រាជធានីភ្នំពេញ ៖ ដើម្បីជំរុញដល់ការអភិវឌ្ឍក៏ដូចជាការធ្វើកំណែទម្រង់ឱ្យបានស៊ីជម្រៅនៅក្នុងសហព័ន្ធរបស់ខ្លួនឱ្យស្របទៅតាមគោលការណ៍របស់រាជរដ្ឋាភិបាលនិងក្រសួងអប់រំ យុវជន និងកីឡា សម្រាប់ត្រៀមប្រកួតកីឡាស៊ីហ្គេមឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះជាលើកដំបូង តើសហព័ន្ធកីឡាប្រដាល់សាកលកម្ពុជាមានផែនការយុទ្ធសាស្ត្រអ្វីខ្លះនៅក្នុងឆ្នាំ២០១៨នេះ។
លោក ប៊ុយ សោភ័ណ្ឌ អគ្គលេខាធិការសហព័ន្ធកីឡាប្រដាល់សាកលកម្ពុជា បានប្រាប់កោះសន្តិភាពឱ្យដឹងថា នៅក្នុងឆ្នាំ២០១៨នេះ សហព័ន្ធមានផែនការយុទ្ធសាស្ត្រច្បាស់លាស់ ហើយក៏ជាឆ្នាំដែលត្រូវចាប់ផ្ដើមអនុវត្តផែនការរដ្ឋបាល និងបច្ចេកទេសប្រកបដោយទម្លាភាព។
កាលពីឆ្នាំ២០១៧កន្លងទៅ នៅក្នុងសហព័ន្ធបានជួបនូវបញ្ហាប្រឈមមួយចំនួនដូចជាការងារហ្វឹកហាត់ ការងាររដ្ឋបាលនិងបច្ចេកទេស។ប៉ុន្តែនៅក្នុងឆ្នាំ២០១៨នេះ លោកសន្យាថានឹងរៀបចំឱ្យមានការធ្វើកំណែទម្រង់ឡើងវិញ មាននីតិវិធីក្នុងការដឹកនាំគ្រប់គ្រងច្បាស់លាស់ និងមានផែនការថ្មីៗជាច្រើនទៀតធ្វើយ៉ាងណាដើម្បីឱ្យមានការរីកចម្រើននៅក្នុងសហព័ន្ធ។ ដើមខែកុម្ភៈ ឆ្នាំ២០១៨នេះ ការប្រមូលផ្ដុំកីឡាករ កីឡាការិនីរបស់សហព័ន្ធកីឡាជាតិហ្វឹកហាត់ដែលជាគោលការណ៍របស់ក្រសួងអប់រំ យុវជននិងកីឡា បានចាប់ផ្ដើមដំណើរការឡើងវិញហើយ ។
ចំណែកសហព័ន្ធកីឡាប្រដាល់សាកលកម្ពុជា ក៏បានរៀបចំខ្លួនរួចរាល់អស់ហើយដែរក្នុងការត្រៀមកីឡាករ កីឡាការិនីទាំងឈុតធំនិងឈុតតូចចំនួន១៦នាក់ដែលក្នុងនោះមានកីឡាការិនី៥នាក់ដើម្បីធ្វើការហ្វឹកហាត់ជាមួយគ្នា ។ ចំពោះការប្រមូលផ្ដុំឆ្នាំនេះ សហព័ន្ធកីឡាប្រដាល់សាកលកម្ពុជា មានកីឡាករថ្នាល៨នាក់ក្នុងនោះមានស្រី៣នាក់ នេះបើតាមការឱ្យដឹងពីលោក វ៉ែន សុផល ជាគ្រូបង្ហាត់ក្រុមកីឡាប្រដាល់សាកលកម្ពុជា។ ដើម្បីឱ្យវិស័យកីឡាប្រដាល់សាកលមានគុណភាពខ្ពស់ និងស្វែងរកធនធានកីឡាប្រកបដោយសក្ដានុពល សហព័ន្ធបានជ្រើសរើសយ៉ាងសម្រិតសម្រាំងបំផុតដើម្បីយកមកហ្វឹកហាត់។
ម្យ៉ាងវិញទៀត គ្រូបង្ហាត់តែម្ដងមិនមែនចេះតែចាប់ដាក់ដូចកាលពីឆ្នាំមុនៗនោះទេ គឺត្រូវស្វែងរកគ្រូបង្ហាត់ណាដែលមានក្លិបត្រឹមត្រូវ និងជាអ្នកដែលមានស្នាដៃល្អនិងមានជំនាញច្បាស់លាស់ មានបទពិសោធន៍ធ្លាប់ធ្វើជាគ្រូបង្ហាត់ជាច្រើនឆ្នាំទៀតផង។
លោក ប៊ុយ សោភ័ណ្ឌ បានបញ្ជាក់ឱ្យដឹងទៀតថា ឆ្នាំ២០១៨នេះមិនត្រឹមតែពង្រឹងលើការហ្វឹកហាត់ ការងាររដ្ឋបាល និងការងារបច្ចេកទេសឱ្យបានល្អនោះទេ សំខាន់ជាងនេះទៅទៀតឆ្នាំនេះសហព័ន្ធមានផែនការជាច្រើនដែលត្រូវធ្វើដូចជាការបញ្ជូនកីឡាករទៅប្រកួតនៅក្រៅប្រទេស និងបញ្ជូនកីឡាករទៅហ្វឹកហាត់នៅក្រៅប្រទេសជាដើម ។ ក្នុងនោះសហព័ន្ធក៏បានត្រៀមបញ្ជូនកីឡាករទាំងឈុតធំនិងឈុតតូចឱ្យទៅចូលរួមប្រកួត៣ព្រឹត្តិការណ៍នៅក្រៅប្រទេស ដូចជាការទៅចូលរួមប្រកួតជ្រើសរើសជើងឯកប្រដាល់សាកលអាស៊ីនៅប្រទេសថៃជាដើម ដែលព្រឹត្តិការណ៍បែបនេះគេធ្វើឡើងជាច្រើនលើករួចមកហើយប៉ុន្តែកម្ពុជាយើងទើបតែទៅចូលរួមជាលើកដំបូងប៉ុណ្ណោះ ទោះបីយ៉ាងណាយើងសង្ឃឹមថានឹងទទួលបាននូវបទពិសោធន៍ល្អៗត្រឡប់មកវិញ ។
មួយវិញទៀត សហព័ន្ធក៏បានត្រៀមកីឡាករឈុតថ្នាលមួយចំនួនទៅចូលរួមប្រកួតជ្រើសរើសជើងឯកប្រដាល់សាកលអាស៊ានលើកទី១នៅប្រទេសហ្វ៊ីលីពីន តែលោកមិនទាន់ដឹងថាគេធ្វើនៅខែណានោះទេ ។ មួយព្រឹត្តិការណ៍ទៀតសម្រាប់ឈុតធំនឹងត្រូវទៅចូលរួមប្រកួតKing Cupនៅប្រទេសថៃក្នុងពេលឆាប់ៗខាងមុខនេះផងដែរ ។
សហព័ន្ធកីឡាប្រដាល់សាកលកម្ពុជាក៏បានត្រៀមស្នើទៅប្រទេសជប៉ុនដើម្បីបានបញ្ជូនកីឡាករ៥នាក់ទៅហ្វឹកហាត់រយៈពេលកន្លះឆ្នាំ និងបញ្ជូនគ្រូពីរនាក់ទៅទទួលការបណ្ដុះបណ្ដាលគ្រូកម្រិតផ្កាយ១នៅប្រទេសថៃដែលត្រូវធ្វើឡើងនៅខែមីនាខាងមុខនេះ។
លោក ប៊ុយ សោភ័ណ្ឌ បានឱ្យដឹងទៀតថា ការបញ្ជូនគ្រូទៅចូលរួមវគ្គបណ្ដុះបណ្ដាលគ្រូកម្រិតផ្កាយ១នេះទៀតគឺដោយសារតែយើងមានទំនាក់ទំនងល្អជាមួយប្រទេសថៃ គេក៏បានអញ្ជើញយើងឱ្យទៅចូលរួមតែម្ដង ហើយលោកក៏គិតផងដែរថា នេះជាលើកទី១ហើយដែលយើងមានគ្រូបង្ហាត់កម្រិតអន្តរជាតិ ។
អ្វីដែលសំខាន់ជាងនេះទៅទៀតនោះ នៅក្នុងឆ្នាំ២០១៨នេះ ដោយសារតែប្រទេសកម្ពុជាមានទំនាក់ទំនងល្អជាមួយប្រទេសចិន តាមរយៈការជួបពិភាក្សារវាងប្រមុខរាជរដ្ឋាភិបាលកម្ពុជាគឺសម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជាជាមួយថ្នាក់ដឹកនាំជាន់ខ្ពស់ប្រទេសចិនកាលពីពេលថ្មីៗកន្លងមកនេះ ដោយបានស្នើដល់ភាគីចិនជួយដល់វិស័យកីឡាកម្ពុជា កម្ពុជាបានត្រៀមបញ្ជូនកីឡា១០ប្រភេទទៅហ្វឹកហាត់នៅទីនោះមានរយៈពេល៥ឆ្នាំ ក្នុងនោះក៏មានប្រភេទកីឡាប្រដាល់សាកលផងដែរ ។
សហព័ន្ធក៏បានត្រៀមរួចជាស្រេចនូវអត្តពលិករបស់ខ្លួនចំនួន១០នាក់សម្រាប់ទៅហ្វឹកហាត់ ហើយការងារនេះតាមរយៈការទំនាក់ទំនងរវាងគណៈកម្មាធិការជាតិអូឡាំពិកកម្ពុជាជាមួយស្ថានទូតចិនប្រចាំកម្ពុជា ។ ប៉ុន្តែបើតាមការឱ្យដឹង ភាគីចិននៅមិនទាន់ឆ្លើយតបនៅឡើយនោះទេ ប្រហែលជានៅក្នុងពេលឆាប់ៗខាងមុខនេះហើយ៕
ចែករំលែកព័តមាននេះ