ខេត្តព្រះសីហនុ ៖ លោកឧត្តមសេនីយ៍ត្រី កុល ផាលី នៅព្រឹកថ្ងៃទី២២ ធ្នូ នៅស្នងការដ្ឋាននគរបាលខេត្ត បានធ្វើសន្និសីទសារព័ត៌មានមួយដើម្បីបង្ហាញមុខបងធំវ័យក្មេងជាឃាតករមួយក្រុមមានគ្នា៩នាក់ ដែលពាក់ព័ន្ធនឹងការសម្លាប់មនុស្សជាក្រុមបងធំម្នាក់ស្លាប់នៅដីអតីតអារីស្តុន…
ខេត្តព្រះសីហនុ ៖ លោកឧត្តមសេនីយ៍ត្រី កុល ផាលី នៅព្រឹកថ្ងៃទី២២ ធ្នូ នៅស្នងការដ្ឋាននគរបាលខេត្ត បានធ្វើសន្និសីទសារព័ត៌មានមួយដើម្បីបង្ហាញមុខបងធំវ័យក្មេងជាឃាតករមួយក្រុមមានគ្នា៩នាក់ ដែលពាក់ព័ន្ធនឹងការសម្លាប់មនុស្សជាក្រុមបងធំម្នាក់ស្លាប់នៅដីអតីតអារីស្តុន ឆ្នេរអូរឈើទាល ក្រុងព្រះសីហនុ កាលពីវេលាម៉ោង៨និង១០នាទីយប់ថ្ងៃទី១៩ ធ្នូ ដែលសមត្ថកិច្ចនគរបាលចាត់ទុកថាជាអំពើឃាតកម្ម (គិតទុកជាមុន) ដោយក្រុមបងធំចំនួនបីក្រុម ដែលពួកគេបានរៀបរចនាសម្ព័ន្ធគួរឱ្យភ្ញាក់ផ្អើល គឺក្រុមបងធំKBOY, ក្រុមបងធំAL និងក្រុមបងធំADZ ។
ក្រុមបងធំទាំង២បានប្រើកាំបិតកាប់ទៅលើជនរងគ្រោះជាបងធំក្រុមកាំបិតធំចំនួន២កាំបិត ត្រូវក្បាលនិងកញ្ចឹង.ក បណ្តាលឲ្យស្លាប់ភ្លាមៗនៅកន្លែងកើតហេតុ ។ លោកឧត្តមសេនីយ៍ត្រី កុល ផាលី ស្នងការរងទទួលកិច្ចការព្រហ្មទណ្ឌនៃស្នងការដ្ឋាននគរបាលខេត្តបានបន្តឲ្យដឹងទៀតថា ដោយអនុវត្តទៅតាមបទបញ្ជា និងការចង្អុលបង្ហាញពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ក្រុមជនបងធំ ចំនួន៩នាក់ ត្រូវបានចាប់ខ្លួនជាបន្តបន្ទាប់ នៅថ្ងៃទី២០និងថ្ងៃទី២១ ធ្នូ ដែលមានឈ្មោះដូចខាងក្រោម៖
១-ឈ្មោះ ជា វីដេវីត ភេទប្រុស អាយុ១៧ឆ្នាំ មុខរបរលេងភ្លេង មានទីលំនៅភូមិ៣ សង្កាត់៤ ក្រុងព្រះសីហនុ ជាជនដៃដល់ក្នុងក្រុម AL។២-ឈ្មោះ អ៊ុង ដារារិទ្ធ ភេទប្រុសអាយុ១៧ឆ្នាំ មុខរបរព្រូឡាន នៅភូមិ១ សង្កាត់លេខ១ ក្រុងព្រះសីហនុ ជាបក្សពួកក្រុមAL ។៣-ឈ្មោះ គង់ មាន ភេទប្រុស អាយុ១៧ឆ្នាំ មុខរបរលក់ដូរ មានទីលំនៅភូមិ១ សង្កាត់៤ ក្រុងព្រះសីហនុ ជាបក្សពួកក្រុម AL ។៤-ឈ្មោះ ហ៊ុយ សេងលី ភេទប្រុស អាយុ១៥ឆ្នាំ ជាសិស្ស មានទីលំនៅភូមិ១ សង្កាត់៤ ក្រុងព្រះសីហនុ ជាបក្សពួកក្រុម ADZ ។
៥-ឈ្មោះ យូ អុី ភេទប្រុស អាយុ១៥ឆ្នាំ ជាសិស្ស មានទីលំនៅភូមិ១ សង្កាត់៤ ក្រុងព្រះសីហនុ ជាបក្សពួកក្រុម ADZ ។៦-ឃាង ណារិន ភេទប្រុស អាយុ១៩ឆ្នាំ គ្មានមុខរបរ មានទីលំនៅភូមិ២ សង្កាត់៤ ក្រុងព្រះសីហនុ ជាអ្នកសមគំនិតក្នុងក្រុមADZ ។៧-ឈ្មោះ ខាន់ សំណាង ភេទប្រុស អាយុ១៦ឆ្នាំ ជាសិស្ស មានទីលំនៅភូមិ៤ សង្កាត់៤ ក្រុងព្រះសីហនុ ជាអ្នកសមគំនិត មានអាវុធខ្លី ម៉ាកឡុក១៧ ប្រើហ្គាស ក្នុងក្រុមADZ ។៨-ឈ្មោះ បូ ចាន់ ភេទប្រុស អាយុ១៨ឆ្នាំ គ្មានមុខរបរ មានទីលំនៅភូមិ២ សង្កាត់២ ក្រុងព្រះសីហនុ ជាអ្នកសមគំនិតក្នុងក្រុមADZ ។៩-ឈ្មោះ សោម វីរតនា ភេទប្រុស អាយុ១៦ឆ្នាំ ជាសិស្ស មានទីលំនៅភូមិ៤ សង្កាត់៤ ក្រុងព្រះសីហនុជាអ្នកសមគំនិត និងជាអ្នកផ្តល់កាំបិតក្នុងក្រុម ADZ ។
សម្រាប់ក្រុមបងធំទាំង៣នេះ នៅមានបក្សពួកចំនួន៥នាក់ទៀតកំពុងរត់គេចខ្លួន ដែលសមត្ថកិច្ចបានស្គាល់អត្តសញ្ញាណនិងកំពុងតាមរកចាប់ខ្លួន ។នៅពេលឃាត់ខ្លួន សមត្ថកិច្ចនគរបាលដកហូតបានវត្ថុុតាងមានកាំបិតកាចែត១ (ឧបករណ៍សម្រាប់ធ្វើឃាត), អាវុធខ្លីម៉ាកឡុក១៧ ប្រើហ្គាសចំនួន១, ម៉ូតូចំនួន៣គ្រឿង ម៉ាកហុងដាឌ្រីមធុនសេ១២៥ សេរីឆ្នាំ២០១៧ ចំនួន២គ្រឿង និងម៉ាក MSX មួយគ្រឿង ។
ចំពោះមូលហេតុឈានដល់ការកាប់សម្លាប់គ្នាដោយសារគំនុំរវាងក្រុមបងតូចបងធំដែលជនរងគ្រោះជាបងធំនៅក្រុមកាំបិតធំបានផ្ញើសារតាមរយៈហ្វេសប៊ុកថា ឲ្យតែជួបមុខជាមួយ ក្រុមK-BOY ក្រុមA.L និងក្រុមADZនឹងសម្លាប់ចោលមិនរើសមុខ ទើបទាំងបីក្រុមខាងលើតាមស្វែងរកក្រុមកាំបិតធំ ។ លុះពេលប្រទះឃើញក៏ចាប់ផ្តើមបើកឆាកប្រយុទ្ធគ្នា គ្មានប្រណី ។ ដោយសារតែភាគីម្ខាងមានគ្នាច្រើន ក៏បានកាប់ទៅលើជនរងគ្រោះជាបងធំក្រុមកាំបិតធំរហូតដល់ស្លាប់ ។ ជនរងគ្រោះរូបនេះឈ្មោះ សយ លួន ភេទប្រុស អាយុ១៩ឆ្នាំ ជាបុគ្គលិកប៉ាវម៉ាយ (ជាក្រុមកាំបិតធំ) ។ ករណីនេះកម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់កំពុងបន្តនីតិវិធី បញ្ជូនទៅសាលាដំបូងខេត្តដើម្បីផ្តន្ទាទោសទៅតាមនីតិវិធីច្បាប់ ។
ចែករំលែកព័តមាននេះ