រាជធានីភ្នំពេញ ៖ នៅល្ងាចថ្ងៃសៅរ៍ ទី២៧ មករា ឆ្នាំ២០១៨ នេះ ស្ថានីយទូរទស្សន៍ប៉ុស្ដិ៍លេខ៥ នឹងបើកការប្រដាល់ជាលក្ខណៈអន្តរជាតិនៅក្នុងទីតាំងរបស់ខ្លួនដែលស្ថិតនៅព្រែកកំពិស ម្ដុំព្រែកហូរជាយរាជធានីភ្នំពេញ បន្ទាប់ពីសង្វៀននេះទើបតែជម្រើសបានជើងឯកក្នុងចំណោម៣២រូបឱ្យក្លាយជាម្ចាស់ជើងឯកកាលពី២សប្ដាហ៍មុន ។ កីឡាករកម្ពុជា អ៊ុំ ចំរើន បានក្លាយជាសមាសភាពរបស់កម្ពុជាតែមួយរូបគត់ ដែលនឹងស្វាគមន៍ការប្រកួតអន្តរជាតិមួយនេះជាមួយកីឡាករថៃ ខណៈដែលការប្រកួតទាំងមូលក៏នឹងកាន់តែមានការចាប់អារម្មណ៍ថែមទៀត ដោយសារតែក្រៅពីការប្រកួតជាលក្ខណៈអន្តរជាតិរបស់កីឡាករទាំងពីរ ក៏មានការប្រកួតជម្រុះជើងឯកវគ្គថ្មីដែលទើបឈានដល់ការជម្រុះក្នុងសប្ដាហ៍ទី២ បន្ទាប់ពីរកឃើញកីឡាករ សៅ វណ្ណា ឱ្យគ្រងតំណែងជាជើងឯកកាលពី២សប្ដាហ៍មុន។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចតទៅ មានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនោះនិយមមកទស្សនាកកកុញ ស្របគ្នាដែលនៅប៉ុស្ដិ៍លេខ៥ក៏មានកំណើនអ្នករស់នៅច្រើនឡើងព្រោះតែសំណង់បុរីព្រោងព្រាតនោះផង ។ កីឡាករកម្ពុជា និងថៃ២រូប គឺ អ៊ុំ ចំរើន និងជើងខ្លាំងមកពីប្រទេសថៃ សាំង យុទ្ធ នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ។ អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបក៏ត្រូវប៉ះគ្នាក្នុងលក្ខណៈមិត្តភាព ដើម្បីបន្តការជម្រុះសម្រាប់សប្ដាហ៍ទី២ផងដែរ បន្ទាប់ពីព្រឹត្តិការណ៍ថ្មីទើបតែទម្លាក់កីឡាករ២នាក់ និងជ្រើសរើសបានអ្នកឈ្នះ២នាក់ក្នុងចំណោម៣២នាក់ឡើងអង្គុយកៅអី១៦នាក់ក្នុងជើងទី១។
ព្រឹត្តិការណ៍តែងបញ្ចូលការប្រកួតជាលក្ខណៈអន្តរជាតិមួយគូៗរវាងកីឡាករកម្ពុជា និងថៃមិនដែលខាន ទើបការប្រកួតជ្រើសរើសជើងឯកមួយនេះ ទទួលបានការចាប់អារម្មណ៍។
សម្រាប់ការប្រកួតអន្តរជាតិក្នុងសប្ដាហ៍នេះ កីឡាករកម្ពុជា និងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ មួយគូនេះ មានការចាប់អារម្មណ៍ភាគច្រើន ថានឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករ អ៊ុំ ចំរើន មិនសូវមានទម្លាប់ឡើងវ៉ៃលាក់ដៃស្រាប់ទៅហើយ។
លោក សេង កដិកា អ្នករៀបចំការប្រកួតប្រចាំនៅទូរទស្សន៍ប៉ុស្ដិ៍លេខ៥បានថ្លែងប្រាប់ថា ជំនួបអន្តរជាតិដែលបានធ្វើឡើងនឹងរន្ថើនព្រឹត្តិការណ៍ជើងឯកកាន់តែល្អថែមទៀត ក្នុងពេលដែលការប្រកួតជ្រើសរើសជើងឯកដែលទើបជម្រើសថ្មី និងទើបប្រកួតបានមួយសប្ដាហ៍ក៏ល្អ ដោយលោកបញ្ជាក់ថា អាចល្អជាងរដូវកាលទើបតែចប់ ដ្បិតថាពួកគេសុទ្ធតែក្មេង ហើយពេញកម្លាំង ។ ដើម្បីរំលេចការប្រកួតជម្រុះក្នុងសប្ដាហ៍នេះឱ្យកាន់តែទាក់ទាញហ្នឹងហើយទើបលោកសម្រាំងយកកីឡាករ អ៊ុំ ចំរើន ជាជើងខ្លាំងដែលធ្លាប់មានឈ្មោះបោះសំឡេងឱ្យឡើងប្រកួតមិត្តភាពជាមួយកីឡាករថៃ ។
បើទោះជាកីឡាករកម្ពុជាត្រូវប្រឈមនឹងកីឡាករថៃល្អជាគូប្រកួតសម្រាប់ការប្រកួតនេះ ក៏លោកនៅតែប្រកាសថា អ៊ុំ ចំរើន គឺជាជើងខ្លាំងពោរពេញដោយសមត្ថភាព ដែលអាចរំពឹងថាខ្លាំងនៅលើសង្វៀន ។ ជំនួបជាមួយកីឡាករថៃឈ្មោះ សាំង យុទ្ធ ដែលមិនធ្លាប់ប៉ះគ្នានេះ គឺជាជំនួបគូឯកអន្តរជាតិ ដោយការប្រកួតរបស់ពួកគេក៏មានការចាប់អារម្មណ៍មិនតិចនោះដែរ ដើម្បីរំលេចការប្រកួតរបស់ជើងខ្លាំង៤រូបដែលត្រូវប្រកួតគ្នាសម្រាប់វគ្គថ្មីក្នុងសប្ដាហ៍ទី២ ។
លោកថា ជំនួបរវាងពួកគេមិនមែនជារឿងធម្មតានោះទេ ដោយសារអ្នកណាឈ្នះក្រៅពីទទួលបានទឹកប្រាក់ច្រើនជាង ក៏ទទួលបានទំនុកចិត្តពីអ្នកគាំទ្រខ្លាំងជាងមុន ។ ផ្ទុយទៅវិញបើចាញ់ការប្រកួត គឺពិតជាមិនខុសពីបាក់មុខ និងមានការរិះគន់ធ្ងន់ធ្ងរនៅក្នុងស្រទាប់អ្នកចូលចិត្តកីឡាឡើយ ។ ក្នុងនោះកីឡាករកម្ពុជាក៏ធ្លាក់ចេញពីការទុកចិត្តរបស់អ្នកគាំទ្រដោយស្វ័យប្រវត្តិផងដែរ ប្រសិនបើការប្រកួតមិនល្អ ។
សម្រាប់ការប្រកួត៤នាក់ជាលក្ខណៈមិត្តភាពដែលជាការប្រកួតជម្រុះជើងឯកវគ្គថ្មីនៅសប្ដាហ៍ទី២នេះវិញរួមមានសុទ្ធសឹងតែជាកីឡាករល្អៗនៅក្នុងពិភពប្រដាល់តែម្ដង ដោយតាមការឱ្យដឹងគឺសមាសភាពថ្មីទាំង៣២រូបនោះ មានទាំងកីឡាករជើងចាស់ និងកីឡាករជើងថ្មី ។ លោក សេង កដិកា បញ្ជាក់ថា ការប្រកួតលើកនេះក៏មិនខុសពីរូបមន្តលើកមុននោះដែរ គឺអ្នកឈ្នះនឹងបានប្រកួតបន្ត ហើយសម្រាប់អ្នកចាញ់នឹងធ្លាក់ហាលអាវ ។
លោកចាត់ទុកថា អ្នកឈ្នះពីរនាក់ដែលបានឡើងអង្គុយក្នុងវគ្គបន្តគឺជាធនធានកីឡាករដ៏កម្រដែលមានសមត្ថភាពខ្ពស់នៅក្នុងសង្វៀនប្រដាល់ បើទោះជាគេមិនទាន់ល្បីឈ្មោះ និងស្ទើរបទពិសោធន៍ធៀបនឹងក្រុមរៀមច្បងក្ដី ។
លោកថា ភាគីម្ខាងៗសុទ្ធតែបានត្រៀមខ្លួន តែគេមិនទាន់ប្រាកដថាតើការតាំងចិត្តរបស់កីឡាកររូបណានឹងទទួលបានជ័យជម្នះសម្រាប់ការប្រកួតមួយនេះនៅឡើយទេ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងម្ខាងៗ សម្រាប់ការប្រកួត ។ ដោយឡែកនៅទូរទស្សន៍អាស៊ីអាគ្នេយ៍ ក៏មានការប្រកួតជាលក្ខណៈអន្តរជាតិផងដែរ ទាំងថ្ងៃសៅរ៍ និងថ្ងៃអាទិត្យចំនួន២សង្វៀន គឺរសៀលថ្ងៃសៅរ៍ និងព្រឹកថ្ងៃអាទិត្យ៕
ចែករំលែកព័តមាននេះ