រាជធានីភ្នំពេញ ៖ ក្នុងចំណោមបេក្ខជនដែលបានឡើងប្រកួតនៅប៉ុស្ដិ៍លេខ៥ទាំងអស់ ចាប់តាំងពីស្ថាប័នមួយនេះបើកប្រកួតជ្រើសរើសជើងឯកពី៣២នាក់មកសល់ត្រឹម២នាក់ចុងក្រោយ នៅវគ្គផ្ដាច់ព្រ័ត្រ កាលពីថ្ងៃទី៣១ ធ្នូ គេចាត់ទុកថាមានតែកីឡាករ សៅ វណ្ណា ទៀតហើយ ដែលធ្វើឱ្យអ្នកទស្សនាស្ដាប់ហើយចង់ស្រក់ទឹកភ្នែកផង និងហួសចិត្ត ព្រោះតែការប្រឹងប្រែងរបស់លោក ។
នេះជាការប្រកាសជាថ្មីបន្ទាប់ពីលោកទើបតែបានប្រកាសថា ខ្លួនជាកីឡាករក្រីក្រមានលទ្ធភាពជួលផ្ទះរស់នៅភ្នំពេញត្រឹមតែមួយខែ១០ម៉ឺនរៀល និងទើបភរិយាមានកូនដំបូងនៅក្នុងជីវិត ហើយមានជីវភាពខ្វះខាត។
អ្នកទស្សនាច្រើននាក់នៅតែចងចាំពាក្យសម្ដីរបស់កីឡាករ សៅ វណ្ណា ក្រោយត្រូវបានប្រកាសថាឈ្នះការប្រកួតលើកីឡាករ ពុយ វណ្ណៈ ក្នុងវគ្គជម្រុះ៨នាក់យក៤នាក់ កាលពី២សប្ដាហ៍មុន ដែលក្នុងជំនួបកាលនោះគឺការប្រកួតរវាងអ្នកខ្លាំងប៉ះអ្នកខ្លាំង ។ ក្រោយពីទទួលជ័យជម្នះ សៅ វណ្ណា បានបង្ហាញអារម្មណ៍ក្ដុកក្ដួលចំពោះមុខមហាជន ធ្វើឱ្យមានការអាណិតអាសូរដោយសារតែលោកក្លាហានហ៊ានបង្ហាញពីស្ថានភាពពិតដែលលោកបានជួបប្រទះ ក្នុងពេលដែលលោកប្រកាសថាមិនសមថាលោកឈ្នះនោះទេ ក្នុងពេលដែលលោកនៅក្នុងពេលនោះគឺមិនមានពេលហ្វឹកហាត់ត្រៀមខ្លួនទាល់តែសោះ ស្រាប់តែបានជ័យជម្នះ ។
រំលឹកគ្រានោះ លោកបានអះអាងថា តាំងពីបង្ហាញខ្លួនក្នុងព្រឹត្តិការណ៍ប្រកួតជម្រុះជើងឯកចាញ់ធ្លាក់ៗនៅប៉ុស្ដិ៍លេខ៥ គឺមានតែការប្រកួតដែលបានធ្វើឡើងកាលពីថ្ងៃទី១៦ ធ្នូ ក្នុងវគ្គជម្រុះ៨នាក់យក៤នាក់នោះប៉ុណ្ណោះ ដែលលោកបានហ្វឹកហាត់តែ២ថ្ងៃគត់មុនពេលឡើងរេញ ។ លោកថាហេតុផលដែលលោកអត់បានហ្វឹកហាត់ដិតដល់ គឺដោយសារតែក្នុងប៉ុន្មានថ្ងៃនោះ លោកមានការរវល់យ៉ាងខ្លាំងដោយសារតែភរិយារបស់លោកទើបតែកើតកូនប្រុស និងកំពុងសម្រាកនៅក្នុងមន្ទីរពេទ្យកាល់ម៉ែត ។
លោកថា ដោយសារភរិយាមានធុរៈប្រសូតកូនប្រុសដំបូង គឺលោកអត់មានពេលវេលា និងកម្លាំងចិត្តក្នុងការហ្វឹកហាត់នោះទេ ដោយត្រូវរត់ចុះរត់ឡើងទៅពេទ្យកាល់ម៉ែតផង និងរត់ទៅហ្វឹកហាត់ផង ហើយព្រលឹង និងបេះដូងក៏មិនសូវមានស៊ប់នឹងការហ្វឹកហាត់ដូចមុន ។ ងាកមកកាន់ការប្រកួតក្នុងវគ្គពាក់កណ្ដាលផ្ដាច់ព្រ័ត្រកាលពីថ្ងៃទី៣១ ធ្នូ ឯណេះវិញ លោកក៏បានពោលពាក្យដូចគ្នាផងដែរ ថាមុនពេលឡើងប្រកួតក្នុងវគ្គដ៏សំខាន់មួយនេះ រូបលោកក៏បានឡើងហ្វឹកហាត់ផងដែរ ។
លោកថា មកទល់ពេលនេះ កូនប្រុសរបស់លោកចេញពីមន្ទីរពេទ្យបានប្រមាណជា១០ថ្ងៃហើយ តែនៅថ្ងៃដែលលោកជិតប្រកួត កូនប្រុសរបស់លោកមានជំងឺរហូតធ្វើឱ្យលោកមិនអាចហ្វឹកហាត់ទៅកើត ។ លោកថា ការប្រកួតកាលពី២សប្ដាហ៍មុន លោកគ្រាន់បានហ្វឹកហាត់២ថ្ងៃ តែសម្រាប់ការប្រកួតក្នុងវគ្គពាក់កណ្ដាលផ្ដាច់ព្រ័ត្រដែលទើបបញ្ចប់ គឺលោកហ្វឹកហាត់បានតែប៉ុន្មានម៉ោងគត់ក្នុងមួយថ្ងៃមុនប្រកួតប៉ុណ្ណោះ ដោយសាររវល់យកកូនទៅពេទ្យចុះឡើងៗ ។ អ្វីដែលលោកភ្ញាក់ផ្អើល គឺលោកនៅតែមានសំណាងបានឈ្នះការប្រកួតជាថ្មីម្ដងទៀត ក្នុងពេលការប្រកួតនៅក្នុងវគ្គសំខាន់មិនធម្មតា ។
លោកនៅចាត់ទុកថា ជ័យជម្នះដែលទើបកើតឡើង គឺជាកម្លាំងចិត្តដែលកើតចេញពីកូន ព្រោះតែលោកឡើងវ៉ៃដោយកម្លាំងចិត្ត និងថាដោយសារតែលោកត្រូវការឈ្នះដើម្បីបានលុយច្រើនយកលុយទៅព្យាបាលកូន ទើបធ្វើឱ្យលោកបានឈ្នះបានឡើងទៅវគ្គផ្ដាច់ព្រ័ត្រនៅ២សប្ដាហ៍ក្រោយ ។ ការប្រកាសជាថ្មីរបស់លោកនៅតែធ្វើឱ្យសៅ វណ្ណា បន្តកន្ត្រាក់អារម្មណ៍មហាជនបានច្រើន ហើយក៏នៅបន្តរក្សាតំណែងកីឡាករទី១ ដែលឆ្លងផុតការប្រកួតជម្រុះដល់វគ្គផ្ដាច់ព្រ័ត្រមិនគួរឱ្យជឿក្នុងពេលដែលលោកបានអះអាងថា ស្ទើរអត់បានហ្វឹកហាត់ទាល់តែសោះ។
លោក សេង កដិកា អ្នករៀបចំការប្រកួតបានអះអាងថា សៅ វណ្ណា ក្រោយទទួលបានជ័យជម្នះជាលើកទី២ លោកចាត់ទុកថាជារឿងសំណាង ដោយសារតែគេមានធុរៈចាំបាច់មិនអាចឱ្យគេមានចិត្តហ្វឹកហាត់ ។ ប៉ុន្តែលោកថា ជ័យជម្នះដែលបានកើតឡើងក៏មានន័យថា នឹងធ្វើឱ្យសៅ វណ្ណា ក្លាយជាកីឡាករដែលអាចមើលស្រាលការប្រកួតផងដែរ ដោយសារគេឡើងប្រកួត២លើកចុងក្រោយ ក្នុងវគ្គសុទ្ធតែសំខាន់ សៅ វណ្ណា ស្ទើរតែគ្មានការហ្វឹកហាត់មុនឡើងរេញ ។
លោកថា បើទោះជាកីឡាកររូបនេះ នៅបន្តមានសំណាង តែលោកមិនគាំទ្រនោះទេ ក្នុងពេលដែលគេចេះតែបន្តយកលេសធុរៈនេះធុរៈនោះ ហើយក្លាយជាកីឡាករមើលស្រាលការប្រកួតម្ដងបន្តិចៗ ដែលស្ថានភាពនេះនឹងក្លាយជាទម្លាប់អាក្រក់មួយ ។
យ៉ាងណាមិញ លោកចាត់ថា ជារឿងកម្រមួយដែលកីឡាករមួយរូបមានឆន្ទៈឡើងប្រកួតបានជោគជ័យ ក្នុងពេលដែលគេស្ថិតក្នុងស្ថានភាពប្រពន្ធត្រូវកើតកូន និងកូនឈឺដេកពេទ្យ ដោយ រត់ទៅមើលកូនផង ហើយនៅឆ្លៀតពេលមកប្រកួតផងដើម្បីយកលុយទៀត ។
លោកថាអ្នកខ្លះសម្រេចចិត្តបោះបង់ការប្រកួតបាត់ហើយ ហើយបើទោះជាបានបង្ហាញខ្លួនក៏មកប្រកួតដើម្បីឱ្យតែបានលុយតម្លៃខ្លួនមួយពេលនោះប៉ុណ្ណោះ ដោយមិនអាចប្រឹងប្រែងប្រកួតទាល់តែបានឈ្នះ ហើយធ្វើឱ្យអ្នកទស្សនាជក់ចិត្តនឹងថ្វីដៃរបស់គេដល់ម្ល៉ឹងនោះទេ ដោយសារតែភាពជាក់ស្ដែងគឺនៅពេលភរិយា ឬគ្រួសារត្រូវការការមើលថែ គឺកីឡាករមិនហ៊ានប្រថុយវាយអស់ពីសមត្ថភាពទេ ដើម្បីកុំឱ្យគ្រោះថ្នាក់ហើយប៉ះពាល់សុខភាពមិនអាចមើលថែប្រពន្ធកូនបាន ។
លោកចាត់ទុកថា ការប្រឹងប្រែងរបស់សៅ វណ្ណា គឺជារឿងកម្រមួយរបស់កីឡាករជាពិសេសនៅពេលដែលលោកបានឮគេប្រកាសថាបើទោះជាគេមានឱកាសហ្វឹកហាត់បានតែ១ថ្ងៃ តែគេត្រូវតែឈ្នះដើម្បីបន្តឱកាសបានប្រកួតនៅប៉ុស្ដិ៍លេខ៥បន្តទៀត ជាពិសេសគឺបានទៅប្រកួតយកប្រាក់លាននៅវគ្គផ្ដាច់ព្រ័ត្រចុងក្រោយ ដែលជាវគ្គដ៏សំខាន់ និងមានកិត្តិយសនោះ។
កីឡាករ សៅ វណ្ណា បានបន្តទៀតថា ជ័យជម្នះដែលខ្លួនទទួលបានមិនមែនកើតឡើងដោយសារតែការប្រឹងប្រែង និងប្រថុយយកជីវិតទៅប្ដូរតែម្យ៉ាងរបស់ខ្លួននោះទេ គឺបានពីកម្លាំងចិត្តប្រពន្ធ និងកូនប្រុស ដោយសារតែលោកស្ថិតក្នុងការត្រូវការលុយច្រើននៅក្នុងពេលនេះ ដើម្បីមើលថែប្រពន្ធ-កូននោះតែម្ដង ដោយលោកបានចាត់ទុកថា ជ័យជម្នះទាំង២លើកចុងក្រោយរបស់លោក គឺស្ថិតក្នុងស្ថានភាពដូចគ្នា ។
លោកថា បើលោកប្រកួតចាញ់ គឺស្មើនឹងលោកបាត់បង់ឱកាសឡើងប្រកួតយកពាន ហើយឱ្យតែលោកបានឡើងគឺទោះជាការប្រកួតក្នុងពេលខាងមុខទទួលបានលទ្ធផលយ៉ាងណាក៏ដោយ ក៏រឹតតែលែងភ័យនោះដែរ ដោយសារតែលោកនឹងមានឱកាសបានតំណែងជើងឯករងរួចជាស្រេច ។
យ៉ាងណាក៏ដោយ លោកថា សម្រាប់ការប្រកួតដណ្ដើមជើងឯកនៅ២សប្ដាហ៍ក្រោយ គឺលោករំពឹងថា ស្ថានភាពកូនប្រពន្ធ នឹងមិនបង្កឱ្យលោកមិនបានហ្វឹកហាត់ត្រៀមខ្លួនមុនឡើងរេញដូចមុនទៀតទេ ដោយសារតែលោកក៏មិនចង់ឡើងប្រកួតក្នុងសភាពមិនមានទំនុកចិត្តដូចមុនដែរ ។
លោកថាសប្បាយចិត្តដែលបានប្រកួតឈ្នះ ហើយបានឡើងទៅវគ្គចុងក្រោយ ដោយលោកប្រកាសថា ទោះជាជួបស្ថានភាពមានធុរៈដូច២ប្រកួតមុន ក៏លោកត្រូវតែមានទំនួលខុសត្រូវសម្រាប់ការប្រកួតនៅវគ្គផ្ដាច់ព្រ័ត្រនោះ ដោយមិនធ្វើដូចមុននោះទេ ៕
ចែករំលែកព័តមាននេះ