កីឡាករអាល្លឺម៉ង់អាទ័រ អាប្រាហាំការពារបានដោយជោគជ័យនូវខ្សែក្រវាត់ស្ថាប័ន WBOទម្ងន់ ៧៦,២គីឡូក្រាមរបស់ខ្លួនក្រោយពីបានយកឈ្នះកីឡាករបារាំងមេឌី ប៊ូតឡាដោយបច្ចេកទេសក្នុងទឹកទី៨នៅសង្វៀន O2 World ក្រុងបែ៊រឡាំងប្រទេសអាល្លឺម៉ង់កាលពីរាត្រីថ្ងៃសៅរ៍ទី១៥ធ្នូ ។
កីឡាករអាល្លឺម៉ង់អាទ័រ អាប្រាហាំការពារបានដោយជោគជ័យនូវខ្សែក្រវាត់ស្ថាប័ន WBOទម្ងន់ ៧៦,២គីឡូក្រាមរបស់ខ្លួនក្រោយពីបានយកឈ្នះកីឡាករបារាំងមេឌី ប៊ូតឡាដោយបច្ចេកទេសក្នុងទឹកទី៨នៅសង្វៀន O2 World ក្រុងបែ៊រឡាំងប្រទេសអាល្លឺម៉ង់កាលពីរាត្រីថ្ងៃសៅរ៍ទី១៥ធ្នូ ។
ការប្រកួតត្រូវបានបញ្ចប់នៅនាទី ២:១១ក្នុងទឹកទី៨ក្រោយពីលោកអាជ្ញាកណ្តាលសញ្ជាតិអាមេរិក ម៉ាក នេលសុនពិនិត្យឃើញថា ប៊ូតឡាហូរឈាមស្រោចមុខនិងអស់លទ្ធភាពតបតជាមួយអាប្រាហាំ ។ នេលសុនបានបញ្ឈប់កីឡាករប៊ូតឡាម្តងរួចមកហើយក្នុងទឹកទី៧ដើម្បីឱ្យគ្រូពេទ្យពិនិត្យមើលរបួសរយះក្រោមភ្នែកខាងស្តាំ ។ ប៊ូតឡាដែលមានឯតទគ្គកម្មប្រកួតឈ្នះ២៦លើក ចាញ់៥លើក ផ្តួលដៃគូឱ្យសន្លប់១១លើកត្រូវបានគ្រូពេទ្យអនុញ្ញាតឱ្យបន្តការប្រកួត ប៉ុន្តែគេគ្មានអ្វីដែលគំរាមកំហែងដល់អាប្រាហាំទេ ។
អាប្រាហាំដែលមានឯតទគ្គកម្មប្រកួតឈ្នះ ៣៥លើក ចាញ់៣លើក ផ្តួលដៃគូឱ្យសន្លប់២៨លើកបានគ្រប់គ្រងការប្រកួតស្ទើរទាំងស្រុង។ ទោះជាយ៉ាងណា ការសម្រុកចូលរបស់គេត្រូវរារាំងដោយគ្រូបង្ហាត់ក្នុងទឹកទី៤ ។ លោក Ulli Wegnerយល់ថា វាមិនចាំបាច់សម្រុកខ្លាំងនោះទេ ខណៈការប្រកួតនៅសល់ជាច្រើនទឹកទៀត ។
បន្ទាប់ពីឈ្នះការប្រកួត អាប្រាហាំបានថ្លែងនៅចំពោះមុខអ្នកទស្សនា១ម៉ឺននាក់ថា ៖«នេះជាកន្លែងដែលខ្ញុំចាប់ផ្តើមអាជីពប្រដាល់ ។ បានមកប្រកួតនៅទីនេះក្នុងនាមជាជើងឯកពិភពលោកគឺពិតជាមិនអាចរកអារម្មណ៍ណាមកប្រៀបផ្ទឹមបានទេ ។ យើងមានរូបមន្តតែមួយគឺឈ្នះ ។ ប៉ុន្តែសម្រាប់កីឡាករប៊ូតឡាគេពិតជាមិនចង់បោះបង់ការប្រកួតទេ ។ គេចង់បន្តរហូតដល់ចប់១២ទឹក ។ ការវាយចេញរបស់គេធ្ងន់ ។ ឆ្នាំ២០១២ពិតជាអស្ចារ្យ ខ្ញុំបានក្លាយជាជើងឯកពិភពលោក ។ ខ្ញុំពិតជាសប្បាយចិត្តខ្លាំងណាស់ »។
ចំណែកប៊ូតឡាវ័យ៣០ឆ្នាំបានថ្លែងថា ៖«អាប្រាហាំវ៉ៃបានល្អណាស់ ។ គេសមពាក់ខ្សែក្រវាត់នេះ ។ គេប្រកួតក្នុងនាមជាជើងឯកខណៈខ្ញុំប្រកួតក្នុងនាមជាអ្នកដណ្តើមខ្សែក្រវាត់ ។ ដូច្នេះ ខ្ញុំគ្មានអ្វីដែលត្រូវខ្មាសអៀននោះទេ ។ វាពិតជាយុត្តិធម៌ដែលអាជ្ញាកណ្តាលបញ្ឈប់ការប្រកួត ។ អាប្រាហាំ ពិតជាមានកម្លាំងខ្លាំងហើយគេបានដាក់សម្ពាធលើខ្ញុំរហូត ។ ខ្ញុំបានគិតថា នឹងបំបិទមាត់គេ ប៉ុន្តែពេលប្រកួតទើបដឹងថា គេពិតជាពូកែ »៕
ចែករំលែកព័តមាននេះ