រាជធានីភ្នំពេញ ៖ ហាងលក់រាយទូរស័ព្ទ និងគ្រឿងបន្លាស់យីហោមកពីប្រទេសវៀតណាម និងកំពុងពេញនិយមនៅក្នុងប្រទេសនោះ បានសម្លឹងមើលពីសក្ដានុពលក្នុងការបើកអាជីវកម្មរបស់ខ្លួននៅប្រទេសកម្ពុជា ដោយមានយុទ្ធសាស្ត្រពង្រីកទីផ្សារឱ្យបាន១០ទីតាំងនៅក្នុងរាជធានីភ្នំពេញ ក្នុងរយៈពេលពេញមួយឆ្នាំ២០១៨នេះ ។ បើតាមការបញ្ជាក់របស់លោក…
រាជធានីភ្នំពេញ ៖ ហាងលក់រាយទូរស័ព្ទ និងគ្រឿងបន្លាស់យីហោមកពីប្រទេសវៀតណាម និងកំពុងពេញនិយមនៅក្នុងប្រទេសនោះ បានសម្លឹងមើលពីសក្ដានុពលក្នុងការបើកអាជីវកម្មរបស់ខ្លួននៅប្រទេសកម្ពុជា ដោយមានយុទ្ធសាស្ត្រពង្រីកទីផ្សារឱ្យបាន១០ទីតាំងនៅក្នុងរាជធានីភ្នំពេញ ក្នុងរយៈពេលពេញមួយឆ្នាំ២០១៨នេះ ។
បើតាមការបញ្ជាក់របស់លោក Tran Kinh Daonh ម្ចាស់ភាគហ៊ុន និងអគ្គនាយកក្រុមហ៊ុន MWG JSC ដែលគ្រប់គ្រងហាងលក់រាយទូរស័ព្ទ និងគ្រឿងបន្លាស់ BigPhone បានឱ្យដឹងថា ការចូលមកក្នុងប្រទេសកម្ពុជា របស់ BigPhone មិនមានបំណងណាមួយផ្ដួលគូរប្រជែងរបស់ខ្លួននៅកម្ពុជានោះទេ ប៉ុន្តែ BigPhone នឹងពង្រីកខ្លួនឱ្យបានល្បី និងមានប្រជាប្រិយនៅកម្ពុជាឱ្យដូចនៅប្រទេសវៀតណាមដែរ ដោយទាញឱ្យអាជីវកម្មលក់រាយ ទូរស័ព្ទនៅកម្ពុជាកាន់តែពេញនិយម ។
លោក Tran Kinh Daonh បន្តថា ៖ «ហាង BigPhone នៅក្នុងប្រទេសវៀតណាម ជាហាងដែលមានប្រជាប្រិយ និងមានការទទួលស្គាល់ពីប្រជាជនវៀតណាមយ៉ាងខ្លាំង ជាក់ស្ដែងប្រាក់ចំណូលប្រចាំឆ្នាំ២០១៧ របស់ BigPhone ក្នុងប្រទេសវៀតណាម ទទួលបានជាង៣ពាន់លានដុល្លារអាមេរិក ក្នុងនោះដែរ ប្រាក់ចំណេញសុទ្ធនៅក្នុងឆ្នាំ ២០១៧ កន្លងទៅនេះ ក៏ទទួលបាន១០០លានដុល្លារអាមេរិកផងដែរ » ។
លោក Tran Kinh Daonh ម្ចាស់ភាគហ៊ុន និងអគ្គនាយកក្រុមហ៊ុន MWG JSC បន្តទៀតថា ដោយឡែកនៅក្នុងប្រទេសកម្ពុជាវិញក្នុងឆ្នាំ២០១៨នេះ BigPhone នឹងបើកឱ្យបាន១០ទីតាំងដោយគ្រោងនឹងចំណាយប្រាក់ប្រមាណ១,៥លានដុល្លារអាមេរិកនៅតាមបណ្ដាវិថីធំៗ និងតំបន់មានសក្ដានុពលខ្ពស់ និងសង្ឃឹមថា ក្នុង១ខែ នឹងទទួលបានចំណូលមុនចំណេញយ៉ាងហោចណាស់ ៧ម៉ឺន ទៅ៨ម៉ឺនដុល្លារអាមេរិកក្នុងមួយហាង ។
លោកមានប្រសាសន៍បន្ថែមថា ៖ « យើងសង្ឃឹមទៅលើអាជីវកម្មរបស់យើង នៅក្នុងប្រទេសកម្ពុជានឹងទទួលបានការគាំទ្រ ព្រោះយើងបានបើកនៅតែតាមបណ្ដោយមហាវិថីធំៗនៅក្នុងក្រុងភ្នំពេញ ដើម្បីឱ្យអតិថិជនងាយស្រួលចូលរកទំនិញណាដែលពួកគាត់ត្រូវការ» ។
លោកបន្ថែមថា ថ្វីត្បិតតែហាង BigPhone ជាប្រែនមកពីវៀតណាម តែរាល់ទំនិញ និងផលិតផលដែលដាក់លក់នៅក្នុងហាងនេះ គឺជាទំនិញនាំចូលពីប្រទេសល្បីៗ និងមានការសហការនាំចូលដោយក្រុមហ៊ុននាំចូលក្នុងស្រុករបស់កម្ពុជា ហើយក៏មានគ្រប់ម៉ាកគ្រប់ម៉ូដែលទូរស័ព្ទទាំងអស់ ដែលកំពុងចរាចរនៅលើទីផ្សារប្រទេសកម្ពុជា ដូចនេះហើយហាង BigPhone អាចទទួលស្វាគមន៍ភ្ញៀវគ្រប់ឋានៈ និងវណ្ណៈ ។
លោកបញ្ជាក់ថា នៅក្នុងប្រទេសវៀតណាម មានក្រុមហ៊ុនលក់ទូរស័ព្ទជាច្រើន ក៏ប៉ុន្តែហាង BigPhone នៅតែទទួលបានការគាំទ្រ និងមានកំណើនលក់ជាបន្តបន្ទាប់ ដោយឡែកនៅកម្ពុជាវិញ លោកមើលឃើញថា ការធ្វើអាជីវកម្មលើទូរស័ព្ទមិនមានច្រើនដូចនៅវៀតណាមទេ ដូចនេះហើយលោកមានក្តីរំពឹងខ្ពស់លើការលក់ និងកំណើនប្រចាំឆ្នាំរបស់ខ្លួន ។
លោក Tran Kinh Daonh ថា៖ «ត្រឹមរយៈពេល៣ឆ្នាំ យើងបានពង្រីកសាខាគ្រប់ខេត្តក្រុងទូទាំងប្រទេសចំនួន៦៨ខេត្ត-ក្រុង ហើយកម្ពុជាវិញ ដែលមានត្រឹមតែ២៥ខេត្ត-ក្រុង យើងគិតថា ៣ឆ្នាំក្រោយ យើងនឹងពង្រីកហាងរបស់យើងឱ្យបានគ្របដណ្ដប់ទូទាំងប្រទេសដែរ » ។
តាមសេចក្តីប្រកាសព័ត៌មានរបស់ក្រុមហ៊ុន MWG JSC បានបញ្ជាក់ផងដែរថា បច្ចុប្បន្ននេះ BigPhone នៅកម្ពុជាបានបើកដំណើរការចំនួន៤កន្លែងរួចហើយ និងគ្រោងបើកដំណើរការ ៤ហាងទៀតនៅពេលខាងមុខនេះ ដោយក្នុងហាងនីមួយៗត្រូវបោះទុនប្រមាណ១៥ម៉ឺនដុល្លារអាមេរិក ដោយមានទំហំធំៗ និងទូលាយ ងាយស្រួលដល់អតិថិជនក្នុងការដើររកទំនិញដែលខ្លួនត្រូវការ ។
សូមបញ្ជាក់ថា ជាមួយនឹងការបើកអាជីវកម្មរបស់ខ្លួននៅប្រទេសកម្ពុជា ក្រុមហ៊ុនបានរៀបចំក្រុមអ្នកសារព័ត៌មានមកពីវៀតណាម និងក្នុងស្រុកខ្មែរធ្វើទស្សនកិច្ចនៅហាងរបស់ BigPhone ក៏ដូចជាការធ្វើដំណើរកំសាន្តនៅតំបន់រមណីយដ្ឋាននានាក្នុងក្រុងភ្នំពេញផងដែរ ៕
ចែករំលែកព័តមាននេះ