ខេត្តកំពង់ឆ្នាំង ៖ ប្រាសាទសក្ល ឬប្រាសាទប្រុស គឺជាប្រាសាទមួយក្នុងចំណោមប្រាសាទជាច្រើនក្នុងស្រុកកំពង់លែង ។ ប្រាសាទនេះសាងសង់ឡើងនៅទីទួលមួយនៅកណ្តាលវាលស្រែ ក្នុងភូមិកង្កែប ឃុំច្រណូក មានចម្ងាយប្រមានណជាង៣០គីឡូម៉ែត្រពីទីរួមស្រុកកំពង់លែង…
ខេត្តកំពង់ឆ្នាំង ៖ ប្រាសាទសក្ល ឬប្រាសាទប្រុស គឺជាប្រាសាទមួយក្នុងចំណោមប្រាសាទជាច្រើនក្នុងស្រុកកំពង់លែង ។ ប្រាសាទនេះសាងសង់ឡើងនៅទីទួលមួយនៅកណ្តាលវាលស្រែ ក្នុងភូមិកង្កែប ឃុំច្រណូក មានចម្ងាយប្រមានណជាង៣០គីឡូម៉ែត្រពីទីរួមស្រុកកំពង់លែង ។ ប្រាសាទសក្ល ស្ថិតនៅក្នុងភាពឯកាដោយគ្មានអ្នកទេសចរទៅកម្សាន្តទេ គឺមួយឆ្នាំម្តងទើបមានអ្នកភូមិទៅធ្វើបុណ្យជួបគ្នាម្តង ។
លោកសុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង ឱ្យដឹងកាលពីពេល ថ្មីៗកន្លងមកថា ប្រាសាទនេះឈ្មោះពិត គឺជាប្រាសាទប្រុស ប៉ុន្តែក្រោយមកអ្នកស្រុកបានហៅថា«ប្រាសាទសក្ល» តាមរឿងព្រេងនិទាន។ លោកមិនច្បាស់ថាពាក្យសក្ល ប្រែថាម៉េចទេ សូម្បីតែវចនានុក្រមសម្តេចសង្ឃរាជជួន ណាត មិនមានពាក្យនេះទេ ។ តាមការនិទាន តៗគ្នាពាក្យ«សក្ល» មានន័យថា ធ្វើមិនហើយសាច់ការ ធ្វើមិនទាន់ហើយជាដើម ។
តាមរឿងនិទានថាកាលពីដើមឡើយ មានការភ្នាល់គ្នារវាងបុរស និងនារី លើការសាងសង់ប្រាសាទ បើខាងប្រុសឈ្នះ ខាងស្រីទៅដណ្តឹងប្រុស តែបើខាងស្រីឈ្នះ ខាងប្រុសទៅដណ្តឹងស្រីវិញ ។ កាលនោះខាងប្រុសបានសាងសង់ប្រាសាទមួយ ដែលមានទីតាំងនៅទួលប្រាសាទខាងលើនេះ ចំណែកខាងស្រីបានកសាងប្រាសាទមួយនៅក្នុងវត្តប្រាសាទ ឃុំដា សព្វថ្ងៃនេះ ។
ខាងស្រីបានប្រើប្រាជ្ញារបស់ខ្លួន ដោយបានលើកគោមបង្ហោះឡើង ចំណែកខាងប្រុសបានឃើញភ្លើងគោមស្មានថាផ្កាយព្រឹករះ ក៏នាំគ្នាឈប់សាងសង់ប្រាសាទ ចំណែកខាងស្រីបានបន្តខំសាងសង់ រហូតព្រឹកឡើងឡើងបានរួចរាល់ និងបានឈ្នះខាងប្រុស ។ ដូច្នេះហើយទើបតាំងពីពេលនោះមកប្រពៃណីខ្មែរយើង ប្រុសទៅដណ្តឹងស្រី ។ ចាប់ពីពេលនោះមកប្រាសាទប្រុស ដែលធ្វើមិនទាន់ហើយ នៅសេសសល់ខ្លះ ទើបបានក្លាយឈ្មោះជាប្រាសាទសក្ល ឬមានន័យថា៖ ធ្វើមិនទាន់ហើយ ។
លោកសុខ ធួក បានបញ្ជាក់ថា ប្រាសាទសក្ល បានកសាងឡើងក្នុងចន្លោះសតវត្សទី៨ និងទី៩ ដែលមានអាយុកាលជាង១ពាន់ឆ្នាំ ដូចប្រសាទនានា ក្នុងស្រុកកំពង់លែងដែរ ។ ប្រាសាទនេះកសាងឡើងតាមរចនាបថកំពង់ព្រះ ។ គ្មានភ្ញៀវទេសចរទៅទស្សនាប្រាសាទសក្ល និងប្រាសាទមួយចំនួនក្នុងស្រុកកំពង់លែងទេ ហើយលោកសេង សាលី ប្រធានមន្ទីរទេសចរណ៍ខេត្តកំពង់ឆ្នាំង ឱ្យដឹងថា កន្លងមកមន្ទីរទេសចរណ៍ខិតខំសហការជាមួយដៃគូ បានធ្វើសៀវភៅបត់ បោះពុម្ពជាភាសាបរទេស សម្រាប់ណែនាំភ្ញៀវទេសចរឱ្យស្គាល់ពីកន្លែងកម្សាន្ត អាហារដ្ឋាននានា ក្នុងនោះប្រាសាទចំនួនពីរ គឺប្រាសាទកំពង់ព្រះ ក្នុងស្រុកបរិបូណ៌ និងប្រាសាទសក្ល ក្នុងស្រុកកំពង់លែង ក៏ត្រូវបានបោះពុម្ពបញ្ចូលដើម្បីណែនាំដល់ភ្ញៀវទេសចរបរទេសដែរ ។
លោកសេង សាលី បញ្ជាក់ថា «តាមគម្រោងក្នុងឆ្នាំ២០១៨នេះ មន្ទីរនឹងព្យាយាមជាមួយក្រុមហ៊ុន និងអង្គការជាដៃគូសិក្សាស្រាវជ្រាវពីប្រាសាទមួយចំនួនក្នុងស្រុកកំពង់លែង ដើម្បីផ្សព្វផ្សាយបន្ថែមទៀតតាមរយៈ បណ្តាញសង្គម តាមរយៈការបោះពុម្ពសៀវភៅផ្នត់សម្រាប់ភ្ញៀវទេសចរបរទេស និងផ្សព្វផ្សាយតាមរយៈផេករបស់មន្ទីរទេសចរណ៍ ដែលកំពុងមានអ្នកចូលទស្សនាជាច្រើននាក់ដើម្បីឱ្យទាំងភ្ញៀវជាតិ និងអន្តរជាតិបានស្គាល់ និងទៅទស្សនា » ។
លោកសំ ចាន់ថន អភិបាលស្រុកកំពង់លែង ឱ្យដឹងថា ប្រាសាទក្ល ក្នុងភូមិកង្កែបក្នុងមួយឆ្នាំម្តងអ្នកស្រុកជួបជុំគ្នាធ្វើបុណ្យឡើងអ្នកតានៅខែវស្សា ។ នៅឃុំច្រណូក មានពិធីបុណ្យបែបនេះ៣កន្លែង គឺនៅអ្នកតាកោះ នៅប្រាសាទក្ល និងនៅប្រាសាទពណ្ណរាយ ៕
ចែករំលែកព័តមាននេះ