រាជធានីភ្នំពេញ ៖ នៅល្ងាចថ្ងៃសៅរ៍ ទី១៣ មករា ស្អែកនេះ ស្ថានីយទូរទស្សន៍ប៉ុស្ដិ៍លេខ៥ នឹងបើកការប្រដាល់ជាលក្ខណៈអន្តរជាតិទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិសម្ដុំព្រែកហូរជាយរាជធានីភ្នំពេញ។ កីឡាករកម្ពុជាដែលត្រូវគេស្គាល់ថាជាជើងខ្លាំងល្បីឈ្មោះ…
រាជធានីភ្នំពេញ ៖ នៅល្ងាចថ្ងៃសៅរ៍ ទី១៣ មករា ស្អែកនេះ ស្ថានីយទូរទស្សន៍ប៉ុស្ដិ៍លេខ៥ នឹងបើកការប្រដាល់ជាលក្ខណៈអន្តរជាតិទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិសម្ដុំព្រែកហូរជាយរាជធានីភ្នំពេញ។ កីឡាករកម្ពុជាដែលត្រូវគេស្គាល់ថាជាជើងខ្លាំងល្បីឈ្មោះ និងវ័យក្មេងពេញកម្លាំង ផាន់ ផាត់យុទ្ធ នឹងក្លាយជាសមាសភាពរបស់ កម្ពុជាតែមួយរូបគត់ ដែលនឹងស្វាគមន៍ការប្រកួតអន្តរជាតិមួយនេះជាមួយកីឡាករថៃ ។
ការប្រកួតទាំងមូលក៏នឹងទទួលបានការចាប់អារម្មណ៍ថែមទៀតដោយសារតែកីឡាករកម្ពុជា២រូបគឺសៅ វណ្ណា និង អ៊ុំ វណ្ណេត ក៏នឹងឡើងប្រកួតដណ្ដើមជើងឯកលេខ១ និងលេខ២ចុងក្រោយនៅថ្ងៃនោះដែរ ។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចស្អែកនេះ កីឡាករកម្ពុជានិងថៃ២រូបគឺ
ជើងខ្លាំងផាន់ ផាត់យុទ្ធ និងជើងខ្លាំងមកពីប្រទេសថៃឈ្មោះ Khi Ba នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ។ អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបត្រូវប៉ះគ្នាក្នុងវគ្គចុងក្រោយ នៃការដណ្ដើមខ្សែក្រវាត់ផងដែរ ដោយការប្រកួតរបស់គូខ្មែរមួយគូនោះ ហាក់មានការចាប់អារម្មណ៍ជាងគូអន្តរជាតិនោះផង។
លោក សេង កដិកា អ្នករៀបចំការប្រកួតប្រចាំនៅទូរទស្សន៍ប៉ុស្ដិ៍លេខ៥បានថ្លែងប្រាប់ថា ក្នុងចំណោមកីឡាករកម្ពុជា២រូបដែលត្រូវប្រកួតគ្នាយកតំណែងជើងឯក ក៏មានការប្រកួតជាលក្ខណៈអន្តរជាតិរវាងកីឡាករកម្ពុជា និងថៃ ២រូបដែលមានឈ្មោះល្បី ដែលភាគីកម្ពុជា គឺតំណាងដោយកីឡាករ ផាន់ ផាត់យុទ្ធ ផងដែរ ។ បើទោះជាការប្រកួតនេះ គេត្រូវប្រឈមនឹងកីឡាករថៃល្អ ក៏លោកនៅតែជឿជាក់ថា កីឡាករជើងខ្លាំងដែលមានសមត្ថភាពរូបនេះ នឹងធ្វើឱ្យកក្រើកសង្វៀនមិនខាន ។
ការប្រកួតរវាងកីឡាករទាំងពីរទទួលការចាប់អារម្មណ៍មិនតិចនោះទេដោយសារតែមានការប្រកួតរបស់ជើងខ្លាំង៤រូបជាលក្ខណៈដណ្ដើមជើងឯកនៅថ្ងៃនោះផងដែរ ។ លោកថា ជំនួបរវាងពួកគេមិនមែនជាការប្រកួតធម្មតានោះទេ ដោយសារអ្នកណាឈ្នះក្រៅពីទទួលបានទឹកប្រាក់ច្រើនជាង ក៏ទទួលបានទំនុកចិត្តពីអ្នកគាំទ្រដូចគ្នា ។ ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរតែម្ដងក្នុងចំណោមអ្នកគាំទ្រភាគច្រើនដែលតាមដានការប្រកួតរបស់អ្នកទាំងពីរ ។
លោកថា កីឡាករ ផាន់ ផាត់យុទ្ធ អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថា កីឡាកររូបនេះនឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួបរបស់គេជាមួយកីឡាករថៃជាដៃគូពិតជាមិនធម្មតាសម្រាប់ការប្រកួតទាំងមូល ។
លោកជឿជាក់យ៉ាងពេញទំហឹងចំពោះផាន់ ផាត់យុទ្ធ សម្រាប់ការប្រកួតនៅលើសង្វៀនអន្តរជាតិមួយនេះ ដោយលោករំពឹងខ្ពស់ថាគេនឹងមិនលាក់ថ្វីដៃតាំងពីទឹកទី១នោះផង ដោយសារតែកីឡាករថៃ គឺលោកបានស្គាល់រួចមកហើយថាជាកីឡាករល្អម្នាក់ ហើយមានទម្លាប់មិនលាក់ថ្វីដៃប្រកួតដូចគ្នា ។ អ្វីដែលសំខាន់ គឺអ្នកទាំងពីរសុទ្ធតែមានប្រវត្តិប្រកួតលើរេញអន្តរជាតិច្រើនលើករៀងខ្លួន ។
សម្រាប់ការប្រកួតដ៏សំខាន់ក្នុងវគ្គដណ្ដើមជើងឯក គឺ កីឡាករ អ៊ុំ វណ្ណេត ប្រកួតជម្រុះជាមួយកីឡាករ សៅ វណ្ណា ដោយអ្នកទាំងពីរសុទ្ធតែមិនទាន់ស្គាល់ចាញ់ការប្រកួតជម្រុះនៅប៉ុស្ដិ៍លេខ៥ដូចគ្នា ទើបការប្រកួតដ៏សំខាន់មួយនេះធ្វើឱ្យមានការចាប់អារម្មណ៍យ៉ាងខ្លាំងក្នុងស្រទាប់មហាជន ជាពិសេសអ្នកស្នេហាវិស័យប្រដាល់ដែលជាអ្នកតាមដាន ។ នេះជាការប្រកួតដណ្ដើមជើងឯកដ៏សំខាន់ ដែលអ្នកឈ្នះមិនត្រឹមតែបានឈានឡើងជាកីឡាករល្បីឈ្មោះប៉ុណ្ណោះទេ តែក៏បានទទួលប្រាក់លាន និងក្លាយជាម្ចាស់ជើងឯកដ៏មានកិត្តិយសគួរឱ្យសរសើរផងដែរ ។
លោក សេង កដិកា បញ្ជាក់ថា ការប្រកួតគូនេះ ម្នាក់ៗមានការត្រៀមទុកសម្បើមណាស់ ដោយសារតែអ្នកដែលបានឈ្នះ គឺមានន័យថាជាជើងឯកប្រចាំប៉ុស្ដិ៍លេខ៥ ដែលកីឡាករទាំងពីរសុទ្ធតែចង់គ្រប់គ្រង ។ ការប្រកួតរបស់ពួកគេនៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែលភាគីទាំងពីរសុទ្ធតែអះអាងថាត្រូវតែដណ្ដើមឱ្យបានដាច់ខាតនូវកៅអីក្នុងវគ្គផ្ដាច់ព្រ័ត្រ ដែលតម្រូវឱ្យពួកគេត្រូវតែប្រឹងតស៊ូ ។ លោកចាត់ទុកថា អ្នកទាំងពីរគឺជាធនធានកីឡាករដ៏កម្រដែលមានសមត្ថភាពខ្ពស់នៅក្នុងសង្វៀនប្រដាល់ ហើយការប្រកួតដ៏សំខាន់នេះក៏ជាការកំណត់ជោគវាសនាក្នុងអាជីពរបស់អ្នកទាំង២ផងដែរ ។
ចំណែកកីឡាករ គឹម វាសនា និងង៉ែត្រ រដ្ឋា ត្រូវប្រកួតគ្នាយកចំណាត់ថ្នាក់លេខ៣ ។ អ្នកទាំងពីរត្រូវគេអះអាងថានឹងបញ្ចប់ការប្រកួតដោយបង្ហាញភាពស្វិតស្វាញមិនខុសគ្នានោះទេ ដោយសារតែម្នាក់ៗសុទ្ធតែចង់បានចំណាត់ថ្នាក់ល្អដើម្បីរក្សាលំនឹងកេរ្តិ៍ឈ្មោះឱ្យបានយូរក្នុងពិភពប្រដាល់ ។ ដោយឡែកនៅលើសង្វៀនទូរទស្សន៍អាស៊ីអាគ្នេយ៍ ក៏មានការប្រកួតជាលក្ខណៈអន្តរជាតិផងដែរ ទាំងសង្វៀននៅថ្ងៃសៅរ៍ និងថ្ងៃអាទិត្យ តាមពេលវេលាដែលបានប្រកាសឡើងគឺពេលរសៀលម៉ោង២ និងយប់ម៉ោង៨ ៕
ចែករំលែកព័តមាននេះ