អាមេរិក-អង់គ្លេស ចុះកិច្ចព្រមព្រៀងវិនិយោគជាប្រវត្តិសាស្ត្រតម្លៃ ៣៤០ពាន់លានដុល្លារ
ចក្រភពអង់គ្លេស ៖ ប្រធានាធិបតីអាមេរិក លោក ដូណាល់ ត្រាំ (Donald Trump) និងនាយករដ្ឋមន្ត្រីអង់គ្លេស លោក…
ចក្រភពអង់គ្លេស ៖ ប្រធានាធិបតីអាមេរិក លោក ដូណាល់ ត្រាំ (Donald Trump) និងនាយករដ្ឋមន្ត្រីអង់គ្លេស លោក ខៀរ ស្តារម័រ (Keir Starmer) កាលពីថ្ងៃទី១៨ ខែកញ្ញា ឆ្នាំ២០២៥ បានចុះហត្ថលេខាលើកិច្ចព្រមព្រៀងវិនិយោគបច្ចេកវិទ្យាជាមួយតម្លៃកំណត់ត្រាជាប្រវត្តិសាស្ត្រ ៣៤០ពាន់លានដុល្លារ ដែលត្រូវបានហៅថា «កិច្ចព្រមព្រៀងវិបុលភាពបច្ចេកវិទ្យា» ដើម្បីពង្រឹងកិច្ចសហប្រតិបត្តិការទ្វេភាគីក្នុងវិស័យបញ្ញាសិប្បនិមិត្ត AI កុំព្យូទ័រកង់ទិច (បច្ចេកវិទ្យាពហុជំនាញ) និងថាមពលនុយក្លេអ៊ែរ។
កិច្ចព្រមព្រៀងជាប្រវត្តិសាស្ត្រនេះ ធ្វើឡើងក្នុងក្របខ័ណ្ឌនៃដំណើរទស្សនកិច្ចផ្លូវរដ្ឋរបស់លោក ត្រាំ ទៅកាន់ចក្រភពអង់គ្លេស។ នាយករដ្ឋមន្ត្រីអង់គ្លេសបានហៅកិច្ចព្រមព្រៀងនេះថា កញ្ចប់វិនិយោគដ៏សំខាន់បំផុតក្នុងប្រវត្តិសាស្ត្រចក្រភពអង់គ្លេស ដោយបង្កើនកិច្ចសហប្រតិបត្តិការរវាងអាមេរិក និងចក្រភពអង់គ្លេសក្នុងវិស័យដូចជា AI កុំព្យូទ័រកង់ទិច និងថាមពលនុយក្លេអ៊ែរ។
លោកថ្លែងថា កិច្ចព្រមព្រៀង និងការប្តេជ្ញាចិត្តក្នុងការវិនិយោគបានបំបែកកំណត់ត្រាកិច្ចព្រមព្រៀងពីមុនទាំងអស់ ដែលមានតម្លៃសរុបប្រហែល ៣៤០ពាន់លានដុល្លារ និងជាកញ្ចប់វិនិយោគដ៏ធំបំផុតនៅចក្រភពអង់គ្លេសដែលមិនធ្លាប់មាន និងបានកត់សម្គាល់ថាជាកិច្ចព្រមព្រៀងដ៏អស្ចារ្យ។
កិច្ចព្រមព្រៀងនេះ តំណាងឱ្យកញ្ចប់ពាណិជ្ជកម្មដ៏ធំបំផុត អំឡុងពេលទស្សនកិច្ចផ្លូវរដ្ឋ ដោយសាជីវកម្មសហរដ្ឋអាមេរិកបានសន្យាថានឹងវិនិយោគប្រាក់ ២០៤ពាន់លានដុល្លារ នៅចក្រភពអង់គ្លេស។ គ្រាន់តែក្រុមហ៊ុនអាមេរិក Blackstone តែមួយនឹងវិនិយោគដល់ ១២២ពាន់លានដុល្លារក្នុងរយៈពេល១០ឆ្នាំខាងមុខ។ ចំណែកក្រុមហ៊ុនឱសថអង់គ្លេស GlaxoSmithKline ក៏បានសន្យាថានឹងវិនិយោគប្រហែល ៤០ពាន់លានដុល្លារនៅសហរដ្ឋអាមេរិក។ ទោះយ៉ាងណាក៏ដោយ តួលេខវិនិយោគដែលនៅសេសសល់មិនត្រូវបានប្រកាសឱ្យដឹងលម្អិតនោះទេ។
នាយករដ្ឋមន្ត្រីអង់គ្លេសក៏បានគូសបញ្ជាក់ថា កញ្ចប់នៃកិច្ចព្រមព្រៀងផ្តោតសំខាន់ទៅលើវិស័យបច្ចេកវិទ្យា AI ជាមួយការប្តេជ្ញាចិត្តវិនិយោគពីក្រុមហ៊ុនបច្ចេកវិទ្យាឈានមុខដូចជា Nvidia, Nscale, OpenAI, Google និង Salesforce ជាដើម ដោយរំពឹងថានឹងបង្កើតការងារប្រហែល ១៥ ០០០កន្លែងនៅអង់គ្លេសក្នុងឆ្នាំខាងមុខនេះ។ ជាមួយគ្នានោះ លោកក៏រំលេចថា កញ្ចប់នេះក៏រួមបញ្ចូលផងដែរនូវកិច្ចព្រមព្រៀងថ្មីមួយស្តីពីកិច្ចសហប្រតិបត្តិការថាមពលនុយក្លេអ៊ែរស៊ីវិល ជាមួយផែនការសាងសង់រោងចក្រថាមពលនុយក្លេអ៊ែរកម្រិតខ្ពស់ចំនួន ១២ នៅភាគឦសាន អង់គ្លេស ដើម្បីផ្តល់អគ្គិសនីដល់ផ្ទះ និងអាជីវកម្មរាប់លាន។ នេះនឹងជួយកាត់បន្ថយថ្លៃដើមនៃការរស់នៅ និងបង្កើនសន្តិសុខថាមពលនៅសងខាងនៃមហាសមុទ្រអាត្លង់ទិកផងដែរ។
ក្រឡេកទៅ លោកប្រធានាធិបតី ត្រាំ បានបញ្ជាក់សាជាថ្មីថា ទំនាក់ទំនងរវាងអាមេរិក និងចក្រភពអង់គ្លេស គឺពិសេស និង មិនអាចបំបែកបានឡើយ ដោយលោកថ្លែងដូច្នេះថា «យើងចូលរួមជារៀងរហូត ហើយយើងជាមិត្តជារៀងរហូត ហើយយើងនឹងជាមិត្តនឹងគ្នាជានិច្ច»៕ ដកស្រង់ ៖ Reuters, Fox News និង Znews
ចែករំលែកព័តមាននេះ