រាជធានីភ្នំពេញ ៖ មកទល់សព្វថ្ងៃ លោកហង់ ជួនណារ៉ុន មិនត្រឹមតែជារដ្ឋមន្ត្រីក្រសួងអប់រំ យុវជន និងកីឡា ល្បីឈ្មោះដោយសារតែបានកែទម្រង់ការប្រឡងបាក់ឌុបធ្វើឱ្យមានការទទួលស្គាល់ប៉ុណ្ណោះទេ តែលោកក៏ជាកីឡាករតេក្វាន់ដូដែលគ្រងខ្សែក្រវាត់ខ្មៅគួរឱ្យសរសើរផងដែរ ។
លោកនៅតែអះអាងថា ដោយសារតែចំណូលចិត្តលើផ្នែកកីឡានេះហើយទើបធ្វើឱ្យលោកមានឱកាសបានយាមផ្ទះរដ្ឋមន្ត្រីមួយរូប ហើយក៏មានឱកាសបានស្វែងយល់ពីការងារ និងការទំនាក់ទំនងរហូតបានក្លាយជារដ្ឋមន្ត្រីមួយរូបនាពេលបច្ចុប្បន្ន។
លោក ហង់ ជួនណារ៉ុន កើតនៅថ្ងៃទី២ មករា ឆ្នាំ១៩៦២ នៅសង្កាត់លេខ៥ ក្រុងភ្នំពេញ ដោយលោកក៏ជាក្មេងដែលមានប្រវត្តិតស៊ូមិនខុសពីកុមារ និងយុវជនដដៃទៀតផងដែរ។ លោកមានឪពុកឈ្មោះហង់ ជួន ជាសាស្ត្រាចារ្យនៅសាលាវិចិត្រសិល្បៈ នៃមហាវិទ្យាល័យរបាំ មុនអំឡុងឆ្នាំ១៩៧០ និងមានម្ដាយឈ្មោះ ម៉ែន សាអ៊ុន ជាស្ត្រីមេផ្ទះ ។
ក្នុងរបបប៉ុលពត លោក និងក្រុមគ្រួសារត្រូវបានគេជម្លៀសទៅភូមិជ្រឹង ឃុំវាលម្លូ ស្រុកតំបែរ ក្នុងខេត្តត្បូងឃ្មុំសព្វថ្ងៃ។ ក្នុងឆ្នាំ១៩៨០ ឪពុករបស់លោកមានតួនាទីជានាយកខុទ្ទកាល័យក្រសួងអប់រំ បន្ទាប់ពីរដ្ឋាភិបាលធ្វើការរៀបចំក្រសួងអប់រំឡើងវិញ ហើយលោកក៏បានចូលសិក្សានៅវិទ្យាល័យកម្ពុជបុត្រ ដែលជាសាលារបស់មេខ្មែរក្រហម គឺលោក ខៀវ សំផន និងប៉ុលពត បង្រៀននៅទៅនោះកាលពីទសវត្សន៍ឆ្នាំ១៩៦០ ។
យ៉ាងណាក៏ដោយលោកបានទទួលការសិក្សានៅទីនោះបានត្រឹមតែថ្នាក់ទី៨ប៉ុណ្ណោះ ក៏ផ្លាស់ទៅរៀននៅវិទ្យាល័យព្រះស៊ីសុវត្ថិ បន្ទាប់ពីលោកបានចូលរួមរៀបចំវិទ្យាល័យនោះជាមួយឪពុកផង ។ ក្នុងឆ្នាំ១៩៨១ លោកបានប្រឡងជាប់បាក់ឌុប ហើយបានចូលរៀននៅវិទ្យាស្ថានបច្ចេកវិទ្យាកម្ពុជា ប៉ុន្តែសិក្សាទៅនោះបានតែមួយឆ្នាំប៉ុណ្ណោះ ក៏ទទួលបានអាហារូបករណ៍ទៅសិក្សានៅប្រទេសសូវៀត ផ្នែកទំនាក់ទំនងសេដ្ឋកិច្ចអន្តរជាតិ ។
មកទល់សព្វថ្ងៃ លោកជារដ្ឋមន្ត្រីមួយរូបដែលចេះស្ទាត់ទាំងសរសេរ និងនិយាយភាសារុស្ស៊ី ហើយចំណេះដឹងមួយនេះ ក៏ជាកត្តារុញឱ្យលោកបានក្លាយជាមន្ត្រីជាន់ខ្ពស់ពីមួយដំណាក់កាលទៅមួយដំណាក់កាលផងដែរ។ក្នុងពេលសិក្សានៅក្នុងឆ្នាំដំបូងៗ លោកទទួលរងការលំបាកយ៉ាងខ្លាំង ជាពិសេសនៅពេលលោកត្រូវសិក្សាស្វែងយល់ភាសាបារាំង និងអង់គ្លេសបន្ថែមនោះ ។
ក្នុងឆ្នាំ១៩៨៨ លោកបានបញ្ចប់បរិញ្ញាបត្រជាន់ខ្ពស់ផ្នែកសេដ្ឋកិច្ច ហើយក៏បានវិលត្រឡប់មកកាន់ប្រទេសកម្ពុជាវិញ ។ នៅក្នុងប្រទេសរុស្ស៊ី លោកគឺជាអ្នកសរសេរសុន្ទរកថាមួយរូបដែលមានការទទួលស្គាល់ ដោយសារតែលោកមានស្នាដៃក្នុងការស្រាវជ្រាវ និងមានចំណេះដឹងផ្នែកភាសាអង់គ្លេស បារាំង និងរុស្ស៊ីច្បាស់លាស់ផង។
ក្រោយត្រឡប់មកដល់ប្រទេសកំណើតវិញ លោកក៏បានក្លាយជាអ្នកបកប្រែឱ្យគណៈប្រតិភូជាន់ខ្ពស់កម្ពុជា ដោយធ្វើជាអ្នកបកប្រែភាសាឱ្យក្រសួងការបរទេស គឺលោក ហោ ណាំហុង ដោយលោកក៏ជាអ្នកសរសេរបកប្រែផង និងជាអ្នកបកប្រែដោយផ្ទាល់មាត់ផង ។ បន្តបន្ទាប់មកលោកក៏បានបម្រើការនៅក្នុងស្ថានទូតអូស្ត្រាលី និងបានចូលបម្រើការនៅវិទ្យាស្ថាន CDRIក្នុងតំណែងជាអ្នកបកប្រែអង់គ្លេស និងបានក្លាយជាមន្ត្រីស្រាវជ្រាវផ្នែកសេដ្ឋកិច្ច នយោបាយពីឆ្នាំ១៩៩៣រហូតដល់ឆ្នាំ១៩៩៨ ។
ថ្ងៃទី១ មករា ឆ្នាំ១៩៩៩ លោកបានបម្រើការនៅក្នុងក្រសួងសេដ្ឋកិច្ច និងហិរញ្ញវត្ថុ ដោយលោកក៏មាននាទីសរសេរសុន្ទរកថារបស់នាយករដ្ឋមន្ត្រី ជូនសម្ដេចតេជោនាយករដ្ឋមន្ត្រីផងដែរ អ៊ីចឹងហើយទើបលោកកាន់តែត្រូវបានមន្ត្រីជាន់ខ្ពស់កត់សម្គាល់ពីសមត្ថភាព និងចំណេះដឹងបន្តិចម្ដងៗ ។ លោកបានរៀបការជាមួយអ្នកស្រី ប៉ែន វិមល និងមានកូនប្រុស២នាក់ គឺកូនប្រុសច្បងឈ្មោះហង់ វិរៈឫទ្ធិ អាយុ២៣ឆ្នាំ និងកូនប្រុសទី២ឈ្មោះហង់ វិមលា អាយុ២០ឆ្នាំ ។ ភរិយារបស់លោក ក៏ជាមន្ត្រីក្នុងនាយកដ្ឋានផែនការរបស់ក្រសួងបរិស្ថានផងដែរ ដោយលោកជំទាវគឺជាកូនស្រីរបស់លោក ប៉ែន ណាវុឍ អតីតរដ្ឋមន្ត្រីក្រសួងអប់រំ និងសិក្សាធិការនៅអំឡុងឆ្នាំ១៩៨៤ ដល់១៩៩៩។
អំឡុងខែមករា ឆ្នាំ១៩៧៩ ក្រោយពីការដួលរលំរបបអាវខ្មៅ លោកក៏ត្រូវបានរដ្ឋមន្ត្រីក្រសួងអប់រំក្នុងសម័យនោះ គឺលោក ចាន់ វ៉ែន បានចុះទៅជ្រើសរើសយុវជនដើម្បីធ្វើជាអ្នកយាមផ្ទះ ហើយក៏បានជ្រើសរើសយកលោក ដោយសារតែលោកក្រៅពីមានរាងកាយមាំមួន ក៏ចេះក្បាច់គុនការពារខ្លួនទៀតផង ។ លោកគឺជាអ្នកយាមផ្ទះវេនយប់ឱ្យរដ្ឋមន្ត្រី ដោយនៅពេលនោះក៏មានយុវជនអាយុ១៧ឆ្នាំជាច្រើននាក់ទៀតផងដែរដែលបានធ្វើការដូចលោក ប៉ុន្តែលោកត្រូវបានចាត់ទុកថាជាយុវវជនមួយរូបដែលទទួលបានជោគជ័យ ដោយសារតែលោកយកចិត្តទុកដាក់លើការហ្វឹកហាត់ក្បាច់គុន ពិសេសគឺតេក្វាន់ដូតាំងពីក្មេង ហើយមានការស្វែងយល់ផ្នែកភាសាបរទេស និងប្រឹងប្រែងសិក្សាបានខ្ពស់ ។ ក្រៅពីជាអ្នកយាមផ្ទះ លោកក៏ជាអ្នកបោសសំអាតនៅតាមសាលារៀនក្នុងពេលក្រសួងអប់រំនាពេលនោះ ចាប់ផ្ដើមរៀបចំប្រព័ន្ធអប់រំជាថ្មីផងដែរ។
បន្ថែមពីលើប្រវត្តិការងារ និងប្រវត្តិសិក្សា
គួរឱ្យសរសើររបស់លោកនៅក្នុងវិស័យសិក្សា លោក ហង់ ជួនណារ៉ុន ក៏ជាកីឡាករមួយរូបដែលបានប្រឹងប្រែងហ្វឹកហាត់តេក្វាន់ដូរហូតទទួលបានខ្សែក្រវាត់ខ្មៅផងដែរកាលពីចុងឆ្នាំ២០១៦មុននេះ ។ លោកទទួលបានខ្សែក្រវាត់ខ្មៅនេះកាលពីថ្ងៃទី៣០ ខែតុលា កន្លងទៅ ដោយនៅលើផេករបស់ក្រសួងអប់រំ បានសរសើរថា លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្រៅពីមានសមត្ថភាពធ្វើកំណែទម្រង់ប្រព័ន្ធអប់រំឱ្យមានគុណភាពក្នុងរយៈពេលចុងក្រោយ ក៏ជារដ្ឋមន្ត្រីមួយរូបដែលបានស្វែងយល់ពីវិស័យកីឡាតាមរយៈការឆ្លៀតពេលហ្វឹកហាត់តេក្វាន់ដូ បង្កើនសមត្ថភាពដែលជាចំណូលចិត្តកាលពីក្មេង រហូតទទួលបានខ្សែក្រវាត់ខ្មៅផងដែរ ។
លោកធ្លាប់បានបញ្ជាក់ថា កីឡាគឺជាចំណូលចិត្តរបស់លោកតាំងពីក្មេង ហើយបើលោកមានពេលទំនេរមិនរវល់ដូចរាល់ថ្ងៃ គឺលោកនឹងបន្តហ្វឹកហាត់ឱ្យបានខ្សែក្រវាត់ខ្មៅខ្ពស់បំផុតនោះផង ដោយសារតែលោកយល់ថា កីឡា ឬក្បាច់គុនក្រៅពីធ្វើឱ្យអ្នកតស៊ូហ្វឹកហាត់អាចការពារខ្លួន ក៏ជួយឱ្យអ្នកហាត់មានសុខភាពល្អ និងមិនខុសពីការបំផុសឱ្យយុវជនងាកមកហ្វឹកហាត់ដើម្បីលើកស្ទួយកីឡា និងដើម្បីជំរុញដល់សុខភាពរបស់ខ្លួន។
លោកបានទទួលខ្សែក្រវាត់ខ្មៅផ្នែកតេក្វាន់ដូ ដោយខ្សែក្រវាត់ដែលលោកទទួលបាន មិនមែនជាខ្សែក្រវាត់កិត្តិយសនោះទេ ប៉ុន្តែជាខ្សែក្រវាត់ប្រយុទ្ធដែលលោកបានឆ្លងកាត់ការប្រកួត និងមានការបំពាក់ខ្សែក្រវាត់ដោយលោក ឆយ យ៉ុងសុក គ្រូបង្វឹកកីឡាតេក្វាន់ដូជម្រើសជាតិកម្ពុជា ។
លោក ហង់ ជួនណារ៉ុន និយាយថា ឱ្យតែលោកឆ្លៀតបាន គឺលោកនៅតែឆ្លៀតពេលហ្វឹកហាត់ ដើម្បីរំលឹកក្បាច់គុនតេក្វាន់ដូផង និងដើម្បីសុខភាពផង ។ ដោយសារតែចេះក្បាច់គុនតេក្វាន់ដូនេះហើយ ទើបធ្វើឱ្យលោករឹងមាំផ្នែកសុខភាព ហើយបំពេញកិច្ចការបានយ៉ាងច្រើនតាំងពីបានក្លាយជារដ្ឋមន្ត្រីដែលមានការងារដកឃ្លាមិនចង់រួច ៕
ចែករំលែកព័តមាននេះ