តាមប្រភពព័ត៌មាន Daily Mail បានឲ្យដឹងថា កីឡាករជើងខ្លាំងដែលមនុស្សភាគច្រើនចាត់ទុកថា ជាកីឡាករបាល់ទាត់ល្អបំផុតនាពេលបច្ចុប្បន្ននេះបានបញ្ចេញឈ្មោះជើងខ្លាំងជំនាន់ក្រោយដែលអាចចូលមកដណ្តើមពាន Ballon d’Or ពីរូបលោក និង Ronaldo បានក្នុងឆ្នាំនេះ ។
ក្នុងរយៈពេល១០ឆ្នាំមកនេះពាន Ballon d’Or ត្រូវបានដណ្តើមគ្នាទៅវិញទៅមករវាងតែកីឡាករជើងខ្លាំងពីរនាក់ប៉ុណ្ណោះគឺ Messi និង Ronaldo ។ តែពេលនេះ Messi បានបង្ហើបប្រាប់ឈ្មោះជើងខ្លាំងជំនាន់ក្រោយបីនាក់ដែលអាចចូលខ្លួនមកប្រជែងបាន ។ Lionel Messi បានប្រាប់ថា Neymar, Kylian Mbappe និង Luis Suarez សុទ្ធតែអាចមកប្រជែងជាមួយរូបលោក និង Cristiano Ronaldo បានក្នុងការដណ្តើមពាន Ballon d’Or ឆ្នាំ២០១៨ ។
ចំពោះជើងខ្លាំងទីមួយដែល Messi បញ្ចេញឈ្មោះគឺ Neymar ។ Neymar លេងបាល់បានយ៉ាងល្អឲ្យក្លិបអ្នកមានបារាំង PSG នៅរដូវកាលនេះ ។ គ្រាន់តែចូលប្រកួតបាន២៧ដងសោះ Neymar បានរកគ្រាប់បាល់បាន២៨គ្រាប់ ។ ម្យ៉ាងវិញទៀតកាលពីឆ្នាំ២០១៥ និង២០១៧ Neymar ជាប់លេខបីក្នុងការប្រជែងយកពាន Ballon d’Or ថែមទៀតផង ។
បើទោះបីជា Mbappe និង Suarez មិនធ្លាប់មានមុខនៅ Top 3 ក្តី ពួកគេជាកីឡាករលេងបានយ៉ាងល្អ ។
Mbappe រកគ្រាប់បាល់ឲ្យក្លិប PSG បាន១៥គ្រាប់ក្នុងការប្រកួត៣១លើក ខណៈដែល Suarez រកបាន១៩គ្រាប់ក្នុងការប្រកួត៣៣លើកឲ្យក្លិបអ្នកមានបុណ្យ Barcelona ៕
ចែករំលែកព័តមាននេះ