ធារី ចន្ថាប៊ីន និង កែវ សុខផេង នឹងក្លាយជាគូប្រជែង ចាន់ វឌ្ឍនាកា
- ភ្នំពេញ
រាជធានីភ្នំពេញ ៖ យោងតាមព័ត៌មានផ្លូវការកីឡាករបាល់ទាត់ល្បីឈ្មោះ៣រូប គឺ ធារី ចន្ថាប៊ីន ចាន់ វឌ្ឍនាកា និងកែវ សុខផេង…
រាជធានីភ្នំពេញ ៖ យោងតាមព័ត៌មានផ្លូវការកីឡាករបាល់ទាត់ល្បីឈ្មោះ៣រូប គឺ ធារី
ចន្ថាប៊ីន ចាន់ វឌ្ឍនាកា និងកែវ សុខផេង ពិតជាលេងឱ្យក្រុមបាល់ទាត់នៅក្នុងប្រទេសម៉ាឡេស៊ី បើទោះជាចាន់ វឌ្ឍនាកា នៅមិនទាន់បង្ហើបចេញពីមាត់ថានោះជាព័ត៌មានពិតយ៉ាងណាក្ដី ។ អ្វីដែលច្បាស់ទៅទៀតគឺកីឡាករទាំង៣នឹងលេងក្នុងក្លិបផ្សេងគ្នានៅក្នុងប្រទេសម៉ាឡេស៊ី បន្ទាប់ពីប្រទេសនេះបានចេញច្បាប់អនុញ្ញាតឱ្យកីឡាករអាស៊ានមួយរូបៗអាចលេងក្នុងក្លិបនីមួយៗបានសម្រាប់រដូវកាលថ្មី ។ អ៊ីចឹងហើយទើបវត្តមានទៅលេងនៅក្នុងប្រទេសម៉ាឡេស៊ីរបស់អ្នកទាំង៣ នឹងធ្វើឱ្យពួកគេក្លាយជាគូប្រជែងប្រជាប្រិយភាព ដើម្បីឱ្យច្បាស់ថា នៅពេលបានទៅលេងនៅលើទឹកដីតែមួយ តើកីឡាករណាមួយទទួលបានឱកាសច្រើនជាង និងលេចធ្លោច្រើនជាង ។
មានការភ្ញាក់ផ្អើលមិនតិចនោះទេ ក្នុងពេលដែលប្រទេសម៉ាឡេស៊ីបានបើកឱកាសទិញដូរកីឡាករនៅតំបន់អាស៊ានច្រើនឡើង ដោយកីឡាករកម្ពុជាបានក្លាយជាមុខសញ្ញាក្នុងតម្រូវការរបស់ក្លិបធំៗនៅក្នុងប្រទេសនេះ ។ ជាជំហានដំបូងគេឃើញកីឡាករកម្ពុជា៣រូបត្រូវបានជាប់ឈ្មោះចេញទៅលេងក្នុងលីគកំពូលរបស់ប្រទេសម៉ាឡេស៊ីគឺ Super League ខណៈដែលតួនាទីក្នុងការចេញទៅលេងរបស់ពួកគេ និងតម្លៃខ្លួនក៏មិនដូចគ្នាផងដែរ ។ ជម្រើសនៃការងាកមកទិញកីឡាករបរទេសចូលលេងនេះ គឺបន្ទាប់ពីប្រទេសម៉ាឡេស៊ី បានចេញច្បាប់ដោយកំណត់ថា ចាប់ពីឆ្នាំ២០១៨ រហូតដល់២០២១ ក្លិបនៅលីគកំពូលទាំងអស់នៅក្នុងប្រទេសនេះ មានសិទ្ធិទិញកីឡាករបរទេសបានចំនួន៥នាក់ក្នុងមួយក្លិប ដោយក្នុងចំណោមកីឡាករទាំង៥ គឺតម្រូវឱ្យមានកីឡាករនៅតំបន់អាស៊ីម្នាក់ និងតំបន់អាស៊ានម្នាក់ ។
អ៊ីចឹងហើយទើបគេកត់សម្គាល់ថា ប្រទេសម៉ាឡេស៊ីបានងាកមកសម្លឹងមើលកីឡាករជម្រើសជាតិខ្លាំងៗរបស់កម្ពុជាច្រើនឡើង ដោយសូម្បីតែកីឡាករ ចាន់ វឌ្ឍនាកា ដែលទើបតែបញ្ចប់កុងត្រាលេងឱ្យក្លិបមួយនៅក្នុងប្រទេសជប៉ុន ក៏ត្រូវបានក្លិបមួយរបស់ប្រទេសនេះទិញយកទៅលេងផងដែរ បើទោះជាមិនទាន់មានការទទួលស្គាល់ពីចាន់ វឌ្ឍនាកា នៅឡើយ ។ អ្វីដែលគេកត់សម្គាល់ គឺក្លិបនីមួយៗ បានយល់ព្រមផ្ដល់លក្ខខណ្ឌល្អៗជាច្រើនដល់កីឡាករកម្ពុជាទាំងឱកាសផ្ដល់ឱ្យលេងក្នុងលីគ និងការផ្គត់ផ្គង់ជាច្រើនផ្សេងទៀតនោះផង ។
ម្យ៉ាងប្រទេសម៉ាឡេស៊ី មានស្ថានភាពអាកាសធាតុមិនខុសគ្នានឹងនៅកម្ពុជានោះផង ទើបគេមើលឃើញថា បើទោះជាម៉ាឡេស៊ី មិនល្បីដូចជប៉ុនសម្រាប់វិស័យបាល់ទាត់់ តែការចេញទៅលេងរបស់កីឡាករកម្ពុជា ក៏នឹងទទួលឱកាសមិនធម្មតា ។ កីឡាករកម្ពុជាត្រូវបានប្រធានក្លិបនីមួយៗរបស់ម៉ាឡេស៊ី ផ្ដល់ឱ្យនូវរថយន្តមួយគ្រឿង និងផ្ទះស្នាក់នៅមួយកន្លែង បន្ថែមពីលើប្រាក់ខែដ៏ច្រើនដែលអាចឱ្យពួកគេបង្កើនសមត្ថភាព និងភាពលេចធ្លោដោយមិនលំបាកនោះផង ។ ប៉ុន្តែមានការបញ្ជាក់ថា កីឡាករទាំង៣មិនលេងក្នុងក្លិបតែមួយនោះទេ ទើបវត្តមានទៅលេងនៅក្នុងប្រទេសម៉ាឡេស៊ីរបស់ពួកគេ គឺមិនខុសអីនឹងរុញឱ្យ ធារី ចន្ថាប៊ីន និង កែវ សុខផេង នឹងក្លាយជាគូប្រជែងប្រជាប្រិយភាពជាមួយនឹងចាន់ វឌ្ឍនាកា ដែលជាកីឡាករល្បីឈ្មោះនាំមុខគេនៅក្នុងពិភពបាល់ទាត់នោះទេ។
យោងតាមការទម្លាយ ធារី ចន្ថាប៊ីន ដែលត្រូវគេស្គាល់ថា ជាអតីតកីឡាករភ្នំពេញក្រោន
បានចុះកុងត្រារួចរាល់ហើយជាមួយក្លិប Terengganu FC នៃក្របខ័ណ្ឌបាល់ទាត់កំពូលរបស់ប្រទេសម៉ាឡេស៊ី ដោយលោកនឹងចំណាយពេលរយៈពេល១ឆ្នាំ ឬមួយរដូវកាលសម្រាប់ការទៅលេងឱ្យក្លិបនោះ ។ មិនទាន់មានព័ត៌មានលម្អិតណាមួយជុំវិញការសម្រេចចិត្តរបស់លោកនោះទេ ប៉ុន្តែអ្វីដែលបានទម្លាយគឺគេមិនត្រឹមតែត្រូវខំលេងឱ្យខ្លាំងប៉ុណ្ណោះទេ ប៉ុន្តែក៏ត្រូវទាក់ទាញប្រជាប្រិយជាមួយនឹងកីឡាករកម្ពុជា២រូបទៀត នៅលើទីលានផងដែរ ។ មានការបញ្ជាក់ថា ធារី ចន្ថាប៊ីន ដែលធ្លាប់តែចាប់ដៃលេងជាមួយចាន់ វឌ្ឍនាកា និង កែវ សុខផេង ក្នុងក្រុមជម្រើសជាតិ នឹងត្រូវលេងយ៉ាងប្រជែងជាមួយអ្នកទាំងពីរវិញនៅក្នុងប្រទេសម៉ាឡេស៊ី ក្រោយពេលចាកចេញពីដីកំណើត ពោលគឺមិនខុសគ្នាពីពេលដែលពួកគេស្ថិតក្នុងក្លិបផ្សេងគ្នានៅកម្ពុជា ដែលត្រូវលេងប្រជែងគ្នានោះទេ ។ ប៉ុន្តែវាខុសគ្នាត្រង់ថា លោកត្រូវការភាពលេចធ្លោច្រើនជាងលេងឱ្យក្លិបចាស់នៅកម្ពុជា ដោយសារតែឱកាសទៅលេងនៅប្រទេសម៉ាឡេស៊ី គឺតម្រូវឱ្យលោកដណ្ដើមក្រេឌីតឱ្យបានច្រើន ដើម្បីបន្តជំហានទៅក្លិបក្រៅប្រទេសដែលមានឈ្មោះបោះសំឡេងបន្តទៀត ។
កែវ សុខផេង ដែលត្រូវគេស្គាល់ថា ជាសមាជិកជម្រើសជាតិកម្ពុជាដ៏សំខាន់ដែរនោះ ក៏ទើបបានកុងត្រាជាមួយក្លិបមួយនៅក្នុងប្រទេសម៉ាឡេស៊ីផងដែរ ដោយលោកនឹងចាកចេញទៅកាន់ប្រទេសនោះនៅអំឡុងដើមឆ្នាំ២០១៨ខាងមុខ ។ ខ្សែបម្រើប្រយុទ្ធវ័យក្មេងរូបនេះ បានចុះកុងត្រាលេងឱ្យក្លិប PKNP FC ដែលជាក្លិបថ្មីមួយទើបមានឱកាសលេងក្នុងលីគកំពូលរបស់ម៉ាឡេស៊ី កាលពីរដូវកាលមុន ដែលតាមការរំពឹងវត្តមានរបស់លោកទៅលេងឱ្យក្លិបនេះ ក៏នឹងរំពឹងពីភាពលេចធ្លោផងដែរ ប្រសិនបើក្លិបនេះបន្តឈានជើងក្នុងលីគកំពូលរបស់ប្រទេសម៉ាឡេស៊ីបន្តទៀត ។ មានការបញ្ជាក់ថា លោកមិនលេងរួមក្លិបជាមួយ ធារី ចន្ថាប៊ីន និងចាន់ វឌ្ឍនាកា នោះទេ ទើបជារឿងច្បាស់ណាស់ថា វត្តមានទៅលេងរបស់គេនៅក្រៅប្រទេសក្នុងពេលដ៏ខ្លីនេះ គឺត្រូវប្រជែងជាមួយមិត្តរួមក្រុមទាំង២ ។
កែវ សុខផេង បានអះអាងថា គឺជាឱកាសថ្មីមួយដែលគេត្រូវបានក្លិបរបស់ប្រទេសម៉ាឡេស៊ី កុងត្រាឱ្យទៅលេងស្របគ្នាដែលលោកក៏សម្រេចចិត្តទៅលេងទាំងការស្រឡាញ់ និងពេញចិត្តផងដែរ ។ លោកទទួលបានប្រាក់ខែសមរម្យ ដោយក្រៅពីនោះក៏ទទួលបានរថយន្ត១គ្រឿងសម្រាប់ធ្វើដំណើរ និងមានផ្ទះ១ខ្នងសម្រាប់ស្នាក់នៅ ។ អ្វីដែលពិសេសលេខ១០ដែលរូបគេពាក់ឲ្យជម្រើសជាតិកម្ពុជាកន្លងមក ក៏ត្រូវបានក្លិប PKNP FC របស់ម៉ាឡេស៊ី បន្តផ្ដល់ឱ្យដដែល ។
ចាន់ វឌ្ឍនាកា ដ្បិតថាមិនទាន់ប្រកាសជាផ្លូវការ ប៉ុន្តែប្រភពជាក់លាក់បានបញ្ជាក់ហើយថា កីឡាកររូបនេះទៅលេងឱ្យក្លិបមួយដូចគ្នានៅក្នុងប្រទេសម៉ាឡេស៊ី ខណៈដែលក្លិបនោះត្រូវបានបង្ហើបថាមិនមែនជាក្លិបដែល ធារី ចន្ថាប៊ីន និងកែវ សុខផេង កុងត្រាលេងឱ្យ ។ នៅចុងខែធ្នូនេះ ចាន់ វឌ្ឍនាកា នឹងធ្វើសន្និសីទប្រកាសឱ្យដឹងពីឈ្មោះក្លិបរបស់ម៉ាឡេស៊ី ដែលខ្លួនព្រមលេងឱ្យ ខណៈដែលវត្តមានរបស់លោក ក៏ត្រូវបានអ្នកគាំទ្រខ្លះលើកឡើងថា ត្រូវការការប្រឹងប្រែងច្រើនជាងធារី ចន្ថាប៊ីន និងកែវ សុខផេង ដើម្បីរក្សាភាពលេចធ្លោក្នុងនាមជាកីឡាករល្បីឈ្មោះជាងគេនៅកម្ពុជាក្នុងវិស័យបាល់ទាត់បាន។ យ៉ាងណាមិញ កីឡាករទាំង៣ត្រូវបានគេសន្និដ្ឋានថានឹងល្បីព្រមគ្នា បន្ទាប់ពីមានឱកាសទៅលេងនៅលើទីលានតែមួយនៅក្នុងប្រទេសម៉ាឡេស៊ី ដែលជាប្រទេសមានការរីកចម្រើនលើវិស័យបាល់ទាត់មិនធម្មតានៅក្នុងតំបន់អាស៊ាននាពេលចុងក្រោយ ៕
ចែករំលែកព័តមាននេះ