អ្នកជំនាញ២នាក់រៀបរាប់ពីរបៀបចារសាស្ត្រាស្លឹករឹត
- សៀមរាប
ខេត្តសៀមរាប ៖ អតីតព្រះសង្ឃចំនួន៥នាក់រស់នៅភូមិត្នោតជ្រុំ ឃុំដូនកែវ ស្រុកពួក ខេត្តសៀមរាប
0:00
0:00
ខេត្តសៀមរាប ៖ អតីតព្រះសង្ឃចំនួន៥នាក់រស់នៅភូមិត្នោតជ្រុំ ឃុំដូនកែវ ស្រុកពួក ខេត្តសៀមរាប កំពុងបង្រៀនជំនាញចារស្លឹករឹតដល់យុវជនមួយចំនួនដែលមានចិត្តស្រលាញ់ផ្នែកនេះ ។ អ្នកជំនាញ២នាក់ក្នុងចំណោមនោះបានរៀបរាប់ឱ្យដឹងពីរបៀបចារសាស្ត្រាស្លឹករឹតនេះ ។
លោកព្រៀន ជ្រូក អាយុ២៧ឆ្នាំ មានបងប្អូនចំនួន៤នាក់ ស្រី២នាក់ ធ្លាប់បួសរៀននៅវត្ត«នាមរូប» នៅភូមិដូនអ៊ុន ឃុំដូនកែវ ស្រុកពួក ខេត្តសៀមរាប អំឡុងឆ្នាំ២០១៤ ។ ទន្ទឹមរៀនធម៌អាថ៌ លោកបានរៀនជំនាញចារសាស្ត្រាស្លឹករឹតពីអតីតព្រះគ្រូចៅអធិការដុក ឌឿម ។ ពេលសឹកមកវិញនៅឆ្នាំ២០២១ លោកជ្រូកយកផ្ទះរបស់ខ្លួនធ្វើជាកន្លែងបង្រៀនដល់យុវជនខ្មែរជំនាន់ក្រោយពីជំនាញចារគម្ពីរសាស្ត្រាស្លឹករឹត ក្នុងគោលបំណងឱ្យមានអ្នកបន្តវេន និងថែរក្សាយូរអង្វែងតទៅទៀត ។
ថ្មីៗកន្លងមកលោកព្រៀន ជ្រូក ឱ្យដឹងថា យុវតី និងយុវជន១០ទៅ២០នាក់ប៉ុណ្ណោះដែលចាប់អារម្មណ៍ជំនាញចារសាស្ត្រាស្លឹករឹត ។
លោកព្រៀន ជ្រូក រំឭកថា ក្នុងពេលបួសរៀននៅវត្ត«នាមរូប» បានរៀនចារស្លឹករឹតនេះ ដោយគេស្លឹករឹតពីអ្នកស្រុកអង្គរតម្លៃពី១០ម៉ឺនរៀលទៅ១៦ម៉ឺនរៀល ។ លាងទឹកឱ្យស្អាតរួចដាក់ហាលថ្ងៃ ទើបយកស្លឹករឹតច្រៀកឱ្យតូចល្មម។ បន្ទាប់មកយកខ្សែនីឡុងអូសជាបន្ទាត់ រួចយកឈើមកកៀបឱ្យវាតឹង ។ នៅពេលយប់ដាក់ហាលទឹកសន្សើមឱ្យលាតល្អ ទើបយកវាទៅជូតឱ្យស្អាត និងចងជាដុំចំនួន៥០ទៅ១០០សន្លឹក ។
ពេលចាររួចហើយ យកក្រណាត់ ឬក្រដាសលុប ឬជូតនឹងជ័រទឹកលាយជាមួយម្រេញភ្លើង ឬធ្យូង ដើម្បីឱ្យចេញជាអក្សរ ។
បច្ចុប្បន្នលោកព្រៀន ជ្រូក កំពុងប្រឹងប្រែងបង្ហាត់បង្រៀនចារសាស្ត្រាស្លឹករឹតដល់យុវជន-យុវតីដោយឥតគិតថ្លៃ ។ លោកថ្លែងថា«ខ្ញុំចង់ឱ្យកូនខ្មែរជំនាន់ក្រោយបានឃើញ និងស្គាល់ពីតម្លៃរបស់សាស្ត្រាស្លឹករឹតដែលបុព្វបុរសខ្មែរបានប្រើប្រាស់ ចារជាគម្ពីរប្រវត្តិសាស្ត្រ និងក្បួនច្បាប់ ផ្សេងៗជាច្រើនជាយូរលង់មកហើយ។ ការខិតខំបង្រៀនជំនាញចារសាស្ត្រាស្លឹករឹតដល់យុវជនខ្មែរជំនាន់ក្រោយឱ្យមានចំណេះដឹងបន្ត ដោយសារតែបច្ចុប្បន្នជំនាញចារសាស្ត្រាស្លឹករឹត បានបាត់បង់ទៅស្ទើរតែទាំងស្រុងនៅក្នុងសង្គមខ្មែរសម័យថ្មី ។
ជំនាញចារសាស្ត្រាស្លឹករឹត គឺត្រូវមានចិត្តអត់ធ្មត់ធ្វើអារម្មណ៍យើងឱ្យស្រលាញ់ និងផ្តោតការយកចិត្តទុកដាក់ជាខ្លាំង ។ ដូច្នេះអ្នកដែលចង់សិក្សារៀនសូត្រពីជំនាញចារសាស្ត្រាស្លឹករឹតទាល់តែមានចិត្តស្រលាញ់ចង់ចេះ ចង់ដឹងច្បាស់លាស់ទើបអាចធ្វើបាន» ។
លោកព្រៀន ជ្រូក លក់សាស្ត្រាស្លឹករឹតក្នុង១ដុំតម្លៃ២០០ទៅ៣០០ដុល្លារ ។ លោកបានសំណូមពរ ដល់អ្នកស្រលាញ់សិល្បៈវប្បធម៌ទាំងក្នុងនិងក្រៅប្រទេស ជួយទិញសាស្ត្រាស្លឹករឹតដែលលោកខិតខំចារនេះផង ។
រីឯលោកហេង យុន អាយុ៣៧ឆ្នាំ មានប្រពន្ធ និងកូនចំនួន២នាក់ ចាប់ផ្ដើមចារសាស្ត្រាស្លឹករឹតប្រមាណជាង១០ឆ្នាំមកហើយ ។ លោកចេះជំនាញនេះពីគ្រូជាមួយលោកព្រឿន ជ្រូកដែរ ។ ក្រៅពីរបរនេះលោកធ្វើជាអាចារ្យការផងដែរ ។
លោកហេង យ៉ុន បញ្ជាក់ថា ស្លឹករឹតដែលលោកប្រើប្រាស់ គឺលោកបានទៅកាប់នៅក្នុងព្រៃអង្គរ និងទិញពីអ្នកអង្គរក្នុង១ដុំ ពី១០ទៅ១៥ម៉ឺនរៀល ។
លោកយកស្លឹករឹតលាងទឹកឱ្យស្អាតរួចកាត់តម្រឹមដាក់ហាលថ្ងៃឱ្យស្ងួតរយៈពេល១៥ថ្ងៃ ។ បន្ទាប់ពីហាលទឹកសន្សើមឱ្យស្លឹករលាតហើយ ជូតឱ្យជ្រះជាតិម្សៅទើបយកចង ជាដុំៗ និងកៀបឱ្យតឹង ។ បន្ទាប់ពីឆ្អើរភ្លើងរួចទើបដោះចេញវិញ ។
ក្រោយមកយកពុម្ភ ឬខ្នាតចោះប្រហោងតូចៗចំនួន២ក្នុងមួយសន្លឹក ទើបយកកៀបចូលឃ្នាបពុម្ភវិញ ដើម្បីឈូសវាឱ្យស្អាតកើតជាសន្លឹកតាមទំហំខ្នាតដែលយើងចង់បាន ។ បន្ទាប់ពីឈូសជាស្លឹកហើយ យកចងជាបាច់ក្នុង១ដុំចំនួន១០០សន្លឹក ។
ស្លឹករឹត នីមួយៗត្រូវវាយជាបន្ទាត់ទាំងសងខាង រួចហើយទើបចាប់ផ្តើមសរសេរ ឬ ចារជាអក្សរតាមបន្ទាត់នោះ ។ ការសរសេរ ឬចារបានមួយខ្សែ ឬមួយគម្ពីរ យកទៅលុប ឬជូតនឹងជ័រទឹកដែលលាយជាមួយម្រេញភ្លើង ទើបបោសសំអាតនឹងកន្ទក់ដើម្បីឱ្យវាចេញជាអក្សរ។ បន្ទាប់មកបាញ់ថ្នាំពណ៌ទឹកមាស ឬទឹកប្រាក់៕
ចែករំលែកព័តមាននេះ