រាជធានីភ្នំពេញ ៖ ក្រោមវត្តមានសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិជាអធិបតី ការប្រកួតកីឡាកងយោធពលខេមរភូមមិន្ទ២០១៨ ដើម្បីអបអរសាទរទិវាបុណ្យជាតិ៧មករា កាលពីព្រឹកថ្ងៃទី១៣ មករា ឆ្នាំ២០១៨ គេបានរកឃើញជ័យលាភីជើងឯកនៅក្នុងការប្រកួតហើយ គឺលេខ១បានទៅលើបញ្ជាការដ្ឋានជាតិកម្លាំងពិសេសប្រឆាំងភេរវកម្ម, លេខ២បានទៅលើកងពលតូចទ័ពពិសេសឆត្រយោង និងលេខ៣បានទៅលើសាលានាយទាហានសកម្ម ។
កម្មវិធីប្រកួតកីឡាកងយោធពលខេមរភូមិន្ទ ធ្វើឡើងរយៈពេល៣ថ្ងៃ គឺនៅថ្ងៃទី១២, ១៣ និង១៤ ខែមករា ឆ្នាំ២០១៨ នៅកោះពេជ្រ ហើយការរៀបចំព្រឹត្តិការណ៍នេះ ដើម្បីអបអរសាទរខួបអនុស្សាវរីយ៍លើកទី៣៩ នៃទិវាជ័យជម្នះ ៧មករា (៧ មករា ១៩៧៩-៧ មករា ២០១៨) ដើម្បីរំលឹកឡើងវិញនូវគុណូបការៈរបស់មហាវីរភាពរណសិរ្សសាមគ្គីសង្គ្រោះជាតិកម្ពុជា និងដើម្បីបង្ហាញនូវសមត្ថភាព ចំណងសាមគ្គីភាពរវាងកងកម្លាំងប្រដាប់អាវុធគ្រប់ប្រភេទ រួមជាមួយមហាជន និងយុវជន ។ ការប្រកួតកីឡាកងយោធពលខេមរភូមិន្ទ ក៏ដើម្បីបង្ហាញទំនើបកម្មរបស់កងយោធពលខេមរភូមិន្ទ ដោយមានការដាក់តាំងពិព័រណ៍សម្ភារយោធា ដូចជាយន្តហោះ រថក្រោះ រថពាសដែក កាំភ្លើងយន្ត និងសម្ភារកងទ័ពជាច្រើនទៀត ដែលបម្រើដល់សេចក្តីត្រូវការរបស់កងទ័ព ។
លោកឧត្តមសេនីយ៍ឯក ហ៊ុន ម៉ាណែត មេបញ្ជាការរងកងទ័ពជើងគោក និងជាប្រធានដឹកនាំកម្មវិធីបានលើកឡើងថា ការរៀបចំព្រឹត្តិការណ៍តាំងពិព័រណ៍ និងប្រកួតកីឡាកងយោធពលខេមរភូមិន្ទឆ្នាំ២០១៨ដើម្បីអបអរសាទរទិវាបុណ្យជាតិ ៧មករា និងដើម្បីប្រមូលមូលនិធិគាំទ្រដល់សមាគមជាតិអតីតយុទ្ធជនកម្ពុជានេះ គឺជាការរៀបចំលើកទី២ហើយ ដែលក្រុមការងារទទួលបានការអនុញ្ញាតពីក្រសួងការពារជាតិ និងអគ្គបញ្ជាការដ្ឋានកងយោធពលខេមភូមិន្ទ ដោយអនុញ្ញាតឲ្យមានការចូលរួមពីមហាជន សិស្សនិស្សិត និងយុវជន យុវនារី ។ សម្រាប់ព្រឹត្តិការណ៍ឆ្នាំ២០១៨នេះ ក្រុមការងារបានរៀបចំឲ្យមានការដាក់តាំងពិព័រណ៍នូវផលិតផលពាណិជ្ជកម្ម និងយុទ្ធោបករណ៍របស់កងទ័ពជាមួយនឹងផលិត ផលរបស់ស្ថាប័នផ្សេងៗទៀត និងដោយមាន ការសំដែងសិល្បៈកម្សាន្តផ្សេងៗសម្រាប់មហាជនក៏ដូចជាកុមាររយៈពេល៣ថ្ងៃផងដែរ។
លោកឧត្តមសេនីយ៍ឯក ហ៊ុន ម៉ាណែតបានបន្តថា ការប្រកួតកីឡាកងយោធពលខេមរ
ភូមិន្ទឆ្នាំនេះ ក៏ដូចជាឆ្នាំមុនដែរ គឺធ្វើឡើងក្នុងគោលបំណងចំនួន៤៖
ទី១-ដើម្បីអបអរសាទរទិវាបុណ្យជាតិ៧មករា លើកទី៣៩ ដែលបានរំដោះប្រជាជាតិ យើងឲ្យរួចផុតពីរបបប្រល័យពូជសាសន៍
ទី២-ដើម្បីរំលឹកដល់គុណូបការៈនៃអតីតយុទ្ធជនខ្មែរយើងដែលបានលះបង់ជីវិត ដើម្បីបុព្វហេតុជាតិ មាតុភូមិ ហើយកម្មវិធីនេះ ក៏ដើម្បីប្រមូលមូលនិធិជួយដល់អតីតយុទ្ធជនផងដែរ
ទី៣-ដើម្បីឲ្យមហាជន ជាពិសេសយុវជនស្គាល់អំពីតម្លៃកងទ័ព និងសិក្សាស្វែងយល់ពីតួនាទី និងភារកិច្ច កាតព្វកិច្ចរបស់កងទ័ព ដែលជាតួអង្គប្រតិបត្តិករដ៏សំខាន់ នៅក្នុងកិច្ចការពារជាតិ ការពារបូរណភាពទឹកដី ការចូលរួមរាល់ដំណើរការកសាងសន្តិភាពជូនមាតុភូមិ និងលើកស្ទួយកិត្យានុភាពជាតិនៅលើឆាកអន្តរជាតិ និង
ទី៤-ដើម្បីផ្សារភ្ជាប់នូវទំនាក់ទំនងរវាងកងទ័ព មហាជន មន្ត្រីរាជការស៊ីវិល និងយុវជនយើងតាមរយៈការប្រកួតកីឡារួមគ្នា ។
លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជាបានកោតសរសើរដល់ការរៀបចំការប្រកួតកីឡាកងយោធពលខេមរភូមិន្ទនេះ ដោយអះអាងថា ដើម្បីទុកជាព្រឹត្តិការណ៍ប្រវត្តិសាស្ត្រ ឬជាទិវាជាតិប្រចាំឆ្នាំ និងជាវេទិកាជំនួបរវាងកងទ័ព និងប្រជាជន ។ លោកបញ្ជាក់ដែរថា ការយកវិស័យកីឡាជាស្ពានចម្លងទំនាក់ទំនងសង្គម នយោបាយ សេដ្ឋកិច្ច គឺជាមធ្យោបាយតែមួយគត់ក្នុងការស្វែងរកចំណងសាមគ្គីភាព ពន្លឺសន្តិភាព តាមរយៈវិស័យកីឡា ។ លោកបន្តថា វិស័យកីឡានេះ ក៏ធ្វើឲ្យកងទ័ពមានសុខភាពល្អ រឹងមាំ និងបានជំរុញទឹកចិត្តស្នេហាជាតិស្រឡាញ់ប្រជាជន ទឹកដី និងធ្វើអ្វីៗទាំងអស់ដើម្បីជាតិ និងមាតុភូមិ ។ កងទ័ពជាឆ្អឹងខ្នងដ៏រឹងមាំរបស់ប្រទេសជាតិ និងជាសសរស្ដម្ភនៃសុខសន្តិភាព និងស្ថិរភាពសង្គម។
នាឱកាសនោះ សម្តេចពិជ័យសេនា ទៀ បាញ់ បានថ្លែងបញ្ជាក់សាជាថ្មីថា ការប្រារព្ធព្រឹត្តិការណ៍កីឡាកងទ័ពជារៀងរាល់ឆ្នាំនេះក្នុងគោលបំណងអបអរសាទរខួបលើកទី៣៩ថ្ងៃជ័យជម្នះ៧មករា និងរម្លឹកឡើងវិញនូវគុណូបការៈវរកម្មាភិបាល យុទ្ធជន យុទ្ធនារីដែលបានលះបង់សាច់ស្រស់ឈាមស្រស់ អាយុជីវិតក្នុងបុព្វហេតុជាតិមាតុភូមិសំខាន់រំដោះប្រទេសជាតិឲ្យរួចផុតពីរបបប្រល័យពូជសាសន៍ប៉ុលពត ។ ទន្ទឹមនឹងនោះ ក៏បង្ហាញឲ្យឃើញអំពីការផ្សារភ្ជាប់អំពីតួនាទីភារកិច្ចរបស់យុទ្ធជនយុទ្ធនារីជំនាន់មុននិងជំនាន់នេះតាមរយៈព្រឹត្តិការណ៍កីឡាកងទ័ព។
លោកឧបនាយករដ្ឋមន្ត្រីបានបញ្ជាក់បន្ថែមថា ព្រឹត្តិការណ៍កីឡាកងទ័ពនាពេលនេះក៏បានរំលេចឲ្យឃើញនូវកម្លាំងមហាសាមគ្គីដ៏រឹងមាំរបស់សង្គមជាតិទាំងមូលដែលរាជរដ្ឋាភិបាលកម្ពុជាសម្រេចបានក្នុងរយៈពេល៣៩ឆ្នាំកន្លងទៅក្រោមការដឹកនាំរបស់រាជរដ្ឋាភិបាលដែលមានសម្តេចតេជោហ៊ុន សែន ជាប្រមុខ ។ លោកបានថ្លែងនូវការកោតសរសើរនិងវាយតម្លៃខ្ពស់ចំពោះក្រុមការងារដែលមានគំនិតផ្តួចផ្តើមរៀបចំព្រឹត្តិការណ៍កីឡាកងទ័ពដ៏មានសារៈសំខាន់នេះនិងមានការចូលរួមពីកងទ័ពគ្រប់លំដាប់ថ្នាក់ពីស្ថាប័នស៊ីវិលរួមទាំងមហាជនយុវជននិងដំណើរការប្រកួតប្រកបដោយជោគជ័យ ។
សម្តេចពិជ័យសេនា ទៀ បាញ់ បានចាត់ទុកព្រឹត្តិការណ៍កីឡាកងទ័ព និងការតាំងពិព័រណ៍កងទ័ពឆ្នាំនេះគឺជាការផ្តល់ឱកាសនិងលទ្ធភាពច្រើនដល់ស្រទាប់យុទ្ធជន យុទ្ធនារី សិស្ស និស្សិត ប្រជាជនទូទៅបានសិក្សាស្វែងយល់អំពីតួនាទីភារកិច្ចរបស់កងយោធពលខេមរភូមិន្ទ ហើយតាមរយៈនោះនឹងបង្កើតនូវទឹកចិត្តគោរពស្រឡាញ់កងទ័ព យល់ដឹងអំពីការអភិវឌ្ឍកងទ័ពនិងការអភិវឌ្ឍប្រទេស។
សម្តេចឧបនាយករដ្ឋមន្ត្រីបានកត់សម្គាល់ថា ព្រឹត្តិការណ៍កីឡាកងទ័ពឆ្នាំ២០១៨នេះ កីឡាករបានលើកយកមកបង្ហាញនូវប្រភេទកីឡាជាច្រើនដែលទាក់ទងនឹងកងទ័ព ប៉ុន្តែកីឡាដែលសំខាន់នោះគឺក្បាច់គុនបុរាណខ្មែរដែលបង្ហាញឲ្យឃើញពីការអភិរក្សនិងអភិវឌ្ឍន៍កេរដំណែលនៃក្បាច់គុនបុរាណខ្មែរដែលកងទ័ពបានប្រើប្រាស់តាំងពីសម័យបុរាណរហូតមកដល់សព្វថ្ងៃនេះ។
ទាក់ទងវិស័យកងទ័ពនេះផងដែរ សម្តេចក៏បានបញ្ជាក់ថា តួនាទីភារកិច្ចរបស់កងទ័ពក្រៅពីការងារស្នូលការពារបូរណភាពទឹកដី ការថែរក្សាសន្តិភាព ស្ថេរភាពនយោបាយ សន្តិសុខសណ្តាប់ធ្នាប់សង្គម ទប់ស្កាត់ឧបាយកល ចលនាបដិវត្តពណ៌របស់គណបក្សប្រឆាំងនោះ កងយោធពលខេមរភូមិន្ទបានចូលរួមចំណែកយ៉ាងសកម្មក្នុងការកសាងហេដ្ឋារចនាសម្ព័ន្ធ ការសង្គ្រោះគ្រោះមហន្តរាយ រួមទាំងការចូលរួមចំណែកជាកងកម្លាំងរក្សាសន្តិភាពរបស់អង្គការសហប្រជាជាតិថែមទៀត។
ជាការកត់សម្គាល់ក្រសួងបរិស្ថានក្រោមការដឹកនាំរបស់លោកសាយ សំអាល់ ជារដ្ឋមន្ត្រី ក៏បានចាត់បញ្ជូនលោកជា សំអាង អគ្គនាយកនៃអគ្គនាយកដ្ឋានរដ្ឋបាលការពារនិងអភិរក្សធម្មជាតិ លោក សុខខេង នវិន្ទ អគ្គនាយករង ព្រមទាំងមន្ត្រីឧទ្យានុរក្សចូលរួមក្នុងព្រឹត្តិការណ៍កីឡាកងយោធពលខេមរភូមិន្ទផងដែរ ។ ក្រសួងបរិស្ថានបានជ្រើសរើសវិញ្ញាសាប្រភេទ១ក្នុងចំណោម២ប្រភេទដែលមាន២២អង្គភាពចូលរួមប្រកួត ភាគច្រើនជាអង្គភាពកងកម្លាំងប្រដាប់អាវុធមកពីអង្គភាពនានាទូទាំងប្រទេសប្រកួតលើវិញ្ញាសាកម្ម៉ង់ដូរត់ចម្ងាយ៤គីឡូម៉ែត្រ សែងប្រង់ការរត់ចម្ងាយ២គីឡូម៉ែត្រ និងឆ្លងកាត់ឧបសគ្គ៧កន្លែងជាដើម ៕
ចែករំលែកព័តមាននេះ