ចក្រភព​អង់គ្លេស ៖ យោង​តាម​សេចក្តីរាយការណ៍​ពី BBC និង Sky Sports របស់​ចក្រភព​អង់គ្លេស នៅ​ថ្ងៃ​ទី​១ ខែកញ្ញា ឆ្នាំ​២០២៥ បានឱ្យ​ដឹង​ថា ក្លិប Liverpool បាន​យល់ព្រម​លើ​តម្លៃ​ផ្ទេរ​កំណត់​ត្រា​ថ្លៃ​បំផុត​នៅ​ក្នុង​ប្រវត្តិសាស្ត្រ​បាល់ទាត់​អង់គ្លេស ១២៥​លាន​ផោន ឬ ១៦៩​លាន​ដុល្លារ​អា​មេ​រិ​ក​ជាមួយ​ក្លិប Newcastle ដើម្បី​ចុះហត្ថលេខា​នាំ​យក​ខ្សែប្រយុទ្ធ​សញ្ជាតិ​ស៊ុ​យ​អែ​ត Alexander Isak មក​កាន់​ទឹកដី Anfield ។

ប្រភព​ជិត​ស្និទ្ធ​នឹង​កិច្ចព្រមព្រៀង​តម្លៃ​ដ៏​មហាសាល​នេះ បាន​បង្ហើប​ប្រាប់ BBC និង Sky Sports ថា កិច្ចព្រមព្រៀង​ផ្ទេរ​ខ្សែប្រយុទ្ធ​ឆ្នើម​ក្រុម​ជម្រើសជាតិ​ស៊ុ​យ​អែ​ត​រវាង Liverpool និង Newcastle ឥឡូវនេះ​បាន​ដំណើរការ​ប្រកបដោយ​ផ្លែផ្កា​ហើយ​។ Isak នឹង​ឆ្លងកាត់​ការ​ពិនិត្យ​សុខភាព​នៅ​ថ្ងៃ​ចន្ទ​នេះ មុន​នឹង​ចុះហត្ថលេខា​លើ​កុងត្រា​រយៈពេល​៦​ឆ្នាំ​ជាមួយ​ក្រុម​រហស្សនាម ហង្ស​ក្រហម ក្រុម​ការពារ​តំណែង​ជើងឯក English Premier League រដូវ​កាល​នេះ​។

មុន​ឈាន​ដល់​កិច្ចព្រមព្រៀង​ជា​ប្រវត្តិសាស្ត្រ​នេះ Liverpool បាន​ដាក់​សំណើ​ទឹកប្រាក់​ចំនួន ១១០​លាន​ផោន ឬ ១៤៨​លាន​ដុល្លារ កាលពីដើម​ខែសីហា​កន្លង​ទៅ ប៉ុន្តែ​ត្រូវ​បាន​ច្រានចោល​ដោយ Newcastle​។

នៅ​ពេល​ការ​ផ្ទេរ Alexander Isak សម្រេច​ជា​ផ្លូវការ ខ្សែប្រយុទ្ធ​កម្ពស់ ១,៩២​ម៉ែត្រ​វ័យ​២៥​ឆ្នាំ​រូប​នេះ នឹង​ក្លាយជា​កីឡាករ​ដែល​មាន​តម្លៃ​ផ្ទេរ​ថ្លៃ​បំផុត​ក្នុង​ប្រវត្តិសាស្ត្រ​បាល់ទាត់​អង់គ្លេស បំបែក​កំណត់​ត្រា​របស់​កីឡាករ Enzo Fernandez នៅ​ពេល​ក្លិប Chelsea ចាយ ១០៦,៨​លាន​ផោន ឬ ១៤៤​លាន​ដុល្លារ​អា​មេ​រិ​ក​នាំ​យក​ខ្សែបម្រើ​ក្រុម​ជម្រើសជាតិ​អា​ហ្ស​ង់​ទី​នរូ​ប​នេះ​ពី​ក្លិប Benfica មក​កាន់​ទឹកដី Stamford Bridge កាលពី​ឆ្នាំ ២០២៣​។

សូម​ជម្រាប​ថា ខ្សែប្រយុទ្ធ Alexander Isak បាន​ផ្លាស់​ពី​ក្លិប Real Sociedad នៅ​លី​គ​កំពូល​អេ​ស្ប៉ា​ញ​មក​ចូលរួម​ជាមួយ Newcastle United នៅ​លី​គ​កំពូល​អង់គ្លេស កាលពី​ឆ្នាំ​២០២២ នៅ​ក្នុង​តម្លៃ​ផ្ទេរ​កំណត់​ត្រា​របស់​ក្លិប ៦៣​លាន​ផោន ឬ ៨៥​លាន​ដុល្លារ​។ បង្ហាញខ្លួន​សរុប ១០៩​ប្រកួត ស៊ុត​បញ្ចូល​ទី ៦២​គ្រាប់ Isak រួមចំណែក​យ៉ាង​សំខាន់​ជួយ Newcastle តាម​រយៈ​ការ​ស៊ុត​បញ្ចូល​ទី​១​គ្រាប់​យកឈ្នះ​លើ Liverpool លទ្ធផល ២-១ គ្រង​ពានរង្វាន់ EFL Cup រដូវ​កាល ២០២៤-២៥​។ ទម្រង់​ប្រយុទ្ធ​ដ៏​មុត​ស្រួច ជា​ពិសេស​ការ​បង្កើត​គ្រាប់​បញ្ចូល​ទី​របស់ Isak ជួយ Newcastle ឈ្នះ​កៅអី​ប្រកួត​ក្នុង​ពានរង្វាន់ UEFA Champions League រដូវ​កាល​នេះ និង​ជា​លើក​ដំបូង​ក្រោយ​ខកខាន​អស់​២០​ឆ្នាំ​៕