រាជធានីភ្នំពេញ ៖ នាពេលចុងក្រោយ គេកត់សម្គាល់ថា កីឡាករ-កីឡាការិនីល្បីឈ្មោះភាគច្រើនទទួលជោគជ័យក្នុងការងារ និងមុខជំនួញខាងក្រៅគួរឱ្យសរសើរទើបធ្វើឱ្យកីឡាករ-កីឡាការិនីមួយចំនួនសម្រេចចិត្តបោះបង់អាជីពកីឡាតែម្ដង ។
អាជីពខាងក្រៅ និងមុខជំនួញទាំងនោះបានទាំងធ្វើឱ្យជីវភាពពួកគេម្នាក់ៗមានការឈានឡើងដោយមិនខ្វល់រឿងមានការប្រកួត ឬមានប្រាក់ខែពីសហព័ន្ធឬក៏អត់នោះផង បើទោះជាមានការលើកឡើងថា នោះជាមូលហេតុដែលនាំឱ្យកីឡាករ-កីឡាការិនីដែលនៅបន្តអាជីពកីឡាភាគច្រើនធ្លាក់ដៃក្ដី ។
+ ប្រាក់ មុន្នីឧត្តម ៖ កីឡាករបាល់ទាត់ជម្រើសជាតិរូបនេះ តាំងពីមានភរិយាមកលោកត្រូវគេចាត់ទុកថាជាកីឡាករដែលជោគជ័យម្នាក់ ដោយសារតែលោកក្រៅពីលេងបានល្អ ក៏មានជីវភាពកាន់តែប្រសើរព្រោះតែបានក្លាយជាម្ចាស់ហាងបោកអ៊ុតធំមួយនៅម្ដុំផ្សារចាស់ ។ មុខជំនួញរបស់លោក និងភរិយា គឺជាមុខជំនួញផ្ទាល់ខ្លួនក្រោយពេលរៀបការតែម្ដង ដោយមិនមែនជាមុខជំនួញរបស់គ្រួសារនោះទេ អ៊ីចឹងហើយទើបលោកកាន់តែឡូយឆាយ ហ៊ឺហា និងមិនភ័យរឿងអត់លុយ ឬបើកប្រាក់ខែពីក្លិប និងពីសហព័ន្ធមិនទាន់ដូចមុន ។
លោកបង្ហាញខ្លួននៅក្នុងហាងនោះយ៉ាងសាមញ្ញ ដើម្បីប្រឹងប្រែងរកលុយ ដោយក្រៅពីជួយមើលខុសត្រូវហាងនៅពេលការងារហ្វឹកហាត់ និងការងារចេញប្រកួតមិនទាន់មាន លោកជាអ្នកចាត់ចែងការងារទាំងស្រុងប្រចាំហាង បូករួមទាំងការរាក់ទាក់ភ្ញៀវ ការទទួល និងប្រគល់សម្លៀកបំពាក់ជូនភ្ញៀវវិញ គឺលោកធ្វើដូចគ្នានឹងតួនាទីរបស់ភរិយាដូច្នោះដែរ ដោយមិនប្រកាន់ថានោះជាមុខរបរបស់ស្រីៗ ហើយលោកជាកីឡាករបាល់ទាត់គិតតែរឿងម្យ៉ាង គឺប្រកួត និងហ្វឹកហាត់គ្រប់គ្រាន់នោះទេ។
មកទល់ពេលនេះ មានការអះអាងថា មុខរបរបើកហាងបោកអ៊ុតរបស់លោកទទួលបានជោគជ័យ ហើយភរិយារបស់លោកក្រៅពីបានបន្ថែមម៉ាស៊ីនបោកអ៊ុតឱ្យបានច្រើន ក៏មានគម្រោងពង្រីកសាខាថ្មីដើម្បីបង្កើនប្រាក់ចំណូលផងដែរ។
+ វ៉ន វីវ៉ា ៖ ក្រោយពីមានរបួសឡើងប្រកួតលែងកើត លោកបានចាប់អាជីពជាអ្នករត់តាក់ស៊ីគិតជាគីឡូ ដោយមានការអះអាងថា លោកមានរថយន្តជួលឱ្យអ្នករកស៊ីដូចខ្លួនគ្រាន់បានចំណូលបន្ថែមផង ។ លោកទទួលបានមុខរបរនេះ គឺបន្ទាប់ពីត្រូវគេដឹងថាលោកបានប្រកាសលក់ផ្ទះជួលមួយកន្លែងនៅម្ដុំសហគមន៍ក្រាំងធ្នុង និងមានការជួយជ្រោមជ្រែងពីសំណាក់គ្រួសារខាងភរិយា ដែលទទួលបានលុយកាក់មិនតិចម៉ឺនដុល្លារពីការប្រកួតឈ្នះម្ដងៗ ។
មកទល់ពេលនេះ មុខរបររបស់លោកមិនមែនគ្រាន់តែចេញរកឱ្យរស់ៗប៉ុណ្ណោះទេ ប៉ុន្តែមានការបញ្ជាក់ថា គឺរកបានប្រាក់ចំណូលច្រើនៗប្រចាំថ្ងៃប្រចាំខែ ទើបធ្វើឱ្យលោកលែងនឹកនាតែម្ដងនៅពេលគិតដល់ឱកាសចង់វិលត្រឡប់មកកាន់អាជីពកីឡាករប្រដាល់ជាថ្មី ។ លោកត្រូវគេអះអាងថា រកបានមិនក្រោមពាន់ដុល្លារនោះទេក្នុង១ខែពីការរត់ឡានតាក់ស៊ី ដោយសារតែក្នុងមួយថ្ងៃៗលោកមានសកម្មភាពរស់រវើកក្នុងការដឹកភ្ញៀវពីកន្លែងមួយទៅកន្លែងមួយ ហើយទទួលបានចំណែកពីក្រុមហ៊ុនដែលមានអាជ្ញាប័ណ្ណឱ្យលោកដឹកភ្ញៀវទៀតផង ។
+ បងប្អូនត្រកូលស៊ន៣នាក់ ៖ ក្រៅពីអាជីពកីឡា នាងស៊ន សៀវម៉ី ស៊ន ដាវីន និងលោក ស៊ន អេលីត គឺជាមន្ត្រីនគរបាលនៅនាយកដ្ឋានអង្គរក្សនៃក្រសួងមហាផ្ទៃ ដោយមុខតំណែងរបស់អ្នកទាំង៣គឺឡូយឡើងកប់តែម្ដង បើធៀបនឹងកីឡាករល្បីឈ្មោះមួយចំនួនទៀត ដែលមិនមានឱកាសបានក្លាយជាមន្ត្រីក្នុងក្របខ័ណ្ឌរដ្ឋ ។ ប្រាក់ខែរបស់បងប្អូនត្រកូលស៊នទាំង៣ក៏ក្រែលមិនធម្មតានោះដែរចាប់តាំងពីបានក្លាយជាមន្ត្រីរាជការពេញសិទ្ធិ ។ អ៊ីចឹងហើយទើបគេឃើញបងប្រុសបងស្រីស៊ន សៀវម៉ី សម្រេចចិត្តឈប់ធ្វើជម្រើសជាតិ ហើយសកម្មនឹងការងាររដ្ឋរបស់ខ្លួនទាំងស្រុង ។
មុខតំណែងដែលអ្នកទាំង៣ទទួលបាន ធ្វើឱ្យមានការកោតសរសើរយ៉ាងខ្លាំងក្នុងចំណោមកីឡាករ-កីឡាការិនីដូចគ្នា ជាពិសេសនៅពេលគេឃើញម្នាក់ក្នុងចំណោមពួកគេទាំង៣តែម្ដង បង្ហាញខ្លួនជាកងការពារគណៈប្រតិភូធំៗដែលមកទស្សនកិច្ចនៅកម្ពុជា។
+ ចូវ សុធារ៉ា ៖ អតីតកីឡាការិនីល្បីឈ្មោះខាងផ្នែកចំបាប់រូបនេះ ក៏កាលីបណាស់ដែរ ដោយសារតែនាងបានប្រឡងជាប់ជាគ្រូក្របខ័ណ្ឌពេញសិទ្ធិ ហើយបានបង្រៀនខាងមុខវិជ្ជាកីឡានៅក្នុងវិទ្យាល័យផ្សារដើមថ្កូវ ។ ថ្វីដ្បិតថាមុខរបររបស់នាងនៅតែពាក់ព័ន្ធនឹងការងារកីឡាកន្លងមក ប៉ុន្តែគេចាត់ទុកថាជាមុខរបរដែលដាច់ចេញពីជំនាញផ្នែកចំបាប់របស់នាងបាត់ទៅហើយ ក្នុងពេលដែលនាងបានសម្រេចលាឈប់ពីក្រុមជម្រើសជាតិ ក្រោយពីបានប្រឡងចូលគ្រូក្របខ័ណ្ឌខាងផ្នែកកីឡា ហើយក៏បានជាប់ជាស្ថាពរ ដោយនាងក៏បានហ្វឹកហាត់ និងទទួលបណ្ដុះបណ្ដាលខាងផ្នែកផ្សេងក្នុងការបង្រៀនដល់សិស្ស ដែលមិនមែនជាការបង្រៀនខាងផ្នែកចំបាប់ដូចដែលនាងមានជំនាញកន្លងមក។
នាងក៏ចាត់ទុកថាជាកីឡាការិនីដែលជោគជ័យម្នាក់ក្រោយបាត់បង់សមត្ថភាពឡើងប្រកួតលើឆាកអន្តរជាតិផងដែរ ដោយសារតែនាងមានការងារជាគ្រូបង្រៀននៅក្នុងវិទ្យាល័យ ហើយធ្វើឱ្យជីវភាពរបស់នាងល្អប្រសើរ មិនដូចកីឡាករ-កីឡាការិនីមួយចំនួនដែលក្រោយបោះបង់អាជីពសំខាន់មួយនេះក៏ធ្លាក់ខ្លួនលំបាក ឬក្រីក្រនោះ ។ នាងក៏ជិតរៀបការជាមួយគូដណ្ដឹងដែលបានស្រឡាញ់គ្នាជាយូរមកហើយផងដែរ ទើបកាន់តែធ្វើឱ្យជីវិតរបស់នាងជោគជ័យទ្វេដង បើទោះជាស្នាដៃក្នុងពិភពចំបាប់ដែលនាងធ្លាប់សាងហាក់ត្រូវបានគេបំភ្លេចបន្តិចម្ដងៗក្ដី។
ក្រៅពីកីឡាករ-កីឡាការិនីខាងលើ កីឡាករផ្សេងទៀតក៏ជោគជ័យសម្រាប់ជីវិតខាងក្រៅមិនខុសគ្នាផងដែរ ដោយគ្រាន់តែកីឡាករកីឡាការិនីផ្សេងទៀតមិនល្បីឈ្មោះ និងមានស្នាដៃគួរឱ្យកត់សម្គាល់ដូចអ្នកខាងលើ ទើបធ្វើឱ្យជីវិតឯកជនរបស់ពួកគេមិនស្ថិតក្នុងការតាមដានរបស់ស្រទាប់មហាជន៕
ចែករំលែកព័តមាននេះ