ខេត្តបន្ទាយមានជ័យ ៖ លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា CMAC បានប្រកាសនៅលើបណ្តាញសង្គមហ្វេសប៊ុករបស់លោក នារសៀលថ្ងៃទី១០ ខែតុលា…
ខេត្តបន្ទាយមានជ័យ ៖ លោក ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា CMAC បានប្រកាសនៅលើបណ្តាញសង្គមហ្វេសប៊ុករបស់លោក នារសៀលថ្ងៃទី១០ ខែតុលា ឆ្នាំ២០២៥នេះថា ៖ ថ្ងៃទី១០ ខែតុលា ឆ្នាំ២០២៥នេះ កងកម្លាំងសៀម និងគ្រឿងចក្របានបំពានដែនអធិបតេយ្យភាពកម្ពុជាជាថ្មី ស្ថិតនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
លោក ហេង រតនា បានបញ្ជាក់ថា សកម្មភាពនេះ ស្ថិតក្រោមក្រសែភ្នែកជាតិ និងអន្តរជាតិ ជាពិសេសក្រុមអ្នកសង្កេតការណ៍អន្តរកាល (IOT) អញ្ជើញចុះពិនិត្យសកម្មភាពល្មើសនៅទីតាំងជាក់ស្តែងតែម្តង! ។
ជាចុងក្រោយលោកហេង រតនា បានបន្តថា ទង្វើនេះមិនមែនជាការដោះមីនមនុស្សធម៌ទេ តែជាការដោះគ្រាប់មីនដើម្បីឈ្លានពាន!! ។
សូមរំលឹកបញ្ជាក់ថា នៅរសៀលថ្ងៃនេះ កងកម្លាំងចម្រុះរបស់ថៃជាច្រើនរយនាក់ បានបន្តឈ្លានពានទឹកដីកម្ពុជាទាំងខុសច្បាប់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
សកម្មភាពនៃការរំលោភបំពានរបស់យោធាថៃមកលើអធិបតេយ្យកម្ពុជា នៅតំបន់ភូមិព្រៃចាន់ និងភូមិជោគជ័យ តាមរយៈការរាយបន្លាលួស និងការរឹបអូសយកផ្ទះសម្បែងទ្រព្យសម្បត្តិរបស់ប្រជាពលរដ្ឋខ្មែរ គឺជាការរំលោភ បំពានធ្ងន់ធ្ងរលើសិទ្ធិមនុស្សជាពិសេសរំលោភបំពានកិច្ចព្រមព្រៀងបទឈប់បាញ់ និងស្មារតីនៃកិច្ចប្រជុំ (GBC) ក៏ដូចជា លទ្ធផលនៃកិច្ចប្រជុំ (RBC) រវាងយោធភូមិភាគកម្ពុជានិងថៃនាពេលកន្លងមក ៕
ចែករំលែកព័តមាននេះ