មហាជន ជាពិសេសបណ្តាអ្នកលេងបណ្តាញសង្គមបានសម្តែងការភ្ញាក់ផ្អើលយ៉ាងខ្លាំង បន្ទាប់ពីគេបានឃើញរូបភាពតារាចម្រៀងរ៉េបទាំងពីរ គឺលោក ជី ដេវីដ និង វណ្ណដា បានជួបប្រាស្រ័យទាក់ទងគ្នាដោយផ្ទាល់មួយជាលើកដំបូង បន្ទាប់ពីពួកគេបានផ្ទុះជម្លោះពាក្យសម្តីជាមួយគ្នាមើលមុខគ្នាមិនចំអស់រយៈពេលប៉ុន្មានឆ្នាំចុងក្រោយនេះ…
មហាជន ជាពិសេសបណ្តាអ្នកលេងបណ្តាញសង្គមបានសម្តែងការភ្ញាក់ផ្អើលយ៉ាងខ្លាំង បន្ទាប់ពីគេបានឃើញរូបភាពតារាចម្រៀងរ៉េបទាំងពីរ គឺលោក ជី ដេវីដ និង វណ្ណដា បានជួបប្រាស្រ័យទាក់ទងគ្នាដោយផ្ទាល់មួយជាលើកដំបូង បន្ទាប់ពីពួកគេបានផ្ទុះជម្លោះពាក្យសម្តីជាមួយគ្នាមើលមុខគ្នាមិនចំអស់រយៈពេលប៉ុន្មានឆ្នាំចុងក្រោយនេះ ។
ជំនួបរបស់អ្នកទាំងពីរនេះបានកើតឡើង នៅក្នុងអំឡុងពេលដែលពួកគេបានទៅចូលរួមពិធីមង្គលការរបស់លោក វិសាល និង ស្រីនា កាលពីយប់ថ្ងៃទី២៨ ខែមីនា នេះ ។ ក្នុងអំឡុងពេលជួបគ្នានោះ គេបានឃើញលោក ជី ដេវីដ និងលោក វណ្ណដា បាននិយាយរកគ្នាទៅវិញទៅមក ដោយមានភាពរាក់ទាក់ចំពោះគ្នា ហាក់មិនមានជម្លោះអ្វីកើតឡើងនោះឡើយ ។ ជាការកត់សម្គាល់ ជំនួបរវាងតារារ៉េបដ៏មានឥទ្ធិពលនៅក្នុងស្រុកខ្មែរទាំងពីរនេះទំនងជាអាចកើតមានឡើងបានដោយសារការរៀបចំពីសំណាក់ពិធីការិនី គឺអ្នកនាង សាន សាណា ព្រោះនៅក្នុងជំនួបនោះក៏មានវត្តមានរបស់អ្នកនាងនៅកណ្តាលផងដែរ ។
យ៉ាងណា នៅក្នុងជំនួបនេះ គេនៅមិនទាន់ដឹងទេថា តារាទាំងពីរបាននិយាយអ្វីខ្លះជាមួយគ្នា ខណៈពេលដែលកោះសន្តិភាពមិនទាន់ទទួលបានការបញ្ជាក់ពីអ្នកនាង សាន សាណា ដែលស្ថិតនៅចំពោះមុខការសន្ទនារបស់អ្នកទាំងពីរអំឡុងពេលនោះ បាននៅឡើយទេ ក្នុងពេលការសាកសួរមិនទាន់មានការឆ្លើយតប ។ ប៉ុន្តែក្រោយមានជំនួបរបស់តារាចម្រៀងទាំងពីរអ្នកនាង សាន សាណា បានបង្ហោះសារខ្លីមួយតាមគណនេយ្យហ្វេសប៊ុកនាងថា បងសាណាស្រលាញ់ប្អូនទាំង២ណាស់ ។ សូមអោយគុណធម៌ស្ថិតក្នុងបេះដូងយើងទាំងអស់គ្នា ។ ពេលយើងចាស់ចិត្ត ចាស់គំនិត បន្តិចទៀត ទើបយើងដឹងថា គ្មានអ្វីប្រសើរជាងក្តីស្រលាញ់ដោយគ្មានការខឹងតបតអ្វីទាំងអស់ ព្រោះយើងដឹងថា ការពិតប៉ាម៉ាក់បានបង្កើតយើងអោយមានបេះដូងល្អបំផុត ។
ទោះជាយ៉ាងណាតាមរយៈការប្រាស្រ័យទាក់ទងគ្នាដោយផ្ទាល់រវាង ជី ដេវីដ និង វណ្ណដា នាពេលនោះបានធ្វើឲ្យទស្សនិកជន ជាពិសេសបណ្តាអ្នកគាំទ្រសម្តែងការសាទរ និងរីករាយយ៉ាងខ្លាំង ដោយនេះបង្ហាញពីសញ្ញាដ៏ល្អមួយសម្រាប់វិស័យចម្រៀងរ៉េបនៅកម្ពុជា ។ កន្លងមកមហាជនជាច្រើនតែងតែចង់ឃើញអ្នកទាំងពីរចាប់ដៃគ្នាកសាងស្នាដៃជាមួយគ្នា ដើម្បីធ្វើវិស័យចម្រៀងរ៉េបនៅកម្ពុជា អាចឈានឆ្ពោះលើឆាកអន្តរជាតិ ក្នុងពេលដែលអ្នកទាំងពីរសុទ្ធតែមានទេពកោសល្យលើផ្នែកមួយនេះ ។
គួរបញ្ជាក់ថា កាលពីពេលកន្លងទៅតារាចម្រៀងលោក ជី ដេវីដ និង វណ្ណដា បានផ្ទុះសង្គ្រាមជាពាក្យសម្តីដាក់គ្នារហូតមើលគ្នាមិនចំ ។ ជម្លោះនេះក៏ឈានទៅដល់ការចេញបទចម្រៀងបែបរ៉េប Diss track ជាមួយខ្លឹមសារបែបឌឺដងដាក់គ្នាទៅវិញទៅមកផងដែរ ។
ជាងនេះទៅទៀតបណ្តាអ្នកគាំទ្រតារាចម្រៀងទាំងពីរបាននាំគ្នាផ្លោងពាក្យសម្តីដាក់គ្នាទៅវិញមក បង្កើតជាជម្លោះពេញបណ្តាញសង្គម ។ ដោយឡែកសម្រាប់ជម្លោះរវាង វណ្ណដា និងជី ដេវីដ នាពេលនេះគេឃើញមានអ្នកសិល្បៈមួយចំនួនបានចេញមុខដើម្បីផ្សះផ្សារជម្លោះអ្នកទាំងពីរផងដែរ ។
តារាចម្រៀង សម្តែង និងអ្នកនិពន្ធលោក សួន ពិសិដ្ឋ ធ្លាប់បានលើកឡើងជាសំណូមពរទៅកាន់អ្នកទាំងពីរថា ប្អូនៗទាំងអស់ដែលជាសិល្បករជំនាន់ក្រោយៗក៏ពិតជាបានកសាងបង្កើតស្នាដៃក្នុងសិល្បៈតន្ត្រីចម្រៀង និងបង្ហាញនូវរូបភាពសិល្បៈវប្បធម៌ខ្មែរ ដែលរួមមានរក្សាអភិរក្ស និងអភិវឌ្ឍន៍ ទម្រង់សិល្បៈវប្បធម៌ខ្មែរ និងលាយឡំជាមួយ និងការវិវឌ្ឍលំហូរចូលនៃសិល្បៈចម្រុះវប្បធម៌នាសម័យកាលបច្ចុប្បន្ន បានយ៉ាងល្អល្អអស្ចារ្យរៀងៗខ្លួន និងបានបង្ហាញទៅដល់បណ្ដាប្រទេសដទៃជាអន្តរជាតិធ្វើឱ្យបរទេសស្ញប់ស្ញែង និងទទួលស្គាល់ ។
លោកបញ្ជាក់ថា ចូរប្អូនៗធ្វើជាគំរូល្អដល់មហាជនរាប់លាននាក់ដែលគាំទ្រប្អូនៗ គួរចាប់ឱ្យមាសឱកាសពេជ្រ ក្នុងពេលដែលប្អូនៗ កំពុងតែឡើងខ្ពស់កំពុងតែមានអ្នកស្រលាញ់ចូលចិត្តគាំទ្រច្រើន មកចាប់ដៃគា្នបង្កើតស្នាដៃជាមួយគ្នាចូលរួមជំរុញសិល្បៈតន្ត្រីចម្រៀងសិល្បៈវប្បធម៌ខ្មែរទៅឆាកអន្តរជាតិឱ្យកាន់តែអស្ចារ្យជាងនេះទ្វេៗដងទៀត! កុំធ្វើឱ្យបរទេសមើលមកថា ខ្មែរយើងមិនចេះស្រលាញ់គ្នា មិនចេះរួបរួម និងមានតែចិត្តច្រណែន ទោសៈ មោហៈ ដណ្ដើមលាភសក្ការៈគ្នាទៅវិញ ចង់ចាញ់ចង់ឈ្នះគ្នាទៅមកមិនចេះចប់មិនចេះហើយជាប្រវត្តិសាស្ត្រ! ។ ចូរប្អូនៗកើតមានចិត្ត មេត្តា ករុណា មុទិតា ឧបេក្ខា ចាប់ដៃគ្នា រួបរួមជាធ្លុងមួយបង្កើតតែងនិពន្ធផលិតស្នាដៃឱ្យកាន់តែល្អល្អះអស្ចារ្យ ធ្វើជាសិល្បករគំរូ ជាបុគ្គលគំរូដ៏ល្អដល់មហាជានបងប្អូនមិត្តអ្នកគាំទ្ររាប់លានអ្នកទាំងខ្មែរ ទាំងបរទេស!។
លោកបន្ថែមថា ទាំងប្អូន G-Devith ទាំងប្អូន Vannda គឺពិតជាមានទេពកោសល្យពិសេសអស្ចារ្យខ្លាំងណាស់រៀងៗខ្លួនដោយមិនច្រឡំគ្នានោះទេ! ហើយចុងក្រោយប្អូន Eno ក៏មានទេពកោសល្យអស្ចារ្យមួយដែរ ដែលមិនច្រឡំជាមួយអ្នកណា ទាំងសំឡេងទាំងកំប្លែងស្ងួតធ្វើឱ្យមនុស្សរាប់លានអ្នកសើចកំសាន្តសប្បាយរីរាយក្នុងជីវិត! ។
លោកថា ខ្ញុំស្រមៃមើលបើប្អូនៗចាប់ដៃគ្នាបង្កើតតែងនិពន្ធផលិតបទចម្រៀងស្នាដៃរួមគ្នាមិនដឹងជាអស្ចារ្យយ៉ាងណានោះទេ ? Hero ម្នាក់អាចធ្វើរឿងអស្ចារ្យមួយជួយការពារនៅក្នុងពិភពមួយតែប៉ុណ្ណោះ មានតែ Heroes ច្រើនទេដែលរួបរួមគ្នាជាធ្លុងមួយ ទើបអាចធ្វើរឿងកំពូលអស្ចារ្យការពារចក្រវាលទាំងមូលបាន ឧទាហរណ៍ដូចរឿង Hollywood AVENGERS អ៊ីចឹងជាដើម ។ ខ្ញុំសង្ឃឹមថាប្អូនៗនឹងយកពាក្យខ្ញុំទៅពិចារណា និងបើកចិត្តជារួម ហើយខ្ញុំជឿជាក់លើប្អូនៗគឺពិតជាអាចធ្វើបាន៕
ចែករំលែកព័តមាននេះ