ការស្រាវជ្រាវមួយធ្វើឡើងដោយក្រុមអ្នកវិទ្យាសាស្ត្រអង់គ្លេសបានរកឃើញថា ឪពុកម្តាយដែលប្រើអំពើហិង្សាវាយដំ ប្រើពាក្យសម្តីធំជេរប្រមាថលើកូនៗរបស់ខ្លួននឹងនាំឱ្យពួកគេប្រឈមនឹងគ្រោះថ្នាក់ដោយជំងឺផ្សេងៗពេលក្រោយក្នុងជីវិត ក្នុងនោះមានទាំងជំងឺមហារីកបេះដូង និងហឺតផងដែរ ។
ក្រុមអ្នកវិទ្យាសាស្ត្រដដែលអះអាងថា ការស្រែកសម្លុត និងវាយទោះក្នុងលក្ខណៈតិចតួចក្តីក៏អាចនាំឱ្យសុខភាពរបស់កុមារជួបនឹងការស្មុគស្មាញក្នុងរយៈពេលវែងដែរ ។ បញ្ហានេះព្រោះថា ភាពច្រឡោតរបស់ឪពុកម្តាយបានធ្វើឱ្យក្មេងជួបនឹងភាពតានតឹងក្នុងចិត្ត ( Stress) ។
ការជេរប្រទេចរាល់ថ្ងៃ ធ្វើឱ្យកម្រិតតានតឹងក្នុងចិត្តរបស់ក្មេងកាន់តែកើនឡើង ហើយទីបំផុតនាំទៅរកបញ្ហាសុខភាពធ្ងន់ ។
សាស្ត្រាចារ្យ Michael Hyland មកពីសាកលវិទ្យាល័យ University’s School of Psychologyដែលជាអ្នកដឹកនាំការសិក្សាបានបញ្ជាក់ថា ៖« ចាប់មានភាពតានតឹងក្នុងចិត្តពីវ័យក្មេងក្នុងទម្រង់ជាការភ័យរន្ធត់ខ្លាំង និងការធ្វើបាបត្រូវគេដឹងថានឹងបង្កើតបានការផ្លាស់ប្តូររយៈពេលវែងដែលបើកផ្លូវឱ្យជំងឺចូលទន្ទ្រានពេលក្រោយ ។ ការសិក្សានេះបង្ហាញថា នៅក្នុងសង្គមមួយដែលការដាក់ទណ្ឌកម្មលើរាងកាយត្រូវគេចាត់ទុកថា ជារឿងធម្មតា នោះការប្រើប្រាស់ទណ្ឌកម្មបែបនេះគឺពិតជាធ្វើឱ្យមានភាពតានតឹងគ្រប់គ្រាន់ល្មមទទួលបានផលប៉ះពាល់រយៈពេលវែងដូចគ្នាទៅនឹងភ័យរន្ធត់រួមទាំងការធ្វើបាបបំពានផ្លូវកាយផងដែរ »។
សាស្ត្រាចារ្យបន្ថែមថា ៖«លទ្ធផលនៃការស្រាវជ្រាវរបស់យើងនេះបានបន្ថែមនូវទស្សនវិស័យថ្មីមួយទៅលើភស្តុតាងដែលថា ការប្រើទណ្ឌកម្មរាងកាយជាបច្ច័យនាំទៅរកភាពតានតឹងក្នុងចិត្តរបស់កុមារ ហើយនៅពេលដែលវាក្លាយជាអ្នកបង្កើត Stress ទណ្ឌកម្មរាងកាយបានចូលរួមចំណែកបង្កើតចេញជាលទ្ធផលអវិជ្ជមានទាំងលើបុគ្គលម្នាក់ៗ និងទាំងលើសង្គមទាំងមូល »៕
ចែករំលែកព័តមាននេះ