រាជធានីភ្នំពេញ ៖ នៅល្ងាចថ្ងៃសៅរ៍ ទី៣០ ធ្នូ ស្អែកនេះ ស្ថានីយទូរទស្សន៍ប៉ុស្ដិ៍លេខ៥ នឹងបើកការប្រដាល់ជាលក្ខណៈអន្តរជាតិទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិសម្ដុំព្រែកហូរជាយរាជធានីភ្នំពេញ ។…
រាជធានីភ្នំពេញ ៖ នៅល្ងាចថ្ងៃសៅរ៍ ទី៣០ ធ្នូ ស្អែកនេះ ស្ថានីយទូរទស្សន៍ប៉ុស្ដិ៍លេខ៥ នឹងបើកការប្រដាល់ជាលក្ខណៈអន្តរជាតិទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិសម្ដុំព្រែកហូរជាយរាជធានីភ្នំពេញ ។
កីឡាករកម្ពុជាដែលត្រូវគេស្គាល់ថា ជាជើងខ្លាំងល្បីឈ្មោះ និងវ័យក្មេងពេញកម្លាំង យ៉េន ឌីណា នឹងក្លាយជាសមាសភាពរបស់កម្ពុជាតែមួយរូបគត់ ដែលនឹងស្វាគមន៍ការប្រកួតអន្តរជាតិមួយនេះជាមួយកីឡាករថៃ ខណៈដែលការប្រកួតទាំងមូលក៏នឹងកាន់តែមានការចាប់អារម្មណ៍ថែមទៀត ដោយសារតែក្រៅពីការប្រកួតជាលក្ខណៈអន្តរជាតិនោះ ក៏មានការប្រកួតជម្រុះរវាងកីឡាករជើងខ្លាំង៤រូបក្នុងវគ្គពាក់កណ្ដាលផ្ដាច់ព្រ័ត្រ ដើម្បីជ្រើសរើសយក២នាក់ទៅប្រកួតដណ្ដើមពានជើងឯកចុងក្រោយ និងឈ្នះប្រាក់លាន ដែលជាការប្រកួតដ៏សំខាន់ និងពិតជាមានអ្នករង់ចាំទស្សនាកកកុញមិនធម្មតាមិនខាន។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចស្អែកនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរ ការចំពេលថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនោះនិយមមកទស្សនាកកកុញ ស្របគ្នាដែលនៅប៉ុស្ដិ៍លេខ៥ក៏មានកំណើនអ្នករស់នៅច្រើនឡើងព្រោះតែសំណង់បុរីព្រោងព្រាតនោះផង ។
កីឡាករកម្ពុជា និងថៃ២រូប គឺជើងខ្លាំង យ៉េន ឌីណា និងជើងខ្លាំងមកពីប្រទេសថៃឈ្មោះ វ៉ៃ វិរៈស័ក្ត នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ។ អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបត្រូវប៉ះគ្នាក្នុងវគ្គចុងក្រោយគឺវគ្គជម្រុះ៤នាក់យក២នាក់ឡើងទៅប្រកួតយកតំណែងជើងឯកផងដែរ ដែលការប្រកួតនេះ បើទោះជានៅសល់មួយសប្ដាហ៍ចុងក្រោយទើបបញ្ចប់ ក៏ជាវគ្គដ៏សំខាន់ចាប់តាំងពីប៉ុស្ដិ៍លេខ៥បានបើកការប្រកួតជម្រុះជ្រើសរើសជើងឯក អមដោយការប្រកួតជាលក្ខណៈអន្តរជាតិមួយគូៗ ។
សម្រាប់ការប្រកួតជាលក្ខណៈអន្តរជាតិឯណេះវិញ កីឡាករកម្ពុជា និងថៃសុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន ដើម្បីក្រេឌីត។
លោក សេង កដិកា អ្នករៀបចំការប្រកួតប្រចាំនៅទូរទស្សន៍ប៉ុស្ដិ៍លេខ៥បានថ្លែងប្រាប់ថា ក្នុងចំណោមកីឡាករកម្ពុជា៤រូបដែលត្រូវប្រកួតគ្នាយកតំណែងជើងឯក ក៏មានការប្រកួតជាលក្ខណៈអន្តរជាតិរបស់កីឡាករកម្ពុជា និងថៃទាំង២រូបដែលមានឈ្មោះល្បី ដែលភាគីកម្ពុជា គឺតំណាងដោយកីឡាករ យ៉េន ឌីណា ផងដែរ ។ បើទោះជាការប្រកួតនេះ គេត្រូវប្រឈមនឹងកីឡាករថៃល្អក៏លោកនៅតែជឿជាក់ថា កីឡាករជើងខ្លាំងវ័យក្មេងពោរពេញដោយសមត្ថភាពរូបនេះ នឹងធ្វើឱ្យកក្រើកសង្វៀនមិនខាន ។ គេត្រូវប៉ះប្រកួតជាមួយកីឡាករថៃខាងលើ ក្នុងនាមជាគូមិត្តភាពអន្តរជាតិសម្រាប់ប្រដាល់អន្តរជាតិ នៅថ្ងៃសៅរ៍ស្អែកនេះ ដោយការប្រកួតរបស់ពួកគេក៏មានការចាប់អារម្មណ៍មិនតិចនោះដែរ ដោយសារតែមានការប្រកួតរបស់ជើងខ្លាំង៤រូបជាលក្ខណៈដណ្ដើមជើងឯកនៅថ្ងៃនោះផងដែរ ។
លោកថា ជំនួបរវាងពួកគេមិនមែនជាការប្រកួតធម្មតានោះទេ ដោយសារអ្នកណាឈ្នះក្រៅពីទទួលបានទឹកប្រាក់ច្រើនជាង ក៏ទទួលបានទំនុកចិត្តពីអ្នកគាំទ្រដូចគ្នា ។ ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរតែម្ដង ក្នុងចំណោមអ្នកគាំទ្រភាគច្រើនដែលតាមដានការប្រកួតរបស់អ្នកទាំងពីរ ។ លោកថា កីឡាករ យ៉េន ឌីណា អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។
លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថាជំនួបរបស់គេ ជាមួយកីឡាករជាដៃគូពិតជាមិនធម្មតាសម្រាប់ការប្រកួតទាំងមូល ។ លោកជឿជាក់យ៉ាងពេញទំហឹងចំពោះ យ៉េន ឌីណា សម្រាប់ការប្រកួតនៅលើសង្វៀនអន្តរជាតិមួយនេះ ដោយលោករំពឹងខ្ពស់ថា គេនឹងមិនលាក់ថ្វីដៃតាំងពីទឹកទី១នោះផង ដោយសារតែកីឡាករថៃ គឺលោកបានស្គាល់រួចមកហើយថាជាកីឡាករល្អម្នាក់ ហើយមានទម្លាប់មិនលាក់ថ្វីដៃប្រកួតដូចគ្នា ។ អ្វីដែលសំខាន់គឺអ្នកទាំងពីរសុទ្ធតែមានប្រវត្តិប្រកួតលើរេញអន្តរជាតិច្រើនលើករៀងខ្លួន ។
សម្រាប់ការប្រកួតជម្រុះ៤នាក់យក២នាក់ទៅប្រកួតដណ្ដើមជើងឯកដ៏សំខាន់នោះវិញរួមមាន កីឡាករ អ៊ុំ វណ្ណេត ត្រូវប្រកួតជម្រុះជាមួយកីឡាករ គឹម វាសនា ដោយអ្នកទាំងពីរសុទ្ធតែជាអ្នកឈ្នះក្នុងវគ្គ៤នាក់ដូចគ្នា ហើយការប្រកួតរបស់ពួកគេគឺជាការប្រកួតស៊ីសាច់ហុតឈាមផងដែរ ដោយសារមានតែម្នាក់ប៉ុណ្ណោះដែលត្រូវឡើងប្រកួតបន្តក្នុងវគ្គផ្ដាច់ព្រ័ត្រ ហើយម្នាក់ទៀតដែលបរាជ័យបានត្រឹមតែប្រកួតយកលេខ៣ និងពានកិត្តិយស។
លោក សេង កដិកា បញ្ជាក់ថា ការប្រកួតរបស់ពួកគេមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលភាគីម្ខាងៗសុទ្ធតែអះអាងថាត្រូវតែដណ្ដើមឱ្យបានកៅអីក្នុងវគ្គផ្ដាច់ព្រ័ត្រ ដែលតម្រូវឱ្យពួកគេត្រូវតែប្រឹងតស៊ូ ។ សម្រាប់ការប្រកួតមួយគូទៀត គឺកីឡាករ សៅ វណ្ណា ប្រកួតជាមួយកីឡាករ ង៉ែត្រ រដ្ឋា ដោយអ្នកទាំងពីរក៏ជាបេក្ខភាពត្រូវប្រកួតជម្រុះយកកៅអី២នាក់ចុងក្រោយផងដែរ ។
ចំណែកនៅសង្វៀនទូរទស្សន៍អាស៊ីអាគ្នេយ៍ ក៏មានការប្រកួតជាលក្ខណៈអន្តរជាតិផងដែរ ទាំងថ្ងៃសៅរ៍ និងថ្ងៃអាទិត្យទាំង៥សង្វៀន តាមពេលវេលាដែលបានប្រកាសឡើងគឺពេលរសៀលម៉ោង២ និងយប់ម៉ោង៨នោះ ៕
ចែករំលែកព័តមាននេះ