រាជធានីភ្នំពេញ ៖ ការរស់នៅប្រចាំថ្ងៃរបស់មនុស្សយើង សុខភាពគឺជាបញ្ហាចម្បងបំផុត ព្រោះសុខភាពគឺជាទ្រព្យទី១ដែលមិនអាចខ្វះបានហើយក៏មិនអាចយកប្រាក់ទៅទិញបានដែរ ។ ហេតុដូច្នេះហើយទើបលោក មាស យ៉ានួរីស អ្នកស្រាវជ្រាវក្បាច់គុនបុរាណខ្មែរមួយរូបរស់នៅប្រទេសបារាំង…
រាជធានីភ្នំពេញ ៖ ការរស់នៅប្រចាំថ្ងៃរបស់មនុស្សយើង សុខភាពគឺជាបញ្ហាចម្បងបំផុត ព្រោះសុខភាពគឺជាទ្រព្យទី១ដែលមិនអាចខ្វះបានហើយក៏មិនអាចយកប្រាក់ទៅទិញបានដែរ ។ ហេតុដូច្នេះហើយទើបលោក មាស យ៉ានួរីស អ្នកស្រាវជ្រាវក្បាច់គុនបុរាណខ្មែរមួយរូបរស់នៅប្រទេសបារាំង សុខចិត្តចំណាយពេលវេលាដ៏មានតម្លៃនិងកម្លាំងកាយ-ចិត្តដោយមិនខ្លាចនឿយហត់ មកបង្ហាត់បង្រៀនវិធីចាប់សរសៃដល់ព្រះសង្ឃខ្មែរបានជាង១០០អង្គ តាំងពីលោកមកដល់ស្រុកខ្មែរជិត១ខែកន្លងមកនេះ។
លោក មាស យ៉ានួរីស បានឱ្យដឹងថា វិធីព្យាបាលចាប់សរសៃដែលលោកយកទៅបង្ហាត់បង្រៀនដល់ព្រះសង្ឃលើកចុងក្រោយមុនពេលចាកចេញទៅកាន់ប្រទេសបារាំងវិញលើកនេះ គឺនៅវត្តស្វាយជ្រំ ស្រុកខ្សាច់កណ្ដាល ខេត្តកណ្ដាល ដែលមានព្រះសង្ឃជាង៣០អង្គចូលរួម ។ ការបង្ហាត់បង្រៀនវិធីព្យាបាលចាប់សរសៃលើកនេះខុសប្លែកពីលើកមុនៗដោយប្រើប្រាស់ពេលវេលាប្រហែលមួយម៉ោងប៉ុណ្ណោះផ្ដោតសំខាន់ទៅលើដៃនិងជើងច្រើន ។
លោកថា មូលហេតុដែលលោកជ្រើសរើសយកព្រះសង្ឃជាគោលដៅចម្បងក្នុងការបង្ហាត់បង្រៀននាពេលនេះ ដោយលោកយល់ឃើញថា ព្រះសង្ឃក្រៅពីចេញទៅបិណ្ឌបាតនៅខាងក្រៅ គឺពុំបានបញ្ចេញកម្លាំងធ្វើឱ្យចលនានៃរាងកាយរត់បានស្រួលនោះទេ។ ម្យ៉ាងវិញទៀតព្រះសង្ឃក៏មិនអាចដើរឬរត់ហាត់ប្រាណដូចមនុស្សធម្មតាបានទេ មានតែវិធីនេះហើយដែលជួយសម្រួលសរសៃនិងបំបាត់ភាពស្ត្រេសនៅក្នុងខ្លួនបាន។
លោកស្រីអ៊ឹម ឌូ ទីប្រឹក្សាក្រសួងមហាផ្ទៃ មានប្រសាសន៍ក្នុងឱកាសនោះថា វិធីព្យាបាលចាប់សរសៃតាមបែបបុរាណខ្មែរ គឺជាសិល្បៈប្រពៃណីវប្បធម៌ជាតិខ្មែរដ៏រុងរឿងជាយូរលុងណាស់មកហើយ ។ ដូច្នេះសម្រាប់អ្នកដែលចេះជំនាញមួយនេះបានច្បាស់លាស់មិនត្រឹមតែបានរួមចំណែកក្នុងការថែរក្សាមរតកជាតិខ្មែរដ៏មានតម្លៃមួយនេះឱ្យស្ថិតស្ថេរគង់វង្សប៉ុណ្ណោះទេ ថែមទាំងអាចយកជំនាញមួយនេះទៅធ្វើមុខរបរស្វែងរកថវិកាជួយដល់ជីវភាពគ្រួសារក៏ដូចជារួមចំណែកជាមួយប្រមុខរាជរដ្ឋាភិបាលកម្ពុជាក្នុងការកាត់បន្ថយភាពក្រីក្ររបស់ប្រជាពលរដ្ឋយើងបានមួយកម្រិតថែមទៀតផង ៕
ចែករំលែកព័តមាននេះ