ខេត្តព្រៃវែង ៖ ចៅក្រមស៊ើបសួរនៃសាលាដំបូងខេត្តព្រៃវែង បានចេញដីកាសម្រេចឃុំខ្លួនកូនថៅកែឈើយីហោ វិបុល ជាបណ្ដោះអាសន្ននៅពន្ធនាគារខេត្តព្រៃវែង បន្ទាប់ពីជនសង្ស័យខាងលើបានយកឈ្មោះថា្នក់ដឹកនាំ មកគំរាមអ្នកកាសែត និងអាជ្ញាធរមានសមត្ថកិច្ច ដើម្បីកាងអាជីវកម្មផ្ទាល់ខ្លួន។ បើតាមលោក ញឹក រ៉ាន្នី អ្នកនាំពាក្យសាលាដំបូងខេត្តព្រៃវែងបានឲ្យដឹងថា នៅល្ងាចថ្ងៃទី១៨ ខែធ្នូ ឆ្នាំ២០១៧នេះថា លោក ឃ្លោក ពិសិដ្ឋ ចៅក្រមស៊ើបសួរនៃសាលាដំបូងខេត្តព្រៃវែង បានចេញដីកា សម្រេចឃុំខ្លួនជនជាប់ចោទឈ្មោះ វី ចាន់ណា ភេទប្រុស អាយុ២២ឆ្នាំ ជានិស្សិតឆ្នាំទី១ នៅវិទ្យាស្ថានជាតិ ពហុបច្ចេកទេសកម្ពុជា (NPIC) ដែលមានទីលំនៅបច្ចុប្បន្នភូមិព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែងហើយ ពីបទ “ប្រើប្រាស់ដោយមិនប្រក្រតីនូវឋានៈណាមួយ” ដែលបានប្រព្រឹត្តនៅភូមិឃុំរបស់ខ្លួន កាលពីថ្ងៃទី១៣ ខែធ្នូ ឆ្នាំ២០១៧ វេលាម៉ោង១រសៀល តាមបញ្ញាតិមាត្រា៦២០ នៃក្រមព្រហ្មទណ្ឌ នៃព្រះរាជាណាចក្រកម្ពុជា ដោយយោងតាមដីកាសន្និដ្ឋានបញ្ជូនរឿងឲ្យស៊ើបសួរលេខ៣៩៤ ចុះថ្ងៃទី១៨ ខែធ្នូ ឆ្នាំ២០១៧។
គួររំលឹកថា លោក ប៊ី វី ជាម្ចាស់ដេប៉ូឈើឈ្មោះ (វិបុល) ដែលមានទីតាំងនៅភូមិព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង បានមានទំនាស់ជាមួយអ្នកកាសែតចំនួនបីនាក់ រហូតឈានដល់ការដាក់ពាក្យបណ្តឹងទៀតផង។ ក្រោយមកជនសង្ស័យឈ្មោះ វី ចាន់ណា ដែលត្រូវជាកូនក៏បានទូរស័ព្ទមកអ្នកសាព័ត៌មានដោយនិយាយគំរាមកំហែងថា បើអ្នកកាសែតទាំងបីនាក់នោះខ្លាំង មេខ្ញុំគឺលោក ស សុខា ឲ្យទៅជួបនៅទីស្ដីការគណៈរដ្ឋមន្ត្រីជាន់ទី០៧ បន្ទប់លេខ២ ដោយទៅជួបជាមួយសម្ដេចតេជោ ហ៊ុន សែន ផ្ទាល់តែម្ដង មិនបាច់ប្ដឹងផ្ដល់អីទេ ព្រោះថាកូនម្ចាស់ដេប៉ូឈើនេះគឺធ្វើការនៅជាមួយលោក ស សុខា បើថាពិបាកពេកថ្ងៃច័ន្ទក្រោយ ទៅជួបសម្ដេចតែម្ដងឲ្យដឹងរឿង ដោយលោកបានបញ្ជាក់ថាខ្ញុំនិយាយមែន។
លុះដល់ព្រឹកថ្ងៃទី១៧ ខែធ្នូ ឆ្នាំ២០១៧ ជនសង្ស័យឈ្មោះ វី ចាន់ណា ត្រូវបានសមត្ថកិច្ច ឃាត់ខ្លួននៅស្នងការរដ្ឋាននគរបាលខេត្តព្រៃវែង និងកសាងសំណុំរឿងបញ្ជូនមកអយ្យការអមសាលាដំបូងខេត្ត នៅព្រឹកថ្ងៃទី១៨ ខែធ្នូ ឆ្នាំ២០១៧នេះ។ ទោះបីជាយ៉ាងណាក៏ដោយគេសង្កេតឃើញថា ជនសង្ស័យឈ្មោះ វី ចាន់ណា បានបង្ហោះសារជាវីឌីអូ សុំទោសដល់សម្តេចតេជោ ហ៊ុន សែន និងឯកឧត្តម ស សុខា កាលពីល្ងាចថ្ងៃទី១៧ ខែធ្នូ ខណៈដែលរូបខ្លួនកំពុងត្រូវបានឃាត់ខ្លួនសាកសួរនៅស្នងការនគបាលខេត្តព្រៃវែង ដើម្បីឱ្យថ្នាក់ដឹកនាំអភ័យទោសនូវទោសកំហុសរបស់ខ្លួនផងដែរ៕
ចែករំលែកព័តមាននេះ