រាជធានីភ្នំពេញ ៖ អ្នកប្រដាល់ទម្ងន់ធ្ងន់មាស សុជាតិ មកពីក្លិបក្រុងប៉ោយប៉ែតខេត្តបន្ទាយមានជ័យ និងឆៃ សារ៉ា មកពីសមាគមកីឡាប្រដាល់ក្រសួងការពារជាតិ ដែលបានបាត់មុខពីលើសង្វៀនជាយូរមកហើយនោះ នៅថ្ងៃសុក្រ…
រាជធានីភ្នំពេញ ៖ អ្នកប្រដាល់ទម្ងន់ធ្ងន់មាស សុជាតិ មកពីក្លិបក្រុងប៉ោយប៉ែតខេត្តបន្ទាយមានជ័យ និងឆៃ សារ៉ា មកពីសមាគមកីឡាប្រដាល់ក្រសួងការពារជាតិ ដែលបានបាត់មុខពីលើសង្វៀនជាយូរមកហើយនោះ នៅថ្ងៃសុក្រ ទី២៩ ធ្នូ ត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀន ទូរទស្សន៍ MyTV ក្នុងកម្មវិធី Ganzberg
Uber Fighters ។
អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលយ៉ាងអន្ទះសារព្រោះតែចង់ដឹងថា តើកីឡាករកម្ពុជាទាំង២រូបនេះអាចសម្រេចគោលដៅរបស់ខ្លួនឬយ៉ាងណា ខណៈកីឡាករថៃដែលពួកគេត្រូវជួបនាពេលនេះហាក់មានសមត្ថភាពខ្លាំងពិបាកផ្ដួលបែបហ្នឹងនោះ។
កីឡាករ មាស សុជាតិ ត្រូវបានគេផ្គូផ្គង់ឱ្យជួបប្រកួតជាមួយកីឡាករថៃឈ្មោះម៉ូតណយធីដេតឡូងើន ក្នុងប្រភេទទម្ងន់៦៥គីឡូក្រាម ។
មាស សុជាតិ ធ្លាប់ប្រកួត៧៥ដង ឈ្នះ៦៤ដងចាញ់១០ដង ស្មើ១ដង និងផ្ដួលគូប្រកួតឱ្យសន្លប់២០ដង ក្នុងពេលកីឡាករថៃធ្លាប់ប្រកួត៨២ដង ឈ្នះ៦១ដង ចាញ់១៦ដង ស្មើ៥ដង និងផ្ដួលគូប្រកួតឱ្យសន្លប់១៥ដង ។ ថ្វីដ្បិតតែកីឡាករថៃមានប្រវត្តិប្រកួតច្រើនជាងក្តី បើសិនជាចង់យកឈ្នះមាស សុជាតិ ប្រហែលជាមិនងាយស្រួលនោះទេ ព្រោះកីឡាកររូបនេះក៏ធ្លាប់កាន់កាប់តំណែងជាអធិរាជនៅលើសង្វៀនផងដែរគ្រាន់តែប៉ុន្មានឆ្នាំចុងក្រោយមិនឃើញគេលេចមុខនៅលើសង្វៀនប៉ុណ្ណោះ មិនដឹងថា វិជ្ជាគុនរបស់គេនៅខ្លាំងដូចមុនឬអត់។
កីឡាករ ឆៃ សារ៉ា ត្រូវជួបប្រកួតជាមួយកីឡាករថៃឈ្មោះតម្រួតឡេក ធីដេតឡូងើនក្នុងប្រភេទទម្ងន់៦៣,៥គីឡូក្រាម ។ ឆៃ សារ៉ា ធ្លាប់ប្រកួត៨០ដង ឈ្នះ៦០ដង ចាញ់១៨ដងស្មើ២ដង និងផ្ដួលគូប្រកួតឱ្យសន្លប់២៩ដង ក្នុងពេលកីឡាករថៃធ្លាប់ប្រកួត៨៧ដង ឈ្នះ៧០ដង ចាញ់១៣ដង ស្មើ៤ដង និងផ្ដួលគូប្រកួតឱ្យសន្លប់១២ដង ។ ឆៃ សារ៉ា ដោយសារតែបាត់មុខពីលើសង្វៀនជាយូរមកហើយនោះ គេមិនហ៊ានធានាថាអាចតស៊ូប្រកួតជាមួយកីឡាករថៃបានដល់ទឹកទី៥ឬអត់នោះទេ ព្រោះអីកីឡាករថៃដែលគេត្រូវជួបនាពេលនេះគឺជាជើងខ្លាំងមិនធម្មតា សូម្បីតែលោកធន់ សុភា ដែលជាគ្រូបង្ហាត់របស់គេ ក៏អត់ហ៊ានវាយតម្លៃទុកមុនពីលទ្ធផលចុងក្រោយនោះដែរ ។
ដូច្នេះមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះ អ្នកណាខ្លាំងជាងអ្នកណាគង់តែដឹងទេ។
ចំណែកគូប្រកួតមិត្តភាពធម្មតាវិញ កីឡាករកែវ ប៊ុនហាន មកពីក្លិបខ្លារខិនមានរិទ្ធ ត្រូវ
ជួបប្រកួតជាមួយកីឡាករ យឹម សុភ័ក្រ មកពីក្លិបដំបងដែកមានរិទ្ធ និងគូចុងក្រោយកីឡាករសំខាន់ ប៉ាវចិន មកពីក្លិបរ៉ាហាប់ស្វាយប៉ាកប្រកួតជាមួយកីឡាករ រ័ត្ន ដារ៉ា មកពីក្លិបរស្មីភូមិគាបខេត្តបន្ទាយមានជ័យ ៕
ចែករំលែកព័តមាននេះ