៅស្ថាននីយ៍ប្រេងឥន្ធនៈមួយនៅក្បែរកន្លែងកើតហេតុ បន្ទាប់ពីចាក់ប្រេងរួចក៍បានបើកចាកចេញ បានបន្តិច ស្រាប់តែធ្លាយទុយោប្រេង បង្កជាអគ្គិភ័យតែម្តង ។
អ្នកបើកររូបនោះបានអោយដឹងទៀតថា ភ្លាមៗពេលឆេះតិចៗ គាត់បានបើកទៅខាងក្បែរក្លោងទ្វារបុរីប៉េងហួតហើយលោតចុះ ភ្លាមៗ សន្តិសុខ និងប្រជាពលរដ្ឋ ក៏បាននាំគ្នា ជួយបាញ់ពន្លត់ ខណៈនោះដែររថយន្តពន្លត់អគ្គិភ័យ ១គ្រឿង បានទៅអន្តរាគមន៍បាញ់ពន្លត់ផងដែរ។ រ៉ឺម៉កម៉ូតូ ត្រូវភ្លើងឆេះរងការខូចខាតស្ទើតែទាំងស្រុង បន្ទាប់ពីរលត់ ម្ចាស់ក៏បានទាក់ទងហៅ រ៉ឺម៉ូតូកង់៣ដូចគ្នា មកសណ្តោងត្រឡបទៅវិញ ៕
ចែករំលែកព័តមាននេះ