«សារសំខាន់នៃការបែងចែកពេលវេលា គឺជាការកំណត់ភាពជោគជ័យ»
ការមិនបែងចែកពេលវេលា អាចធ្វើឱ្យថ្ងៃធម្មតាមួយថ្ងៃៗក្លាយជាថ្ងៃមិនល្អបាន មិនថាភ្លេចធ្វើរឿងអ្វីមួយ ឬធ្វើការងារយឺតហួសកំណត់។ មនុស្សគ្រប់រូបមានវិធីបែងចែកពេលវេលាមិនដូចគ្នាទេ អ្នកខ្លះបែងចែកបានល្អ ខណៈខ្លះទៀតកំពុងរៀនសូត្រ និងកែតម្រង់ខ្លួនឯង។ ប៉ុន្តែមនុស្សខ្លះតែងធ្វើអ្វីបរាជ័យជាប្រចាំ ដោយសារមិនស្គាល់ពីការបែងចែកពេលវេលា ។ តើឥរិយាបថមិនល្អនៃការគ្រប់គ្រងពេលវេលាមានអ្វីខ្លះ ?
១-មិនរៀបចំតារាងពេលវេលា ៖
ការគិតថា ខ្លួនអាចចាត់ការលើគ្រប់យ៉ាងបាន ដោយមិនចាំបាច់ដាក់ផែនការ ឬចាត់ចែងពេលវេលា គឺអ្នកកំពុងគិតខុសហើយ ព្រោះការរៀបចំតារាងពេលវេលាមានសារសំខាន់យ៉ាងខ្លាំង វាអាចដាក់ផែនការទៅលើរឿងផ្សេងៗយ៉ាងលម្អិត និងកត់ត្រាពីអ្វីដែលត្រូវធ្វើក្នុង១ថ្ងៃៗ ដោយមិនបោះបង់រឿងណាមួយចោល ។ ការរៀបចំតារាងពេលវេលាមិនល្អ នឹងបាត់បង់ពេលធ្វើកិច្ចការផ្សេងទៀត ឬអាចភ្លេចធ្វើរឿងសំខាន់ដោយងាយ ។
២-មិនកត់ត្រា ៖
«កំណត់ត្រា គឺជាគូនឹងការធ្វើផែនការ»
វិធីងាយៗ គឺកត់ត្រាក្នុងឧបករណ៍នៅក្បែរខ្លួន ។ អ្វីៗក៏អាចធ្វើជាឧបករណ៍កត់ត្រាបានទាំងអស់ មិនថា ទូរស័ព្ទដៃ ប្រតិទិន ឬក្រដាស។ យើងគួរកត់ត្រាទុកក្នុងកន្លែងតែមួយជាការល្អ ព្រោះពេលយកមកប្រើ នឹងអាចរកបានដោយងាយ និងមិនភ្លេចថា កត់ត្រានៅទីណា ។
៣-គ្មានសមាធិជាមួយអ្វីដែលកំពុងធ្វើ ៖
«អ្នកមិនជោគជ័យភាគច្រើន គឺមិនផ្តោតជាមួយរឿងកំពុងធ្វើ»
បើចិត្តរបស់យើងមិនសូវនៅក្នុងខ្លួន ភាន់ភាំង ដោយគិតពីរឿងផ្សេងជាញឹកញាប់ វានឹងក្លាយជាបញ្ហា ។ ដូច្នេះ ត្រូវចៀសវាងអ្វីដែលធ្វើឱ្យវីវក់ និងព្យាយាមផ្តោតទៅលើកិច្ចកំពុងធ្វើវិញ ។
៤-ចូលចិត្តទុកដល់ថ្ងៃស្អែក ៖
វាជារឿងធម្មតាសម្រាប់ការរង់ចាំដល់ថ្ងៃស្អែក ប៉ុន្តែការរង់ចាំពីមួយថ្ងៃទៅមួយថ្ងៃ រហូតដល់ក្លាយជាទម្លាប់នោះ គឺជាបញ្ហា ។ បើសិនជាអ្នកខ្ជិល ឬតែងយកអ្វីមកសំអាង និងប្រាប់ខ្លួនឯងថា ៖ «បន្តិចទៀត នឹងត្រឡប់មកធ្វើ» ឬ «ទុកចាំធ្វើនៅថ្ងៃក្រោយ» វាជាសញ្ញាមិនល្អទេ អ្នកគួរតែរកកម្លាំងចិត្ត និងប្រញាប់ធ្វើការងារនោះឱ្យរួចរាល់ ។
៥-មិនអនុវត្តកិច្ចការប្រចាំថ្ងៃ ៖
កិច្ចការផ្សេងៗដែលអ្នកធ្វើជាប្រចាំ តែងជួយជំរុញកម្លាំងចិត្ត មិនថាការញ៉ាំកាហ្វេនៅពេលព្រឹក រហូតដល់ការហាត់ប្រាណនៅពេលរសៀល ដែលកិច្ចការទាំងនេះសុទ្ធតែជួយចាត់រូបបែបការប្រើជីវិតឱ្យល្អប្រសើរឡើង ។
៦-មិនបែងចែកពេលវេលាទៅលើអ្វីដែលខ្លួនចូលចិត្ត ៖
ជីវិតនឹងមានន័យអ្វី បើអ្នកគិតតែធ្វើការតែម្យ៉ាង ប៉ុន្តែជីវិតគ្មានក្តីសុខទេ ។ ការបែងចែកពេលវេលាទៅលើកិច្ចការដែលចូលចិត្ត គឺជារឿងសំខាន់មួយ ព្រោះការរវល់ខ្លាំងរហូតគ្មានពេលវេលាសម្រាកនោះ ចុងក្រោយ អ្នកក៏ត្រូវឈប់ធ្វើកិច្ចការទាំងនេះផងដែរ ។
៧-ភ្លេចថ្ងៃសម្រាកចុងសប្តាហ៍ ៖
«កុំបណ្តោយឱ្យថ្ងៃឈប់សម្រាករបស់អ្នកកន្លងផុតទៅដោយទទេ»
យើងអាចដាក់ផែនការថា នឹងធ្វើអ្វីខ្លះនៅក្នុងថ្ងៃឈប់សម្រាកទាំងនេះ ។ ការធ្វើផែនការសម្រាប់ថ្ងៃឈប់ នឹងអាចសង្កេតមើលការប្រើពេលវេលារបស់ខ្លួន ដែលធ្វើឱ្យការសម្រាកមានតម្លៃខ្លាំងបំផុត និងធ្វើអ្វីរីករាយជាច្រើនតាមផែនការកំណត់ទុក ។
៨-មិនកំណត់គោលដៅ ៖
«តើគោលដៅក្នុងថ្ងៃនេះ អាទិត្យនេះ និងខែនេះ មានអ្វីខ្លះ ?»
ការកំណត់គោលដៅ នឹងធ្វើឱ្យជីវិតអ្នកមានរបៀបខ្លាំងឡើង ទោះបីជាមិនអាចធ្វើតាមគោលដៅដែលបានកំណត់ទុកទាំងអស់ក្តី ប៉ុន្តែយ៉ាងហោចណាស់ ក៏អ្នកអាចបោះជំហានទៅមុខបានដែរ ។
៩-មិនព្រមចាត់ភាពសំខាន់ ៖
ការងារ ប្រាក់ និងជីវិតផ្ទាល់ខ្លួន ការចាត់លំដាប់សំខាន់នៃរឿងទាំងនេះសុទ្ធតែសំខាន់ ថែមទាំងស្របនឹងការបែងចែកពេលវេលាទៀតផង ។ បើមិនបានចាត់ភាពសំខាន់ឱ្យល្អទេ អ្នកអាចប្រើពេលវេលារហូតដល់អស់ជាមួយការងារតែម្យ៉ាង និងភ្លេចរឿងសំខាន់ផ្សេងទៀត ។
ការធ្វើផែនការផ្សេងៗ គឺអាចសាកល្បងរៀបជាបញ្ជីថា រឿងណាខ្លះត្រូវធ្វើ និងមិនទាន់ចាំបាច់ ។ ការប្រើវិធីនេះ នៅពេលធ្វើរឿងជាច្រើនមិនទាន់ អ្នកនឹងដឹងថា រឿងណាគួរធ្វើមុន ហើយរឿងណាគួរដកចេញ ។
១០-ធ្វើកិច្ចការច្រើនខ្លាំងពេក ៖
ការធ្វើកិច្ចការច្រើនខ្លាំងពេក រហូតស្ទើរតែគ្មានពេលសម្រាក អាចនិយាយថា អ្នកគ្រប់គ្រងពេលវេលាមិនបានល្អគ្រប់គ្រាន់ទេ ។ បើអ្នកមានអារម្មណ៍មិនសប្បាយចិត្តជាមួយកិច្ចការដ៏ច្រើននោះ គួរតែកាត់បន្ថយវា ព្រោះបើមិនដូច្នេះទេ បញ្ហាជាច្រើននឹងតាមមកយ៉ាងពិតប្រាកដ ។
១១-ប្រើជីវិតរហូតអស់ថាមពល ៖
ការបែងចែកពេលវេលាមិនល្អ ឬមិនចេះបែងចែក អ្នកអាចនឹកដល់មនុស្សខ្ជិលដែលគិតតែពីគេងពេញ១ថ្ងៃ ។ ប៉ុន្តែអ្នកបែងចែកពេលវេលាមិនល្អមានច្រើនបែប អ្នកខ្លះធ្វើការច្រើនខ្លាំងពេករហូតដល់រ៉ាប់រងមិនបាន ហើយខ្លះទៀត ទុកកិច្ចការពីមួយថ្ងៃទៅមួយថ្ងៃ រហូតដល់ចុងក្រោយ ទើបបង្កើនលឿន ។ រឿងដូចគ្នាសម្រាប់មនុស្សទាំងនេះ គឺឱកាសរបស់ពួកគេនឹងបាត់បង់ទៅ ។
ជាចុងក្រោយ អ្នកដែលមិនទទួលបានជោគជ័យ តែងហត់នឿយពីការគ្រប់គ្រងពេលវេលាមិនបានល្អ ។ ហេតុនេះ បើអ្នកមានឥរិយាបថដូចការលើកឡើងខាងលើ គួរចាប់ផ្តើមចាត់ចែងលើខ្លួនឯងបានហើយ ៕
ចែករំលែកព័តមាននេះ