រាជធានីភ្នំពេញ ៖ ក្នុងជំនួបរវាងសិស្សច្បងពុទ្ធ ឆាយកុសល ជើងខ្លាំងមកពីក្លិបពុទ្ធសេរីវង្សកីឡា និងសិស្សប្អូនកែវ រំជោត មកពីក្លិបដំបងគ្រញូងខេត្តបាត់ដំបង កាលពីថ្ងៃអាទិត្យ ទី១៦ ធ្នូ កន្លងទៅនៅលើសង្វៀនបាយ័នបឹងស្នោ បានបង្ហាញយ៉ាងច្បាស់ថា ពុទ្ធ ឆាយកុសល នៅតែជារៀមច្បងដែលមានកម្លាំងយក្សដែលអាចបង្ខំឱ្យកែវ រំជោត ចុះចាញ់នៅទឹកទី២ ព្រោះមិនអាចបន្តការប្រកួតបាន ។
ពុទ្ធ ឆាយកុសល ដ្បិតថា ពេលខ្លះបង្ហាញឱ្យឃើញនូវក្បាច់គុនល្អ និងពេលខ្លះបង្ហាញឱ្យឃើញនូវភាពចុះខ្សោយ ក៏ឱកាសលេចមុខរបស់លោកក្នុងជំនួបជាមួយសិស្សប្អូនជាជើងខ្លាំងកែវ រំជោត ត្រូវគេមើលឃើញថា លោកធ្វើបានល្អ ។ គ្រាន់តែស្នូរជួងបន្លឺឱ្យប្រកួតគ្នានៅទឹកទី១ចាប់ផ្តើមភ្លាម កីឡាកររូបនេះហាក់វាយសម្រុកទៅលើដៃគូតែម្តង បណ្តាលឱ្យកែវ រំជោត បែករយះនៅចុងចិញ្ចើមខាងឆ្វេង ។ ឈានដល់ទឹកទី២ កែវ រំជោត មិនត្រឹមតែរយះត្រង់កន្លែងបែកកាន់តែធំប៉ុណ្ណោះទេ គឺលោកថែមទាំងត្រូវរាប់ និងត្រូវក្រុមគ្រូពេទ្យបង្ខំឱ្យលើកទង់សតែម្តង ដោយសារតែស្នាមរបួសហូរឈាមខ្លាំងពេកឆ្លងកាត់លើរង្វង់ភ្នែក ។ ម្នាក់ៗនិយាយថា ពុទ្ធ ឆាយកុសល ពិតជាខ្លាំងមែន ដែលអាចបង្ខំឱ្យកែវ រំជោត ទទួលយកការចុះចាញ់តែម្តងទាំងលោកមិនទាន់បញ្ចេញស្នៀតអស់ផង ។
ជាមួយនឹងការបរាជ័យដោយមិនអស់ចិត្តនេះ កីឡាករកែវ រំជោត អះអាងថា នឹងឡើងសងសឹកសាជាថ្មីដើម្បីកុំឱ្យសិស្សច្បងពុទ្ធ ឆាយកុសល មានអំនួតព្រោះតែលទ្ធផលនេះ ។ លោកចាត់ទុកថា ការបង្ខំចិត្តចុះចាញ់នៅទឹកទី២ គឺដោយសារតែលោកប្រហែសនៅដើមទឹក ហើយបណ្តោយឱ្យពុទ្ធ ឆាយកុសល វាយត្រូវមួយកែងរហូតរយះលើភ្នែកប៉ុណ្ណោះ បើកុំតែអីុចឹងលោកក៏មិនងាយដកថយចោលការប្រកួតនោះដែរ ក្នុងពេលដែលលោកខំស្ពាយស្នៀតមិនតិចក្បាច់មកពីផ្ទះ ហើយនៅមិនទាន់បានបញ្ចេញមួយក្បាច់នោះ ។ អ្នកទស្សនាខ្លះស្ទើរមិនទាន់ដឹងពីសមាសភាពរវាងគូទាំងពីរផង ស្រាប់តែឃើញលោកអាជ្ញាកណ្តាលលើកដៃមិនឱ្យប្រកួតបន្ត ហើយប្រកាសថា ពុទ្ធ ឆាយកុស ឈ្នះដោយស្វ័យប្រវត្តិ ។ គេមិនដឹងថា ក្នុងពេលពួកគេឡើងរេញដើម្បីសងសឹកគ្នាជាលើកទី២ តើលទ្ធផលនឹងស្រួលដឹងពីការឈ្នះចាញ់បែបនេះឬយ៉ាងណានោះទេ ក្នុងពេលដែលកែវ រំជោត សិស្សរួមគ្រូរបស់កែវ រំចង់ ក៏ត្រូវគេដឹងថា ជាជើងខ្លាំងដែលមិនអាចមើលស្រាលបាននោះ ។
នៅថ្ងៃនោះដែរ កីឡាការិនីកូយ ស្រីចាន់ ជើងខ្លាំងមកពីក្លិបបាគងខេត្តសៀមរាប បានទទួលជោគជ័យលើកីឡាការិនីលឿម ចំរុ៉ង មកពីក្លិបពន្លឺសាមគ្គីខេត្តបាត់ដំបង ។ តាមរយៈលទ្ធផលនេះបញ្ជាក់ថា ក្នុង៤ប្រកួតដែលពួកនាងជួបគ្នាគឺលឿម ចំរ៉ុង ធ្លាប់ឈ្នះ២ប្រកួតដំបូង និងកូយ ស្រីចាន់ បានឈ្នះ២ប្រកួតចុងក្រោយ ដែលស្តែងកាន់តែច្បាស់ថា លឿម ចំរ៉ុង នៅតែមិនអាចស្តារមុខមាត់បានដូចការតាំងចិត្ត ។
ចំណែកគូប្រកួតផ្សេងទៀត គឺកីឡាករចាន់ សីុដា មកពីក្លិបនិរោធមានជ័យ ចាញ់ពិន្ទុកីឡាករចៅ រិទ្ធ មកពីក្លិបបាត់ដំបងពាយ័ព្យ ។ កីឡាករឡៅ ចន្ទ្រា មកពីក្លិបកងពលតូចឆត្រយោង៩១១ វាយកីឡាករម៉ន ភិរម្យ មកពីក្លិបព្រែកឯងកីឡា ឱ្យសន្លប់នៅ ទឹកទី៤ និងមួយគូចុងក្រោយគឺកីឡាករ រិទ្ធ មុន្នី មកពីក្លិបកងទ័ពជើងគោក ឈ្នះកីឡាករចាន់ ប៊ុនលាភ មកពីក្លិបនិរោយធមានជ័យ ដោយពិន្ទុ ។ អ្នកទស្សនាបានសើចចំអកដល់កីឡាកររិទ្ធ មុន្នី មិនតិចឡើយ ដោយសារតែក្នុងពេលប្រកួតលោកសម្ញែងឱ្យឃើញនូវអំនួតពេក តែបែរជាបែកចិញ្ចើមក្រោមដៃចាន់ ប៊ុនលាភ វិញ ដែលអាចនិយាយបានថា លោកឈ្នះដោយមិនទទួលបានការគាំទ្រភាគច្រើនឡើយពីរង្វង់អ្នកទស្សនាដោយផ្ទាល់ ៕
ចែករំលែកព័តមាននេះ