ខេត្តព្រះសីហនុ ៖ ខេត្តព្រះសីហនុ ស្ថិតនៅប៉ែកនិរតីនៃប្រទេសកម្ពុជា ។ ទីតាំងខេត្តជាប់តំបន់ឆ្នេរមានចម្ងាយ២៣០គីឡូម៉ែត្រ ពីរាជធានីភ្នំពេញ តាមបណ្តោយផ្លូវជាតិលេខ៤ និងចម្ងាយ២៦០គីឡូម៉ែត្រ តាមបណ្តោយផ្លូវជាតិលេខ៣ ព្រមទាំងមានផ្លូវដែកឆ្លងកាត់តាមខេត្តកណ្តាល ខេត្តតាកែវ និងខេត្តកំពត ។
ខេត្តព្រះសីហនុមានព្រំប្រទល់ខាងជើងជាប់ខេត្តកោះកុង ខាងកើតជាប់នឹងខេត្តកំពត និងខេត្តកំពង់ស្ពឺ ខាងត្បូង និងខាងលិចជាប់ឈូងសមុទ្រព្រះរាជាណាចក្រថៃ ។ ខេត្តព្រះសីហនុមានផ្ទៃដីសរុប២៦៥៨៩០គីឡូម៉ែត្រការ៉េ ផ្ទៃដី២/៣ជាដីព្រៃភ្នំ និងខ្ពង់រាប ។ ឆ្នេរសមុទ្រក្រុងព្រះសីហនុមានប្រវែង១០០គីឡូម៉ែត្រលាតសន្ធឹងនៅចន្លោះឆ្នេរសមុទ្រខេត្តកោះកុង និងខេត្តកំពត ។ នៅក្នុងសមុទ្រមានកោះតូចធំចំនួន៣២កោះ ដែលបច្ចុប្បន្នកោះមួយចំនួនកំពុងតែអភិវឌ្ឍន៍ ដោយក្រុមហ៊ុនឯកជនដែលទទួលសិទ្ធិបានក្នុងការវិនិយោគពីរាជរដ្ឋាភិបាលត្រូវបានរៀបចំជាកន្លែងសម្រាកលំហែកាយរបស់ភ្ញៀវទេសចរដោយឡែករដ្ឋបាលគ្រប់គ្រងមានក្រុងមួយនិងស្រុកបី ។
លោកដេត ណូ ប្រធានមន្ទីរវប្បធម៌និងវិចិត្រសិល្បៈកាលពីពេល ថ្មីៗកន្លងមកឲ្យដឹងតាមឯកសារចងក្រងអំពីប្រវត្តិនៃការករកើតខេត្តព្រះសីហនុថា ដំបូងឡើយបានយកឈ្មោះឆកកំពង់សោម មកដាក់ឈ្មោះខេត្តនៅក្នុងឆ្នាំ១៩៦២-១៩៧០-១៩៧៥-១៩៧៩ មានឈ្មោះថាក្រុងកំពង់សោម លុះដល់ឆ្នាំ២០០៨បានដូរឈ្មោះទៅជាក្រុងព្រះសីហនុ ។
លុះដល់ថ្ងៃទី២២ ខែធ្នូ ឆ្នាំ២០០៨បានប្តូរឈ្មោះពីក្រុងព្រះសីហនុ ទៅជាខេត្តព្រះសីហនុវិញ និងមានអនុក្រឹត្យកាត់ដែនដីស្រុកកំពង់សិលាមកពីខេត្តកោះកុងដាក់បញ្ចូលមកខេត្តព្រះសីហនុជាអ្នកគ្រប់គ្រងរដ្ឋបាលវិញ ។ ការប្តូរឈ្មោះទៅជាខេត្តព្រះសីហនុវិញដោយយកព្រះនាមសម្តេចព្រះនរោត្តម សីហនុ មកដាក់ ដោយសារតែការខិតខំប្រឹងប្រែងស្ថាបនាកសាងរបស់សម្តេចព្រះនរោត្តម សីហនុ បានបន្សល់ទុកសមិទ្ធផលជាច្រើនដែលមានតម្លៃមិនអាចកាត់ថ្លៃបានរហូតមកដល់សព្វថ្ងៃនេះ ។
នៅក្នុងឆ្នាំ១៩៦២ សម្តេចព្រះនរោត្តម សីហនុ បានកសាងរូបសំណាកសត្វ«តោញី ឈ្មោល» ដែលជាប្រភេទស្តេចសត្វម្រឹគី ម្រឹគា មួយគូកំពុងតែឈរបង្អួតខ្លួនដោយអំណាច ជាតំណាងឲ្យខេត្តព្រះសីហនុសក្តិសមទៅនឹងព្រះកិត្តិនាមដែល ព្រះបរមរតនកោដិ បានកសាងទុកឲ្យកូនចៅចៅទួតរបស់ព្រះអង្គ ភ្ញៀវទេសចរជាតិ និងអន្តរជាតិបានទស្សនា និងផ្តិតយករូបភាពដែលជាសមិទ្ធផលក្រោមស្នាព្រហស្តរបស់ព្រះអង្គក្នុងការបង្កើតខេត្តព្រះសីហនុ ។
នៅក្នុងមាត់ស្តេចសត្វតោមានគ្រាប់ឃ្លីដែលជាតំណាងឲ្យសក្តានុពលដ៏សំបូរបែបនៃសម្បត្តិធម្មជាតិរបស់ខេត្ត ដែលមានសក្តានុពលសេ្ឋកិច្ច។ កំពង់ផែស្វយ័ត តំបន់សេដ្ឋកិច្ចពិសេសអាកាសយានដ្ឋានអន្តរជាតិកងកេង និងឆ្នេរសមុទ្រដ៏ស្រស់ស្អាត ជាប៉ូលសេដ្ឋកិច្ចមួយក្នុងចំណោមប៉ូលសេដ្ឋកិច្ចទាំងបីក្នុងយុទ្អសាស្ត្រចតុកោណតំណាក់កាលទីបីរបស់រាជរដ្ឋាភិបាលកម្ពុជាដែលត្រូវបានកំណត់គោលដៅជាតំបន់សេថ្ឋកិច្ចពិសេសពហុបំណង នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ដោយសារតែខេត្តមានសក្តានុពលលើវិស័យទេសចរណ៍ ឧស្សាហកម្ម ពាណិជ្ជកម្មបានជំរុញឲ្យវិស័យអចលនទ្រព្យដីធ្លីមានហាងឆេងងើបឡើងខ្ពស់ជា បណ្តើរៗ ៕
ចែករំលែកព័តមាននេះ