រាជធានីភ្នំពេញ ៖ មានការកត់សម្គាល់យ៉ាងខ្លាំង បន្ទាប់ពីមន្ត្រីជាន់ខ្ពស់កម្ពុជាចំនួន៦រូប បានក្លាយជាម្ចាស់ខ្សែក្រវាត់ខ្មៅផ្នែកកីឡាប្រយុទ្ធនៅក្នុងកាលៈទេសៈដែលមន្ត្រីទាំងនោះសុទ្ធតែមានតួនាទីខ្ពស់ក្នុងជួររាជរដ្ឋាភិបាល និងមានការងាររវល់ពេញទំហឹង ប៉ុន្តែនៅតែបន្តតស៊ូហ្វឹកហាត់ និងប្រឡងរហូតទទួលបានខ្សែក្រវាត់ខ្មៅតាមកម្រិតនីមួយៗ ។
មន្ត្រីដែលទទួលបានខ្សែក្រវាត់ខ្មៅទាំងនោះរួមមាន លោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ទទួលបានខ្សែក្រវាត់ខ្មៅកម្រិត៧ដាន់ផ្នែកការ៉ាតេដូ,
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ទទួលបានខ្សែក្រវាត់ខ្មៅផ្នែកតេក្វាន់ដូ, លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម គ្រងខ្សែក្រវាត់ខ្មៅកម្រិត៦ដាន់ផ្នែកការ៉ាតេដូ, លោក ប៉ាន់ សូរ ស័ក្ដិ រដ្ឋមន្ត្រីក្រសួងពាណិជ្ជកម្ម គ្រងខ្សែក្រវាត់ខ្មៅកម្រិត២ដាន់ផ្នែកការ៉ាតេដូ, លោករដ្ឋលេខាធិការ កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា អនុប្រធានព័ត៌មាន និងប្រតិកម្មរហ័សទីស្ដីការគណៈរដ្ឋមន្ត្រី និងជាប្រធានសហព័ន្ធតេក្វាន់ដូអាស៊ីអាគ្នេយ៍គ្រងខ្សែក្រវាត់ខ្មៅ៥ដាន់ផ្នែកតេក្វាន់ដូ និងលោក សាមឺឌី ស៊ីវឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា គ្រងខ្សែក្រវាត់ខ្មៅ៨ដាន់ផ្នែកការ៉ាតេដូ ។
ក្នុងចំណោមមន្ត្រីជាន់ខ្ពស់ដែលគ្រងខ្សែក្រវាត់ខ្មៅផ្នែកកីឡាប្រយុទ្ធទាំង៦រូបនោះលោក កែវ រ៉េមី បានបញ្ជាក់ឱ្យដឹងពីមូលហេតុដែលនាំឱ្យលោកតស៊ូហ្វឹកហាត់កីឡាមួយនេះ រហូតទទួលបានខ្សែក្រវាត់ខ្មៅ៥ដាន់ដែលជាខ្សែក្រវាត់ផ្នែកប្រយុទ្ធ មិនមែនជាខ្សែក្រវាត់កិត្តិយសនោះទេ ។
លោក កែវ រ៉េមី មានប្រសាសន៍ថា ក្នុងវ័យកុមារភាព លោកគឺជាក្មេងដែលមានចំណូលចិត្តនឹងក្បាច់គុនចិនហុងកុងជាទីបំផុតដោយសារតែក្នុងសម័យនោះ លោកជាក្មេងចូលចិត្តមើលរឿងវ៉ៃតប់ ដូចជារឿងចិនដីគោក និងចិន ហុងកុងជាដើម ។ គាប់ជួនជាក្នុងពេលនោះលោកក៏ជាក្មេងដែលមានសុខភាពទន់ខ្សោយឧស្សាហ៍ឈឺផង ទើបឪពុកម្ដាយរបស់លោកសម្រេចឱ្យលោកចូលហាត់តេក្វាន់ដូដើម្បីសុខភាពក៏ដូចជាទុកការពារខ្លួនផង ។
លោកថាកាលពីក្មេងលោកឧស្សាហ៍ឈឺ ដល់ពេលលោកចូលហ្វឹកហាត់តេក្វាន់ដូលោកចាប់ផ្ដើមរឹងមាំ និងមានសុខភាពល្អ ។ លោកថា ការហ្វឹកហាត់នៅក្នុងពេលនោះ មិនបានលទ្ធផលជាដុំកំភួននោះទេ ដោយសារតែលោកហ្វឹកហាត់ជារបៀបក្មេងលេងច្រើនជាង គឺរហូតដល់ធំពេញវ័យបន្តិចទើបលោកចេះ តែភាគច្រើនចេះតែក្បាច់គុនដែលបានហ្វឹកហាត់ប៉ុណ្ណោះ ។ ក្នុងសម័យប៉ុលពត លោកមិនបានហ្វឹកហាត់ទៀតទេ តែលោកនៅតែលួចរំលឹកក្បាច់គុនដោយខ្លួនឯង ដោយសារតែលោកមិនចង់ឱ្យក្បាច់គុនដែលខំប្រឹងប្រែងហ្វឹកហាត់ត្រូវរលាយបាត់បង់ទៅវិញ ។
លោកបានហ្វឹកហាត់កាន់តែសកម្មឡើងវិញក្នុងសម័យរដ្ឋកម្ពុជា បានមួយប្រាវ ហើយជាភ័ព្វសំណាងលោកក៏បានចេញទៅរស់នៅសហរដ្ឋអាមេរិក ដោយបានទៅរស់នៅពេញសិទ្ធិនៅទីនោះមុនមកកាន់កម្ពុជាវិញ ។ លោកថា ពេលក្លាយជាពលរដ្ឋអាមេរិក លោកបន្តការសិក្សាផង ធ្វើការផង ហើយបានសម្រេចចិត្តចូលហ្វឹកហាត់ជាមួយគ្រូតេក្វាន់ដូរបស់កូរ៉េតែម្ដង ដោយលោកចាប់ផ្ដើមហ្វឹកហាត់តាំងពីខ្សែក្រវាត់សឡើងវិញ បើទោះជានៅកម្ពុជាលោកធ្លាប់បានចំណាយពេលហ្វឹកហាត់រហូតបានខ្សែក្រវាត់ពណ៌មួយចំនួនរួចទៅហើយ។
លោកបានចំណាយពេលហ្វឹកហាត់នៅលើទឹកដីអាមេរិកក្នុងអំឡុងឆ្នាំ១៩៩០ ហើយរហូតដល់ឆ្នាំ១៩៩៨ ទើបលោកទទួលបានខ្សែក្រវាត់ខ្មៅកម្រិត៣ដាន់ ដែលខ្សែក្រវាត់នោះគឺលោកទទួលបានដោយការប្រកួតប្រជែង និងមានការផ្ដល់ពិន្ទុដោយសហព័ន្ធតេក្វាន់ដូរបស់កូរ៉េតែម្ដង។
លោកថា ជីវិតនៅក្នុងពេលនោះលោករវល់មិនខុសគ្នាក្នុងពេលនេះនោះទេ ប៉ុន្តែលោកនៅតែស្រឡាញ់កីឡា ដោយសារយល់ថា ព្រោះតែបានហ្វឹកហាត់ក្បាច់គុនតេក្វាន់ដូ ទើបធ្វើឱ្យរាងកាយរបស់លោករឹងមាំ មាឌធំសមជាងមុន ខុសកាលពីមុនគឺមានរាងតូចដែលលោកនិយាយថាមិនសូវមាំមួន ។ លោកបានបោះបង់ការហ្វឹកហាត់តេក្វាន់ដូអស់ជាច្រើនឆ្នាំក្នុងពេលលោកចុះមកប្រឡូកនយោបាយនៅកម្ពុជា តែនៅអំឡុងឆ្នាំ២០១៦ លោកក៏សម្រេចចិត្តចូលហ្វឹកហាត់វិញ ធ្វើឱ្យមានការភ្ញាក់ផ្អើលផងដែរ ដោយសារតែបានដឹងថា លោកធ្លាប់គ្រងខ្សែក្រវាត់ខ្មៅ៣ដាន់ផ្នែកតេក្វាន់ដូនៅលើទឹកដីអាមេរិក។
លោកថា ការតស៊ូជាថ្មីបានជួយឱ្យលោកត្រូវបានគ្រូបង្វឹកជនជាតិកូរ៉េនៅកម្ពុជាមើលឃើញ ហើយក៏បានបង្វឹកលោកបន្ថែម និងបានឱ្យលោកប្រកួតផ្លូវការ ហើយជាលទ្ធផលក៏ទទួលបានខ្សែក្រវាត់ខ្មៅកម្រិត៤ដាន់ និង៥ដាន់លើផ្នែកប្រយុទ្ធ ដោយមិនមែនជាខ្សែក្រវាត់កិត្តិយស ដូចដែលអ្នកខ្លះយល់ច្រឡំនោះទេ ។
លោក កែវ រ៉េមី បញ្ជាក់ថា លោកទើបតែបានដាច់ឆ្ងាយពីការហ្វឹកហាត់ប្រមាណជា២ខែចុងក្រោយប៉ុណ្ណោះ ដោយតាំងពីលោកត្រូវបានបំពាក់ខ្សែក្រវាត់ខ្មៅ៥ដាន់កាលពីចុងឆ្នាំ២០១៦ គឺលោកចូលសហព័ន្ធតេក្វាន់ដូនៅស្ដាតអូឡាំពិកហ្វឹកហាត់រាល់ល្ងាច ដោយទោះរវល់យ៉ាងណាក៏លោកចំណាយពេលមួយម៉ោងទៅមួយម៉ោងកន្លះហ្វឹកហាត់តេក្វាន់ដូដើម្បីសុខភាពនោះដែរ ។
មកទល់ពេលនេះលោកថា ខ្លួនមានអាយុ៥៤ឆ្នាំហើយ ប៉ុន្តែលោកនៅតែយល់ថាខ្លួនអាចទៅរួចជាមួយកីឡាតេក្វាន់ដូ ដោយលោកនៅតែអាចទាត់បំបែកក្ដារប្រភេទស្ដង់ដារដែលគេប្រើសម្រាប់ទាត់នៅក្នុងកីឡាតេក្វាន់ដូ ឱ្យបែកបាននៅឡើយ ខណៈដែលលោកក៏នៅមានកម្លាំងលោតហក់ និងចាប់ឃ្លេបានល្អមិនធម្មតា ។
លោកថា ការតស៊ូរបស់លោករាល់ថ្ងៃជាមួយតេក្វាន់ដូ មិនមែនចង់ល្បីនៅក្នុងអាជីពនេះទេ ប៉ុន្តែអ្វីដែលលោកចង់បាននោះគឺសុខភាពនៅតែមាំមួន ដោយលោកបានចាត់ទុកថា ក្នុងពេលឃ្លាតឆ្ងាយពីការហ្វឹកហាត់ គឺធ្វើឱ្យលោកធ្វើទុក្ខ នូវផ្នែកសុខភាពនោះផង ។
ម្យ៉ាងមកពីលោកចង់បង្ហាញក្បាច់គ្រឹះ និងចង់បណ្ដុះបណ្ដាលដល់ក្មេងជំនាន់ក្រោយ ទើបលោកនៅតែឆ្លៀតពេលចូលក្លិបតេក្វាន់ដូនៅស្ដាតអូឡាំពិក ដើម្បីហ្វឹកហាត់ខ្លួនឯងផង និងចង់ចំណាយពេលបង្វឹកដល់ក្មេងជំនាន់ក្រោយផង ។ អ្វីដែលសំខាន់គឺលោកចង់បំផុសឱ្យយុវវ័យងាកមកស្រឡាញ់កីឡាដើម្បីសុខភាព និងចៀសឆ្ងាយពីគ្រឿងញៀន។
លោកថា ការបង្ហាញមុខនៅក្នុងវិស័យតេក្វាន់ដូរបស់លោក បានជំរុញឱ្យក្មេងៗកាន់តែច្រើនស្រឡាញ់វិស័យកីឡា ជាពិសេសកូនសិស្សរបស់លោកដែលបានហ្វឹកហាត់ក្នុងក្លិប គឺរមែងរង់ចាំការបង្វឹករបស់លោកជាប្រចាំនោះផង ទើបលោកទោះជារវល់យ៉ាងណា ក៏នៅតែចំណាយពេលរាល់ពេលព្រលប់ត្រឹមមួយម៉ោងយ៉ាងតិចទៅបង្វឹកពួកគេ គឺលើកលែងតែ២ខែចុងក្រោយដែលលោកដកឃ្លាមិនរួចទាល់តែសោះ ។
លោកថា ក្មេងៗដែលហាត់រៀនជាមួយលោក លោកអត់មានលាក់ចំណេះទេ គឺប្រាប់ជាប្រចាំពីរបៀបការពារខ្លួនយ៉ាងម៉េច ពីវិធីការពារពេលមានគ្រោះថ្នាក់ចរាចរណ៍ និងពីរបៀបទប់ទល់នឹងសត្រូវនៅចំពោះមុខជាច្រើនទៀត ដែលសុទ្ធតែក្បាច់សំខាន់ៗនៅក្នុងផ្នែកតេក្វាន់ដូ ។ លោកមិនទាន់ច្បាស់ថានឹងបន្តប្រកួតយកខ្សែក្រវាត់ខ្មៅកម្រិត៦ដាន់រហូតដល់៩ដាន់ ឬយ៉ាងណានោះទេ ក្នុងពេលដែលលោកដកឃ្លាមិនទាន់រួច និងបារម្ភខ្លាចថាបើលោកប្រឹងហ្វឹកហាត់យកដល់ខ្សែក្រវាត់កម្រិតខ្ពស់នោះ តើវាអាចប៉ះពាល់កម្លាំង និងវ័យរបស់លោកឬអត់។
ទោះបីយ៉ាងណាលោកថា បើលោកមានពេល គឺលោកនៅតែអាចហ្វឹកហាត់យកខ្សែក្រវាត់កម្រិតខ្ពស់បាននៅឡើយទេ ដោយសារតែលោកប៉ាន់ស្មានដឹងថាសុខភាពរបស់លោកគឺនៅតែល្អ ៕
ចែករំលែកព័តមាននេះ