ការអប់រំគឺជាការណែនាំប្រៀនប្រដៅ សំដៅទៅរកអ្វីដែលល្អ សុចរិតទៀងត្រង់ លះបង់អំពើទុច្ចរិតប្រាសចាកទាំងឡាយ ពោលគឺអ្វីដែលគេស្អប់ខ្ពើម ។ យ៉ាងណាមិញ ដើម្បីអប់រំកូនឱ្យក្លាយជាមនុស្សល្អ មិនមែនជាការងាយនោះទេ ដូច្នេះឪពុកម្តាយគ្រប់រូបត្រូវផ្តល់ដំបូន្មានល្អៗ អប់រំ ណែនាំស្តីប្រដៅ និងយកចិត្តទុកដាក់មើលថែរក្សា និងផ្តល់នូវព្រហ្មវិហារធម៌ចំពោះកូន ជាពិសេសត្រូវធ្វើជាគំរូល្អៗ ធ្វើយ៉ាងណាឱ្យកូនយកតម្រាប់តាម ។
លោកតាន់ ងី អាយុ៤៩ឆ្នាំ ជានាយករងនៃសាលាថែទាំសុខភាពវិទ្យាសាស្ត្រ និងជាសាស្ត្រាចារ្យនៃសាកលវិទ្យាល័យវិទ្យាសាស្ត្រសុខាភិបាលប្រាប់ឱ្យកោះសន្តិភាពដឹងថា ការអប់រំកូនឱ្យក្លាយជាមនុស្សល្អ គឺត្រូវផ្តល់ពេលវេលាសម្រាប់កូនឱ្យបានគ្រប់គ្រាន់ ផ្តល់នូវថវិកាដ៏សមស្របចំពោះការសិក្សារបស់កូន និងត្រូវតាមដានរាល់សកម្មភាពរបស់កូនឱ្យបានទៀងទាត់ ។ លោកបន្ថែមទៀតថា ត្រូវណែនាំកូនឱ្យស្គាល់នូវសេចក្តីល្អ និងអាក្រក់ និងប្រភេទមិត្តភក្តិដែលគួរសេពគប់ ម៉្យាងទៀតគួរផ្តល់ដំបូន្មានល្អៗ សម្រាប់អប់រំកូន និងធ្វើជាគំរូល្អដល់កូន និងត្រូវលើកទឹកចិត្តកូនឱ្យចេះប្រព្រឹត្តអំពើល្អ ចេះគោរពចាស់ទុំ ព្រឹទ្ធាចារ្យជាដើម ។
ជាពិសេសត្រូវចំណាយពេលដើម្បីនៅជាមួយកូន និងផ្តល់នូវភាពកក់ក្តៅជានិច្ច ។ដូចនេះ ឪពុកម្តាយគ្រប់រូបត្រូវយកចិត្តទុកដាក់ចំពោះកូន ផ្តល់ភាពកក់ក្តៅ និងដំបូន្មានល្អៗ ដើម្បីឱ្យកូនក្លាយជាមនុស្សល្អ សង្គមទទួលស្គាល់ និងចៀសផុតអំពើអបាយមុខគ្រប់បែបយ៉ាង ៕
ចែករំលែកព័តមាននេះ